ഗാസ – ഒക്ടോബറില് യു.എസ് മധ്യസ്ഥതയില് പ്രഖ്യാപിച്ച വെടിനിര്ത്തലിന് ശേഷം ഗാസ മുനമ്പില് ഇസ്രായിലി ആക്രമണങ്ങളില് കൊല്ലപ്പെട്ട ഫലസ്തീനികളുടെ എണ്ണം 1,000 കവിഞ്ഞതായി ഗാസ ആരോഗ്യ മന്ത്രാലയം അറിയിച്ചു. ഇന്നലെ ഇസ്രായില് നടത്തിയ ആക്രമണത്തില് മൂന്ന് പേര് കൊല്ലപ്പെട്ടതായി റിപ്പോര്ട്ടുകള് സൂചിപ്പിക്കുന്നു. ഗാസ നഗരത്തിലെ പ്രധാന റോഡായ ഉമര് അല്മുഖ്താര് റോഡില് കാറിനു നേരെ ഇസ്രായില് നടത്തിയ ഡ്രോണ് ആക്രമണത്തില് മൂന്ന് പേര് കൊല്ലപ്പെട്ടതായി ആരോഗ്യ പ്രവര്ത്തകര് വ്യക്തമാക്കി. ഈ സംഭവത്തോടെ 2025 ഒക്ടോബറില് യു.എസ് പ്രസിഡന്റ് ഡൊണാള്ഡ് ട്രംപ് മധ്യസ്ഥത വഹിച്ച വെടിനിര്ത്തലിന് ശേഷം ഗാസയില് കൊല്ലപ്പെട്ട ഫലസ്തീനികളുടെ ആകെ എണ്ണം 1,008 ആയതായി ആരോഗ്യ മന്ത്രാലയം അറിയിച്ചു.
മധ്യസ്ഥര് വീണ്ടും വെടിനിര്ത്തലിന് ശ്രമിക്കുന്നുണ്ടെങ്കിലും ഇസ്രായില് ആക്രമണങ്ങള് തുടരുകയാണ്. ഇതേ കാലയളവില് തങ്ങളുടെ നാല് സൈനികരെ പോരാളികള് കൊലപ്പെടുത്തിയതായി ഇസ്രായില് പറയുന്നു. ഹമാസിന്റെയും മറ്റ് തീവ്രവാദികളുടെയും ആസന്നമായ ആക്രമണങ്ങള് തടയുക എന്ന ലക്ഷ്യത്തോടെയാണ് വ്യോമാക്രമണങ്ങള് നടത്തുന്നതെന്നാണ് ഇസ്രായിലിന്റെ വാദം. ട്രംപിന്റെ ഗാസ പദ്ധതിയുടെ അടുത്ത ഘട്ടം എങ്ങിനെ മുന്നോട്ട് കൊണ്ടുപോകണമെന്ന കാര്യത്തില് ഇസ്രായിലും ഹമാസും ഇപ്പോഴും സ്തംഭനാവസ്ഥയിലാണ്. അടുത്ത ഘട്ടത്തില് ഹമാസിന്റെ നിരായുധീകരണവും ഗാസയില് നിന്നുള്ള ഇസ്രായില് സൈന്യത്തിന്റെ പിന്മാറ്റവും ഉള്പ്പെടുന്നു.
ട്രംപ് ഗാസക്കായി സ്ഥാപിച്ച സമാധാന കൗണ്സിലിന്റെ പ്രതിനിധിയായ നിക്കോളായ് മ്ലാഡെനോവ് സമര്പ്പിച്ച റോഡ്മാപ്പ് പദ്ധതിക്ക് ഹമാസും മറ്റ് ഫലസ്തീന് വിഭാഗങ്ങളും മറുപടി നല്കിതിനെ തുടര്ന്ന് ഈ ആഴ്ച കയ്റോയില് ഈജിപ്ത്, ഖത്തര്, തുര്ക്കി എന്നിവിടങ്ങളില് നിന്നുള്ള മധ്യസ്ഥരുമായി മ്ലാഡെനോവ് ചര്ച്ച നടത്തിയതായി ബന്ധപ്പെട്ട വൃത്തങ്ങള് പറഞ്ഞു. ട്രംപിന്റെ പദ്ധതിയുടെ പ്രധാന ചുവപ്പ് രേഖകള് നിലനിര്ത്തിക്കൊണ്ട് തന്നെ ചില ഫലസ്തീന് വിഭാഗങ്ങളുടെ ആശങ്കകള് പരിഹരിക്കുന്ന റോഡ്മാപ്പിന്റെ പരിഷ്കരിച്ച പതിപ്പ് ബുധനാഴ്ച മ്ലാഡെനോവ് ഹമാസിനും മറ്റ് വിഭാഗങ്ങള്ക്കും സമര്പ്പിച്ചതായി അഭിജ്ഞ വൃത്തങ്ങള് റോയിട്ടേഴ്സിനോട് വ്യക്തമാക്കി. ഇത് പഠിച്ചുകൊണ്ടിരിക്കുകയാണെന്ന് ഹമാസ് ഉദ്യോഗസ്ഥന് റോയിട്ടേഴ്സിനോട് സ്ഥിരീകരിച്ചു.
ഗാസയുടെ 60 ശതമാനത്തിലധികം ഇപ്പോഴും ഇസ്രായില് സൈന്യത്തിന്റെ പൂര്ണ നിയന്ത്രണത്തിലാണ്. ഇവിടങ്ങളില് നിന്ന് താമസക്കാരോട് ഒഴിഞ്ഞുപോകാന് ഉത്തരവിട്ട് ശേഷിക്കുന്ന കെട്ടിടങ്ങള് ഇസ്രായില് പൊളിച്ചുമാറ്റി. പലതവണ കുടിയിറക്കപ്പെട്ട ഇരുപതു ലക്ഷം വരുന്ന ഗാസ നിവാസികളില് ഏതാണ്ട് എല്ലാവരും ഇപ്പോള് തീരദേശത്തെ ഇടുങ്ങിയ പ്രദേശത്ത് താല്ക്കാലിക കൂടാരങ്ങളിലോ തകര്ന്ന കെട്ടിടങ്ങളിലോ ആണ് താമസിക്കുന്നത്.