റാമല്ല – വെസ്റ്റ് ബാങ്കില് ജൂതകുടിയേറ്റക്കാരുടെ വെടിയേറ്റ് ഫലസ്തീന് യുവാവ് മരിച്ചതായി ഫലസ്തീന് ആരോഗ്യ മന്ത്രാലയം അറിയിച്ചു. രണ്ട് ദിവസത്തിനുള്ളില് ഇത്തരത്തില് കൊല്ലപ്പെടുന്ന മൂന്നാമത്തെയാളാണ്. റമല്ലയുടെ കിഴക്ക് മധ്യ വെസ്റ്റ് ബാങ്കില് സ്ഥിതി ചെയ്യുന്ന ദേര് ദിബ്വാന് ഗ്രാമത്തില് 25 കാരനായ ഔദ അതീഫ് അവാവ്ദയാണ് കുടിയേറ്റക്കാരുടെ വെടിയേറ്റ് കൊല്ലപ്പെട്ടത്. ദേര് ദിബ്വാനില് ജൂതകുടിയേറ്റക്കാരുടെ ആക്രമണത്തിനിടെ പിന്നില് നിന്ന് വെടിയേറ്റതിനെ തുടര്ന്ന് യുവാവിനെ ആശുപത്രിയില് പ്രവേശിപ്പിച്ചതായി ഫലസ്തീന് റെഡ് ക്രസന്റ് സൊസൈറ്റി നേരത്തെ റിപ്പോര്ട്ട് ചെയ്തിരുന്നു.
ദേര് ദിബ്വാനില് നിന്ന് ഏതാനും പേരെ ഇസ്രായില് സൈന്യം അറസ്റ്റ് ചെയ്തതായും ഡസന് കണക്കിന് പുരുഷന്മാര് റോഡിലൂടെ നിരനിരയായി നടക്കുന്നത് കാണിക്കുന്ന ദൃശ്യങ്ങള് പുറത്തുവിട്ടതായും ഫലസ്തീന് അതോറിറ്റിയുടെ മീഡിയ ഓഫീസ് എക്സ് പ്ലാറ്റ്ഫോം വഴി റിപ്പോര്ട്ട് ചെയ്തു. മധ്യ വെസ്റ്റ് ബാങ്കില് സ്ഥിതി ചെയ്യുന്ന അല്മുഗയ്യിര് ഗ്രാമത്തില് ചൊവ്വാഴ്ച ജൂതകുടിയേറ്റക്കാര് 14 വയസ്സുള്ള ഔസ് ഹംദി അല്നഅ്സാനെയും 32 വയസ്സുള്ള ജിഹാദ് മര്സൂഖ് അബൂനഈമിനെയും കൊലപ്പെടുത്തിയതായി പലസ്തീന് അതോറിറ്റി പറഞ്ഞു. ഫെബ്രുവരി 28 ന് മിഡില് ഈസ്റ്റ് യുദ്ധം ആരംഭിച്ചതിനുശേഷം വെസ്റ്റ് ബാങ്കിലുടനീളം വര്ധിച്ചുവരുന്ന ജൂതകുടിയേറ്റക്കാരുടെ അക്രമത്തിന്റെ ഏറ്റവും പുതിയ ഇരകളാണിവര്.
അല്മുഗയ്യിറിലെ സംഭവത്തെ കുറിച്ച് അന്വേഷിക്കുകയാണെന്ന് ഇസ്രായില് സൈന്യം അറിയിച്ചു. ഒരു റിസര്വ് സൈനികന് ഉള്പ്പെടെയുള്ള സാധാരണക്കാര് സഞ്ചരിച്ചിരുന്ന ഇസ്രായിലി വാഹനത്തിന് നേരെ കല്ലെറിഞ്ഞതായി റിപ്പോര്ട്ട് ലഭിച്ചതിനെ തുടര്ന്ന് സൈനികരെ പ്രദേശത്ത് വിന്യസിച്ചതായി ഇസ്രായില് സൈന്യം പ്രസ്താവിച്ചു. കല്ലേറിന് പിന്നാലെ റിസര്വ് സൈനികന് വാഹനത്തില് നിന്ന് ഇറങ്ങി സംശയിക്കപ്പെടുന്നവര്ക്ക് നേരെ വെടിയുതിര്ക്കുകയായിരുന്നു. സൈന്യം ഏറ്റുമുട്ടലുകള് പിരിച്ചുവിടാന് പ്രവര്ത്തിച്ചതായും ഇസ്രായില് സൈന്യം കൂട്ടിച്ചേര്ത്തു.
2023 ഒക്ടോബര് ഏഴിന് ഗാസ യുദ്ധം ആരംഭിച്ചതിനുശേഷം വെസ്റ്റ് ബാങ്കില് ഇസ്രായില് സേനയും ജൂതകുടിയേറ്റക്കാരും കുറഞ്ഞത് 1,065 ഫലസ്തീനികളെ കൊലപ്പെടുത്തിയിട്ടുണ്ട്. ഇതേ കാലയളവില് ഫലസ്തീനികള് നടത്തിയ ആക്രമണങ്ങളിലോ ഇസ്രായില് സൈനിക നടപടികളിലോ സൈനികരും സാധാരണക്കാരും ഉള്പ്പെടെ കുറഞ്ഞത് 46 ഇസ്രായിലികള് കൊല്ലപ്പെട്ടതായി ഇസ്രായിലിന്റെ ഔദ്യോഗിക കണക്കുകള് സൂചിപ്പിക്കുന്നു.