തിരുവനന്തപുരം– തിരുവനന്തപുരം വിമാനത്താവളത്തിൽ ടീം ഇന്ത്യ വന്നിറങ്ങിയപ്പോൾ ആരാധകരുടെ മനം കവർന്നത് നായകൻ സൂര്യകുമാർ യാദവിന്റെ തമാശകളാണ്. സ്വന്തം നാട്ടുകാരനായ സഞ്ജു സാംസണ് വലിയ സ്വീകരണം ഒരുങ്ങുന്നത് കണ്ട്, തമാശരൂപേണ സഞ്ജുവിന് വഴിയൊരുക്കി ‘ബോഡിഗാർഡ്’ ആവുകയായിരുന്നു സൂര്യ.
“ഡോണ്ട് ഡിസ്റ്റർബ് ചേട്ടാ, വഴിമാറി നിൽക്കൂ” എന്ന് തമാശ പറഞ്ഞ് സഞ്ജുവിന് മുന്നിലായി നീങ്ങുന്ന സൂര്യയുടെ വീഡിയോ ബിസിസിഐ ആണ് പങ്കുവെച്ചത്. നായകന്റെ തമാശ കേട്ട് ചിരിയടക്കാൻ പാടുപെടുന്ന സഞ്ജുവിനെയും വീഡിയോയിൽ കാണാം. വിമാനത്താവളത്തിന് പുറത്ത് ആയിരക്കണക്കിന് ആരാധകരാണ് സഞ്ജുവിനായി കാത്തുനിന്നത്.
ന്യൂസീലൻഡിനെതിരായ അഞ്ചാം ടി20 മത്സരത്തിനായാണ് ടീം ഇന്ത്യ തലസ്ഥാനത്തെത്തിയത്. ശനിയാഴ്ച വൈകിട്ട് ഏഴിന് കാര്യവട്ടം ഗ്രീൻഫീൽഡ് സ്റ്റേഡിയത്തിലാണ് മത്സരം. പരമ്പരയിലെ ആദ്യ നാല് മത്സരങ്ങളിൽ വലിയ സ്കോർ കണ്ടെത്താൻ പ്രയാസപ്പെട്ട സഞ്ജുവിന്, സ്വന്തം തട്ടകത്തിൽ ബാറ്റിംഗ് വിസ്ഫോടനം നടത്താൻ കഴിയുമെന്ന പ്രതീക്ഷയിലാണ് മലയാളി ക്രിക്കറ്റ് ആരാധകർ.