വാഷിംഗ്ടൺ– അമേരിക്കയുടെ കടുത്ത സാമ്പത്തിക, നാവിക ഉപരോധങ്ങളുടെ ഫലമായി ഇറാൻ കടുത്ത സാമ്പത്തിക സമ്മർദ്ദം നേരിടുന്നതായി യു.എസ് സെൻട്രൽ കമാൻഡ് വ്യക്തമാക്കി. ഊർജം, എണ്ണ, ഉരുക്ക്, ഉൽപ്പാദനം, ഓട്ടോമോട്ടീവ്, വ്യോമയാനം, നിർമ്മാണം, സുരക്ഷ, സൈന്യം തുടങ്ങി സമ്പദ്‌വ്യവസ്ഥയുടെ വിവിധ മേഖലകൾ കനത്ത പ്രതിസന്ധിയിലാണ്.
സ്വന്തം ഉദ്യോഗസ്ഥർക്ക് ശമ്പളം നൽകാൻ പോലും പാടുപെടുന്ന റെവല്യൂഷണറി ഗാർഡ്, ഫണ്ട് കണ്ടെത്തുന്നതിനായി ഇറാൻ അനുകൂല മിലീഷ്യ ഗ്രൂപ്പുകളുടെ പോരാളികൾക്കുള്ള പേയ്മെന്റുകൾ തടഞ്ഞുവെച്ചിട്ടുണ്ട്. ഈ സാമ്പത്തിക ബുദ്ധിമുട്ട് സഖ്യകക്ഷി ഗ്രൂപ്പുകൾക്കും അമേരിക്കയ്ക്കും സഖ്യകക്ഷികൾക്കുമെതിരായ ആക്രമണങ്ങൾക്കും ധനസഹായം നൽകാനുള്ള ഇറാന്റെ ശേഷിയെ കാര്യമായി പരിമിതപ്പെടുത്തിയിട്ടുണ്ട്. കൂടാതെ, യു.എസ് ആക്രമണങ്ങളിൽ തകർന്ന ആയുധങ്ങളും ഫാക്ടറികളും പുനർനിർമ്മിക്കുന്നതിലും ഇറാൻ കടുത്ത ബുദ്ധിമുട്ടുകൾ നേരിടുന്നുണ്ടെന്നും റെവല്യൂഷണറി ഗാർഡിൽ വർദ്ധിച്ചുവരുന്ന നിരാശയുടെ ലക്ഷണങ്ങൾ പ്രകടമാണെന്നും സെൻട്രൽ കമാൻഡ് പറയുന്നു.
അമേരിക്ക മരവിപ്പിച്ച ഇറാന്റെ എണ്ണ കയറ്റുമതി വരുമാനമായ 25 ബില്യൺ ഡോളർ ഇറാന് പ്രയോജനപ്പെടുത്താൻ കഴിയില്ലെന്നും, ഏകദേശം 35 കോടി ഡോളറിന്റെ ക്രിപ്റ്റോകറൻസി മരവിപ്പിച്ചിട്ടുണ്ടെന്നും യു.എസ് സെൻട്രൽ കമാൻഡ് കമാൻഡർ അവകാശപ്പെട്ടു. ഉപരോധങ്ങൾ കാരണം ഇറാൻ കടൽ വഴി ഇറക്കുമതിയോ കയറ്റുമതിയോ നടത്തുന്നില്ലെന്നും കമാൻഡ് ചൂണ്ടിക്കാട്ടി.
അതേസമയം, മിഡിൽ ഈസ്റ്റിലുടനീളം നിലവിൽ 50,000-ലധികം യു.എസ് സൈനികരെ വിന്യസിച്ചിട്ടുണ്ടെന്നും കഴിഞ്ഞ ആഴ്ച മാത്രം 400 വാണിജ്യ കപ്പലുകൾ ഹോർമുസ് കടലിടുക്കിലൂടെ സുരക്ഷിതമായി കടന്നുപോയെന്നും യു.എസ് സെൻട്രൽ കമാൻഡ് കമാൻഡർ അറിയിച്ചു.