വാഷിംഗ്ടണ് – ഇറാന് തുറമുഖങ്ങള്ക്കെതിരായ യു.എസ് നാവിക ഉപരോധം തുടരുന്നതിനിടെ, ഹോര്മുസ് കടലിടുക്കില് മൈനുകള് സ്ഥാപിക്കുന്ന ഏതൊരു ബോട്ടിനും നേരെ വെടിവെക്കാന് യു.എസ് പ്രസിഡന്റ് ഡൊണാള്ഡ് ട്രംപ് അമേരിക്കന് നാവികസേനയോട് ഉത്തരവിട്ടു. കടലിടുക്കില് മൈന് സ്വീപ്പര് പ്രവര്ത്തനങ്ങള് മൂന്നിരട്ടിയാക്കാന് ഉത്തരവിട്ടതായും ട്രംപ് സൂചിപ്പിച്ചു. ഹോര്മുസ് കടലിടുക്കില് മൈന് സ്ഥാപിക്കുന്ന എല്ലാ ചെറിയ ബോട്ടുകളും വെടിവെച്ച് തകര്ക്കാന് ഞാന് യു.എസ് നാവികസേനയോട് നിര്ദേശിച്ചിട്ടുണ്ട്. ഇക്കാര്യത്തില് ഒരു മടിയും വേണ്ട. ഇറാന്റെ മുഴുവന് കപ്പലുകളും -159 കപ്പലുകള്- അമേരിക്ക മുക്കിയതിനാല് കടലിന്റെ അടിത്തട്ടിലാണ്. ഞങ്ങളുടെ മൈന് സ്വീപ്പിംഗ് കപ്പലുകള് ഇപ്പോള് കടലിടുക്ക് വൃത്തിയാക്കുകയാണ്. അവയുടെ പ്രവര്ത്തനം മൂന്നിരട്ടിയാക്കാന് ഞാന് ഇതിനാല് അവരോട് കല്പ്പിക്കുന്നുവെന്ന് ട്രൂത്ത് സോഷ്യലിലെ പോസ്റ്റില് ട്രംപ് എഴുതി.
ഹോര്മുസ് കടലിടുക്കിന്റെ പൂര്ണ നിയന്ത്രണം അമേരിക്കക്കാണ്. യു.എസ് നാവികസേനയുടെ അനുമതിയില്ലാതെ ഒരു കപ്പലിനും ഹോര്മുസില് പ്രവേശിക്കാനോ പുറത്തുപോകാനോ കഴിയില്ല. ഇറാന് ഒരു കരാറിലെത്തുന്നതുവരെ ഹോര്മുസ് കര്ശനമായി അടച്ചിട്ടിരിക്കുന്നു. ഇപ്പോഴത്തെ തങ്ങളുടെ നേതാവ് ആരാണെന്ന് മനസ്സിലാക്കാന് ഇറാന് വളരെ ബുദ്ധിമുട്ടുന്നു. യുദ്ധക്കളത്തില് കനത്ത പരാജയം ഏറ്റുവാങ്ങുന്ന കടുത്ത വാദികളും, യഥാര്ഥത്തില് മിതവാദികളല്ലാത്ത മിതവാദികളും തമ്മിലുള്ള ആഭ്യന്തര സംഘര്ഷം ഭ്രാന്തമാണെന്നും ട്രംപ് പറഞ്ഞു.
ഹോര്മുസ് കടലിടുക്കില് നിന്ന് മൈനുകള് നീക്കം ചെയ്യാന് ആറ് മാസം വരെ സമയമെടുക്കുമെന്ന് യു.എസ് പ്രതിരോധ വകുപ്പ് കണക്കാക്കുന്നു. ഇത് ആഗോള എണ്ണവിലയെ ബാധിക്കുമെന്ന് ദി വാഷിംഗ്ടണ് പോസ്റ്റ് റിപ്പോര്ട്ട് പറയുന്നു. ഏപ്രില് പകുതിയോടെ ഇറാന് റെവല്യൂഷണറി ഗാര്ഡ് ഹോര്മുസ് കടലിടുക്കില് 1,400 ചതുരശ്ര കിലോമീറ്റര് വിസ്തൃതിയുള്ള അപകട മേഖല ഉണ്ടാകുമെന്ന് മുന്നറിയിപ്പ് നല്കിയിട്ടുണ്ട്. ഇറാന് എല്ലാ മൈനുകളും നീക്കം ചെയ്യുന്ന പ്രക്രിയയിലാണെന്ന് യു.എസ് പ്രസിഡന്റ് കഴിഞ്ഞ ആഴ്ച പറഞ്ഞു. എന്നാല് ഇറാന് ഈ വിവരം സ്ഥിരീകരിച്ചിട്ടില്ല. ഷിപ്പിംഗ് കമ്പനികള് ജാഗ്രത പാലിക്കുകയും സുരക്ഷിതമായ ഷിപ്പിംഗ് റൂട്ടുകളെ കുറിച്ച് വ്യക്തത ആവശ്യപ്പെടുകയും ചെയ്യുന്നു. അതേസമയം, സംഘര്ഷത്തില് ഉള്പ്പെടാത്ത രാജ്യങ്ങള് ഫെബ്രുവരി 28 ന് ഇറാനെതിരായ യു.എസ്-ഇസ്രായില് ആക്രമണത്തോടെ പൊട്ടിപ്പുറപ്പെട്ട യുദ്ധം അവസാനിപ്പിക്കാന് കരാറിലെത്തിയാല് കടലിടുക്ക് സുരക്ഷിതമാക്കാനുള്ള ദൗത്യം ഏറ്റെടുക്കാന് സന്നദ്ധത പ്രകടിപ്പിച്ചിട്ടുണ്ട്.