വാഷിംഗ്ടണ്‍– ഇറാനുമായുള്ള നിലവിലെ സംഘര്‍ഷം യുദ്ധമല്ലെന്ന് യു.എസ് പ്രസിഡന്റ് ഡൊണാള്‍ഡ് ട്രംപ്. വിഷയത്തില്‍ അമേരിക്ക കാര്യമായ പുരോഗതി കൈവരിച്ചിട്ടുണ്ടെന്നും മേഖലയില്‍ നിന്നുള്ള എണ്ണ ഉത്പാദനം ശത്രുത ആരംഭിക്കുന്നതിന് മുമ്പുണ്ടായിരുന്നതിനേക്കാള്‍ വര്‍ധിച്ചതായും അദ്ദേഹം അവകാശപ്പെട്ടു. കഴിഞ്ഞ അഞ്ച് മാസമായി ആര്‍ക്കും പരിക്കേല്‍ക്കുകയോ കൊല്ലപ്പെടുകയോ ചെയ്തിട്ടില്ലാത്തതിനാല്‍ ഈ സാഹചര്യത്തെ യുദ്ധമെന്ന് വിളിക്കാനാവില്ലെന്നാണ് ട്രംപിന്റെ നിലപാട്.
ഇറാനിലെ വ്യോമ പ്രതിരോധ സംവിധാനം ലക്ഷ്യമാക്കി വെള്ളിയാഴ്ച യു.എസ് സൈന്യം പരിമിതമായ ആക്രമണം നടത്തിയതായി ട്രംപ് സ്ഥിരീകരിച്ചു. “അവര്‍ നിര്‍മ്മിച്ച ചെറിയൊരു വ്യോമ പ്രതിരോധ സംവിധാനം അഞ്ചു മുതൽ പതിനഞ്ചു മിനിറ്റിനുള്ളിൽ ഞങ്ങള്‍ തകര്‍ത്തു,” എന്ന് വ്യക്തമാക്കിയ ട്രംപ്, ഈ നീക്കത്തെ തികച്ചും ലളിതമായ ഒരു സംഭവമായി വിശേഷിപ്പിച്ചു. എന്നാൽ ആക്രമിക്കപ്പെട്ട ലക്ഷ്യസ്ഥാനത്തെക്കുറിച്ചുള്ള കൂടുതല്‍ വിവരങ്ങള്‍ വെളിപ്പെടുത്താന്‍ അദ്ദേഹം തയ്യാറായില്ല.
അതേസമയം, എണ്ണ ഗതാഗതത്തിന് നിര്‍ണായകമായ ഹോര്‍മുസ് കടലിടുക്കിലെ ഖെഷം ദ്വീപിലുള്ള സുസ മേഖലയില്‍ രണ്ട് സ്‌ഫോടന ശബ്ദങ്ങള്‍ കേട്ടതായി ഇറാനിലെ ഔദ്യോഗിക മാധ്യമങ്ങള്‍ റിപ്പോര്‍ട്ട് ചെയ്തിട്ടുണ്ട്.
വൈറ്റ് ഹൗസില്‍ പുതിയ വ്യോമാക്രമണങ്ങളെ കുറിച്ചും സജീവ സൈനിക നടപടികളെ കുറിച്ചുമുള്ള ചര്‍ച്ചകള്‍ തുടരുന്നതിനിടയിലാണ് നിലവിലെ സംഘര്‍ഷം യുദ്ധമല്ലെന്ന നിലപാടിൽ ട്രംപ് ഉറച്ചുനില്‍ക്കുന്നത്.