റോം- 1980-കളും 1990-കളും ഉൾപ്പെടുന്ന ഇറ്റാലിയൻ ഫുട്ബോളിന്റെ സ്വർണ്ണയുഗത്തിലെ ഏറ്റവും പ്രശസ്തരായ കളിക്കാരിൽ ഒരാളും മുൻ മിലാൻ, ഇറ്റലി ഡിഫൻഡറുമായ ഫ്രാങ്കോ ബറേസി അന്തരിച്ചു. 66 വയസായിരുന്നു. ഫ്രാങ്കോ ബറേസിയുടെ വിയോഗത്തിൽ എസി മിലാന്റെ ചരിത്രം മുഴുവൻ കണ്ണീരണിഞ്ഞിരിക്കുകയാണ്, അദ്ദേഹത്തിന്റെ ഐക്കണിക് 6-ാം നമ്പർ ജേഴ്സിയെപ്പോലെ തന്നെ, അദ്ദേഹത്തിന്റെ മാതൃകയും സത്യസന്ധതയും ക്ലബ്ബിന്റെ ഡിഎൻഎയിൽ എന്നെന്നും പതിഞ്ഞുനിൽക്കും- എ.സി മിലാൻ ക്ലബ് അനുസ്മരിച്ചു.
ശ്വാസകോശത്തിലെ അർബുദമാണ് ഈ ഇതിഹാസ താരത്തിന്റെ മരണകാരണം. കഴിഞ്ഞ വർഷം അദ്ദേഹത്തെ ശസ്ത്രക്രിയയ്ക്ക് വിധേയനാക്കിയിരുന്നു. ഫെബ്രുവരിയിൽ നടന്ന മിലാനോ കോർട്ടിന വിന്റർ ഒളിമ്പിക്സിന്റെ ഉദ്ഘാടന ചടങ്ങിൽ ഒളിമ്പിക് ദീപശിഖ ഏന്തിയവരിൽ ബറേസിയും ഉണ്ടായിരുന്നു. കളിക്കളത്തിലെ അദ്ദേഹത്തിന്റെ ദീർഘകാല വൈരിയും മുൻ ഇന്റർ, ഇറ്റലി ഡിഫൻഡറുമായ ഗിസെപ്പെ ബെർഗോമിക്കൊപ്പമാണ് അദ്ദേഹം ചടങ്ങിൽ പ്രത്യക്ഷപ്പെട്ടത്.
തന്റെ 20 വർഷത്തെ കളിജീവിതം മുഴുവൻ മിലാന് വേണ്ടി മാത്രം ചെലവഴിച്ച ബറേസി, ക്ലബ്ബിന്റെ പ്രതീകമായാണ് കണക്കാക്കപ്പെടുന്നത്. ആറ് സെറി എ കിരീടങ്ങളും മൂന്ന് പ്രമുഖ യൂറോപ്യൻ ട്രോഫികളും നേടിയ അദ്ദേഹം, 1997-ൽ വിരമിക്കുന്നതിന് മുമ്പ് 15 സീസണുകളിൽ ടീമിനെ നയിച്ചു. അദ്ദേഹത്തിന്റെ കളിക്കളത്തിലെ കരിയറിന്റെ അവസാനം, മിലാൻ അദ്ദേഹത്തിന്റെ 6-ാം നമ്പർ ഷർട്ട് പിൻവലിച്ചു . ഈ ആദരം ലഭിക്കുന്ന ക്ലബ്ബിന്റെ ചരിത്രത്തിലെ ആദ്യ കളിക്കാരനായി അദ്ദേഹം മാറി.
1982-ൽ ലോകകപ്പ് നേടിയ ഇറ്റലി ടീമിലെ അംഗമായിരുന്നു ബറേസി. 1994-ലെ ഫൈനലിൽ അദ്ദേഹം ടീമിനെ നയിച്ചു. എന്നാൽ പെനാൽറ്റി ഷൂട്ടൗട്ടിൽ ബ്രസീലിനോട് പരാജയപ്പെടുകയായിരുന്നു; പെനാൽറ്റി പാഴാക്കിയ കളിക്കാരിൽ ബറേസിയും ഉൾപ്പെട്ടിരുന്നു. കാൽമുട്ടിലെ ശസ്ത്രക്രിയ കഴിഞ്ഞ് വെറും 25 ദിവസങ്ങൾക്ക് ശേഷമാണ് അദ്ദേഹം ഫൈനലിൽ 120 മിനിറ്റും കളിച്ചത് എന്നത് ഏറെ പ്രശസ്തമാണ്. 1980-കളുടെ തുടക്കത്തിൽ മിലാൻ രണ്ട് തവണ സെറി ബി-യിലേക്ക് തരംതാഴ്ത്തപ്പെട്ടപ്പോഴും അദ്ദേഹം ക്ലബ്ബിനൊപ്പം ഉറച്ചുനിന്നു. രണ്ട് അവസരങ്ങളിലും ടീമിനെ വീണ്ടും മുൻനിരയിലേക്ക് തിരികെ എത്തിക്കാൻ അദ്ദേഹം സഹായിച്ചു. അങ്ങനെ കരിയറിന്റെ തുടക്കത്തിൽ തന്നെ മിലാനോടുള്ള അദ്ദേഹത്തിന്റെ വിശ്വസ്തത തെളിയിക്കപ്പെട്ടിരുന്നു.
ഏകദേശം രണ്ട് പതിറ്റാണ്ടുകളോളം മിലാന്റെയും ഇറ്റലിയുടെയും പ്രതിരോധ നിരയുടെ ആണിക്കല്ലായിരുന്നു ബറേസി. സെറി എ ക്ലബ്ബിന്റെ ചരിത്രത്തിലെ ഏറ്റവും വിജയകരമായ കാലഘട്ടത്തിൽ അദ്ദേഹം ടീമിനെ നയിക്കുകയും ദേശീയ ടീമിനായി 81 മത്സരങ്ങൾ കളിക്കുകയും ചെയ്തു.
ശാരീരികക്ഷമതയ്ക്ക് മുൻഗണന നൽകിയിരുന്ന ഡിഫൻഡർമാരുടെ കാലഘട്ടത്തിൽ, കളി കൃത്യമായി വായിച്ചെടുക്കാനുള്ള കഴിവിലൂടെ ബറേസി വേറിട്ടുനിന്നു. പ്രതിരോധത്തിലെ മികവിനൊപ്പം സ്വന്തം പകുതിയിൽ നിന്ന് ആക്രമണങ്ങൾ കെട്ടിപ്പടുക്കാനുള്ള കഴിവും കൂട്ടിയിണക്കിക്കൊണ്ട് അദ്ദേഹം ‘സ്വീപ്പർ’ റോളിന് പുതിയ നിർവ്വചനം നൽകി.
പൗളോ മാൽഡീനി, അലസ്സാൻഡ്രോ കോസ്റ്റാകുർട്ട, മൗറോ തസൂട്ടി എന്നിവരടങ്ങുന്ന പ്രശസ്തമായ മിലാൻ പ്രതിരോധ നിരയെ അദ്ദേഹം നയിച്ചു. സെറി എ-യിൽ ക്ലബ്ബിന്റെ തുടർച്ചയായ 58 മത്സരങ്ങളിലെ തോൽവിയില്ലാത്ത കുതിപ്പിന് കരുത്തേകിയതും, ഫാബിയോ കപ്പെല്ലോയുടെ ടീമിന് “ഗ്ലി ഇൻവിൻസിബിലി” (അജയ്യർ) എന്ന വിളിപ്പേര് നേടിക്കൊടുത്തതുമായ ഹൈ ഡിഫൻസീവ് ലൈനും ഓഫ്സൈഡ് ട്രാപ്പും പൂർണ്ണതയിലെത്തിക്കാൻ അദ്ദേഹം സഹായിച്ചു.