അമേരിക്ക സ്വീകരിച്ച നടപടികൾക്ക് മറുപടി ലഭിക്കാതെ പോകില്ലെന്ന് ഗാരീബാബാദി

​തെഹ്റാൻ: ഇറാനെതിരെയുള്ള അമേരിക്കയുടെ സമീപകാല സൈനിക നീക്കങ്ങൾക്ക് ശക്തമായ തിരിച്ചടി നൽകുമെന്ന് ഇറാന്റെ ഡെപ്യൂട്ടി വിദേശകാര്യ മന്ത്രി കാസിം ഗാരീബാബാദി. യു.എസ് പ്രസിഡന്റ് ഡൊണാൾഡ് ട്രംപ് ഇടക്കാല കരാർ റദ്ദാക്കിയതിന് തൊട്ടുപിന്നാലെ ഹോർമുസ് കടലിടുക്കിൽ നടത്തിയ ആക്രമണങ്ങളോട് പ്രതികരിക്കുകയായിരുന്നു അദ്ദേഹം. ​അമേരിക്കയുടെ ഈ നടപടികൾക്ക് മറുപടി നൽകാതിരിക്കില്ലെന്ന് വ്യക്തമാക്കിയ ഗാരീബാബാദി, ഡൊണാൾഡ് ട്രംപിന്റെ പ്രസ്താവനകൾ യു.എസിന്റെ കരുത്തിനെയല്ല, മറിച്ച് അവരുടെ പരാജയപ്പെട്ട നയങ്ങളെയാണ് കാണിക്കുന്നതെന്ന് കുറ്റപ്പെടുത്തി. ഉപരോധങ്ങളും ഭീഷണികളും വഴി ഇറാൻ ജനതയെ കീഴടക്കാൻ അമേരിക്കയ്ക്ക് കഴിയില്ലെന്ന് അദ്ദേഹം ഓർമ്മിപ്പിച്ചു. ട്രംപിന് മനസ്സിലാകുന്ന ഒരേയൊരു ഭാഷ ‘കരുത്തിന്റെ ഭാഷ’ മാത്രമാണെന്നും അതിലൂടെത്തന്നെ മറുപടി നൽകണമെന്നും അദ്ദേഹം എക്സിലൂടെ (ട്വിറ്റർ) വ്യക്തമാക്കി.
​
അതേസമയം, യു.എസ് താവളങ്ങൾക്ക് നേരെ വലിയ തോതിലുള്ള പ്രത്യാക്രമണത്തിന് ഇറാൻ റെവല്യൂഷണറി ഗാർഡ് തയ്യാറെടുക്കുന്നതായി സൈനിക വൃത്തങ്ങൾ സൂചന നൽകി. അമേരിക്കൻ ആക്രമണങ്ങൾക്ക് കൃത്യമായ പ്രതികാരം ചെയ്യുമെന്നാണ് റെവല്യൂഷണറി ഗാർഡിന്റെ മുന്നറിയിപ്പ്. ഇതോടെ ഹോർമുസ് കടലിടുക്കിലും പശ്ചിമേഷ്യൻ മേഖലയിലും കനത്ത യുദ്ധഭീതിയാണ് നിലനിൽക്കുന്നത്.