തെല്‍അവീവ് – ഇറാന്‍ മിസൈല്‍ ആക്രമണത്തില്‍ ഇസ്രായിലിലുണ്ടായ വന്‍ നാശത്തിന്റെ വ്യാപ്തി വ്യക്തമാക്കുന്ന വീഡിയോകള്‍ പുറത്തുവന്നു. തെല്‍അവീവിലെ ഹോളോണ്‍ പ്രദേശത്തും ഇസ്രായിലിലെ സിലിക്കണ്‍ വാലി എന്നറിയപ്പെടുന്ന ഡാന്‍ ബ്ലോക്ക് പ്രദേശത്തുമുണ്ടായ വ്യാപകമായ നാശനഷ്ടങ്ങള്‍ ആകാശദൃശ്യങ്ങള്‍ കാണിച്ചു. ഇറാന്‍ ബാലിസ്റ്റിക് മിസൈലുകളുടെ ശക്തിയില്‍ ഹോളോണ്‍ പ്രദേശത്ത് വീടുകള്‍ തകര്‍ന്നതിനെ തുടര്‍ന്ന് താമസക്കാര്‍ ആരും അവശേഷിച്ചിട്ടില്ലെന്നും പ്രദേശം പൂര്‍ണമായും തകര്‍ന്നതായും വീഡിയോ വ്യക്തമാക്കുന്നു.
ഇവിടെ വീടുകള്‍ അവശിഷ്ടങ്ങളുടെ കൂമ്പാരമായി മാറി. മുന്‍ഭാഗങ്ങളും കോണ്‍ക്രീറ്റ് തൂണുകളും തകര്‍ന്നു.
ഡാന്‍ ബ്ലോക്ക് പ്രദേശത്ത് നിരവധി കെട്ടിടങ്ങള്‍ക്കും സാങ്കേതിക സമുച്ചയങ്ങള്‍ക്കും സംഭവിച്ച നാശത്തിന്റെ വ്യാപ്തിയും വാഹനങ്ങള്‍ക്കണ്ടായ നാശനഷ്ടങ്ങളും രണ്ടാമത്തെ വീഡിയോ കാണിച്ചു. ഇസ്രായിലിലെ ഏറ്റവും പ്രധാനപ്പെട്ട മേഖലകളില്‍ ഒന്നാണ് ഡാന്‍ ബ്ലോക്ക്. സോഫ്റ്റ്വെയര്‍, ആര്‍ട്ടിഫിഷ്യല്‍ ഇന്റലിജന്‍സ്, സൈബര്‍ സുരക്ഷ എന്നീ മേഖലകളിലെ ആഗോള, പ്രാദേശിക കമ്പനികളുടെ ആസ്ഥാനങ്ങള്‍ ഉള്‍പ്പെടെ ഇസ്രായിലിലെ ഹൈടെക്, നൂതന സാങ്കേതിക കമ്പനികളില്‍ 50 ശതമാനത്തിലേറെ ഇവിടെയാണ് പ്രവര്‍ത്തിക്കുന്നത്.