ഗാസ – ഗാസ മുനമ്പിലെ ഖാന്‍ യൂനിസിന് കിഴക്കുള്ള ബനീസുഹൈല ഗ്രാമത്തില്‍ ഇന്ന് രാവിലെ ഇസ്രായില്‍ സൈന്യം നടത്തിയ വെടിവെപ്പില്‍ രണ്ട് കുട്ടികള്‍ കൊല്ലപ്പെട്ടു. ഖാന്‍ യൂനിസിന് കിഴക്കുള്ള നിരവധി പ്രദേശങ്ങളില്‍ ഇസ്രായില്‍ ബോംബാക്രമണം തുടരുകയാണ്. റഫ നഗരത്തില്‍ വീണ്ടും ഇസ്രായില്‍ വ്യോമാക്രമണം നടത്തുകയും തീരത്ത് യുദ്ധ ബോട്ടുകളില്‍ നിന്ന് വെടിവെപ്പ് നടത്തുകയും ചെയ്തു. രണ്ട് കുട്ടികളുടെ മരണത്തോടെ വെടിനിര്‍ത്തല്‍ കരാറിനു ശേഷം ഗാസയില്‍ ഇസ്രായില്‍ ആക്രമണങ്ങളില്‍ കൊല്ലപ്പെട്ടവരുടെ എണ്ണം 354 ആയി ഉയര്‍ന്നു. 130 കുട്ടികളും 54 സ്ത്രീകളും ഉള്‍പ്പെടെ 896 പേര്‍ക്ക് പരിക്കേറ്റു.
കിഴക്കന്‍ ഗാസ മുനമ്പിലെ വിവിധ സ്ഥലങ്ങളില്‍ ഇന്ന് പുലര്‍ച്ചെ മുതല്‍ ഇസ്രായിലി വിമാനങ്ങള്‍ ഏതാനും വ്യോമാക്രമണങ്ങളും, പീരങ്കി ഷെല്ലാക്രമണവും നടത്തി. ഖാന്‍ യൂനിസിന് കിഴക്കുള്ള ബനീസുഹൈലയിലെ അല്‍ഫാറാബി സ്‌കൂളിന് സമീപം ഇസ്രായില്‍ ഇന്ന് രാവിലെ നടത്തിയ വ്യോമാക്രമണത്തില്‍ രണ്ട് സഹോദരന്മാര്‍ക്ക് പരിക്കേറ്റതായും പലസ്തീന്‍ ഇന്‍ഫര്‍മേഷന്‍ സെന്റര്‍ അറിയിച്ചു. തെക്കന്‍ ഗാസ മുനമ്പിലെ ഖാന്‍ യൂനിസിന് കിഴക്കുള്ള ബനീസുഹൈല ഗ്രാമത്തില്‍ ഇസ്രായില്‍ ആക്രമണത്തില്‍ ഇന്നലെ ഫലസ്തീന്‍ യുവാവ് കൊല്ലപ്പെട്ടിരുന്നു. പലസ്തീന്‍ വിമോചനത്തിനായുള്ള ജനാധിപത്യ മുന്നണിയുടെ സായുധ വിഭാഗമായ ഉമര്‍ അല്‍ഖാസിം ബ്രിഗേഡ്സ് അംഗങ്ങളില്‍ ഒരാളായ അബ്ദുല്ല അബൂഹമാദ് ആണ് കൊല്ലപ്പെട്ടതെന്ന് ഗ്രൂപ്പ് വ്യക്തമാക്കി.
ഇസ്രായില്‍ 535 തവണ വെടിനിര്‍ത്തല്‍ ലംഘിച്ച് ആക്രമണങ്ങള്‍ നടത്തിയത് രേഖപ്പെടുത്തിയിട്ടുണ്ടെന്ന് ഹമാസ് ഗവണ്‍മെന്റ് മീഡിയ ഓഫീസ് പറഞ്ഞു. 350 ലേറെ ഫലസ്തീനികള്‍ കൊല്ലപ്പെടുകയും 900 ലേറെ പേര്‍ക്ക് പരിക്കേല്‍ക്കുകയും ചെയ്തു. ആവശ്യമായ സഹായവസ്തുക്കളുമായി എത്തിയ 28,000 ട്രക്കുകളില്‍ 9,930 ട്രക്കുകള്‍ക്ക് മാത്രമേ പ്രവേശനം അനുവദിച്ചിട്ടുള്ളൂ. ഇത് 35 ശതമാനം മാത്രമാണ്. നിയമപരമോ മാനുഷികമോ ആയ ബാധ്യതയായല്ല, മറിച്ച് സമ്മര്‍ദത്തിനായി ഉപയോഗിക്കുന്ന യുദ്ധോപകരണമായി സഹായത്തെ ഇസ്രായില്‍ മാറ്റുകയാണ്. ഗാസയിലെ മാനുഷിക സാഹചര്യം വഷളായിക്കൊണ്ടിരിക്കുകയാണെന്നും മീഡിയ ഓഫീസ് ഡയറക്ടര്‍ ഇസ്മായില്‍ അല്‍സവാബ്ത വ്യക്തമാക്കി.
അതേ സമയം ഇസ്രായില്‍ ആക്രമണങ്ങളില്‍ നേരത്തെ മരണപ്പെട്ട 605 പേരുടെ മൃതദേഹങ്ങള്‍ കെട്ടിടങ്ങളുടെ അശിഷ്ടങ്ങള്‍ക്കടിയില്‍ നിന്ന് കണ്ടെടുത്തു.