ഗാസ – ഗാസയില് ഇന്നലെ ഇസ്രായില് നടത്തിയ ആക്രമണങ്ങളില് നാലു പേര് കൊല്ലപ്പെട്ടതായി ആരോഗ്യ ഉദ്യോഗസ്ഥര് അറിയിച്ചു. ദെയ്ര് അല്ബലഹിന് കിഴക്ക് കാറിന് നേരെ ഇസ്രായില് നടത്തിയ വ്യോമാക്രമണത്തില് ഒരാള് കൊല്ലപ്പെടുകയും മറ്റ് നാല് പേര്ക്ക് പരിക്കേല്ക്കുകയും ചെയ്തതായി പാരാമെഡിക്കുകള് റിപ്പോര്ട്ട് ചെയ്തു. ആക്രമണത്തില് കാര് പൂര്ണമായി തകര്ന്നു. അല്സവായിദ ഗ്രാമത്തിനടുത്തുള്ള മറ്റൊരു വ്യോമാക്രമണത്തില് ഒരാള് വീരമൃത്യു വരിക്കുകയും മറ്റൊരാള്ക്ക് പരിക്കേല്ക്കുകയും ചെയ്തു. ഖാന് യൂനിസിലെ അഭയാര്ഥി ക്യാമ്പില് ഇസ്രായില് നടത്തിയ ആക്രമണത്തില് മറ്റൊരാള് രക്തസാക്ഷിയായി. വടക്കുപടിഞ്ഞാറന് ഖാന് യൂനിസില് ഒരാള് കൂടി വീരമൃത്യു വരിച്ചതിനെ തുടര്ന്ന് ചൊവ്വാഴ്ച ഇസ്രായില് ആക്രമണങ്ങളില് കൊല്ലപ്പെട്ടവരുടെ എണ്ണം നാലായി. ഖാന് യൂനിസിന് സമീപം യെല്ലോ ലൈനിന് സമീപമെത്തിയ രണ്ട് പേര്ക്ക് നേരെ വെടിയുതിര്ത്തതായി ഇസ്രായില് സേന പ്രസ്താവനയില് പറഞ്ഞു.
യു.എസ് പ്രസിഡന്റ് ഡൊണാള്ഡ് ട്രംപിന്റെ മധ്യസ്ഥതയില് ഒക്ടോബറില് വെടിനിര്ത്തല് കരാര് ഉണ്ടാക്കിയെങ്കിലും ഗാസക്കെതിരായ ഇസ്രായില് ആക്രമണം അവസാനിപ്പിക്കാന് ഈ കരാറിന് കഴിഞ്ഞില്ല. ഇസ്രായിലും ഹമാസും തമ്മിലുള്ള പരോക്ഷ ചര്ച്ചകള് നിലച്ചിട്ടുണ്ട്. ഗാസ മുനമ്പിന്റെ പകുതിയിലധികം ഇപ്പോള് ഇസ്രായിലിന്റെ നിയന്ത്രണത്തിലാണ്. വെടിനിര്ത്തല് പ്രാബല്യത്തില് വന്നതിന് ശേഷം 930 ഫലസ്തീനികള് ഇസ്രായില് ആക്രമണങ്ങളില് കൊല്ലപ്പെട്ടതായി ഗാസ ആരോഗ്യ മന്ത്രാലയത്തിന്റെ കണക്കുകള് വ്യക്തമാക്കുന്നത്. ഇതേ കാലയളവില് തങ്ങളുടെ നാല് സൈനികര് കൊല്ലപ്പെട്ടതായി ഇസ്രായില് സൈന്യം അവകാശപ്പെടുന്നു.