വാഷിംഗ്ടണ്‍ – വാഷിംഗ്ടണില്‍ അഫ്ഗാന്‍ യുവാവ് രണ്ട് നാഷണല്‍ ഗാര്‍ഡ് സൈനികര്‍ക്കു നേരെ വെടിവെച്ചതിനു പിന്നാലെ യു.എസ് സംവിധാനം പൂര്‍ണമായും വീണ്ടെടുക്കുന്നതു വരെ ഭരണകൂടം എല്ലാ മൂന്നാം ലോക രാജ്യങ്ങളില്‍ നിന്നും അമേരിക്കയിലേക്കുള്ള കുടിയേറ്റം നിര്‍ത്തുമെന്ന് യു.എസ് പ്രസിഡന്റ് ഡൊണാള്‍ഡ് ട്രംപ് പറഞ്ഞു. യു.എസ് സംവിധാനത്തെ പൂര്‍ണമായും വീണ്ടെടുക്കാന്‍ അനുവദിക്കുന്നതിന് എല്ലാ മൂന്നാം ലോക രാജ്യങ്ങളില്‍ നിന്നുമുള്ള കുടിയേറ്റം ഞാന്‍ ശാശ്വതമായി നിര്‍ത്തുമെന്നാണ് ട്രംപ് സോഷ്യല്‍ മീഡിയയിലൂടെ അറിയിച്ചത്.
തന്റെ മുന്‍ഗാമിയായ ജോ ബൈഡന്റെ കാലത്ത് അനുവദിച്ച ദശലക്ഷക്കണക്കിന് അംഗീകൃത കുടിയേറ്റ അപേക്ഷകള്‍ റദ്ദാക്കുമെന്നും അമേരിക്കക്ക് അധിക മൂല്യം കൊണ്ടുവരാത്ത ആരെയും നാടുകടത്തുമെന്നും ട്രംപ് ഭീഷണി മുഴക്കി.
12 ലേറെ രാജ്യങ്ങളില്‍ നിന്നുള്ളവര്‍ക്ക് അനുവദിച്ച മുഴുവന്‍ ഗ്രീന്‍ കാര്‍ഡുകളും പുനഃപരിശോധിക്കുമെന്ന് ട്രംപ് ഭരണകൂടം അറിയിച്ചു. ആശങ്കാജനകമായ എല്ലാ രാജ്യങ്ങളില്‍ നിന്നുമുള്ള ഓരോ വിദേശിക്കും ഗ്രീന്‍ കാര്‍ഡ് (സ്ഥിരതാമസ) അനുവദിച്ച കേസുകള്‍ സമഗ്രമായി പരിശോധിക്കാന്‍ താന്‍ നിര്‍ദേശിച്ചതായി ഇമിഗ്രേഷന്‍ ആന്റ് കസ്റ്റംസ് എന്‍ഫോഴ്സ്മെന്റ് ഡയറക്ടര്‍ ജോസഫ് എഡ്ലോ എക്സ് പ്ലാറ്റ്ഫോമില്‍ വ്യക്തമാക്കി. അഫ്ഗാനിസ്ഥാന്‍ ഉള്‍പ്പെടെ 19 രാജ്യങ്ങളെ ആശങ്കാജനകമായ രാജ്യങ്ങളായി പ്രസിഡന്റ് ഡൊണാള്‍ഡ് ട്രംപ് നേരത്തെ പ്രഖ്യാപിച്ചിരുന്നു.