ബോസ്റ്റൺ– ലോക ഫുട്ബോളിലെ ചിരവൈരികളായ ബ്രസീലും ഫ്രാൻസും നീണ്ട 11 വർഷത്തെ ഇടവേളയ്ക്ക് ശേഷം ഇന്ന് വീണ്ടും മുഖാമുഖം വരുന്നു. ബോസ്റ്റണിലെ ഗില്ലറ്റ് സ്റ്റേഡിയത്തിൽ ഇന്ത്യൻ സമയം പുലർച്ചെ ഒന്നരയ്ക്കാണ് ഈ വമ്പൻ പോരാട്ടം. മൂന്ന് മാസങ്ങൾക്ക് ശേഷം നടക്കാനിരിക്കുന്ന ഫിഫ ലോകകപ്പിന് മുന്നോടിയായുള്ള ഏറ്റവും വലിയ പരീക്ഷണമായാണ് ഫുട്ബോൾ ലോകം ഈ സൗഹൃദ മത്സരത്തെ ഉറ്റുനോക്കുന്നത്.
കിലിയൻ എംബാപ്പേ എന്ന അത്ഭുത താരത്തിന്റെ നേതൃത്വത്തിൽ എത്തുന്ന ഫ്രഞ്ച് പടയെ തളയ്ക്കാൻ കാർലോ ആഞ്ചലോട്ടിയുടെ ബ്രസീലിന് സാധിക്കുമോ എന്നതാണ് പ്രധാന ചോദ്യം. ലോകകപ്പ് യോഗ്യതാ റൗണ്ടിൽ അഞ്ചാം സ്ഥാനത്തേക്ക് പിന്തള്ളപ്പെട്ട ബ്രസീലിന് ആരാധകരുടെ വിശ്വാസം വീണ്ടെടുക്കാൻ ഇന്നത്തെ വിജയം അനിവാര്യമാണ്. ആഞ്ചലോട്ടി പരിശീലകനായി ചുമതലയേറ്റിട്ടും മഞ്ഞപ്പടയുടെ കളിശൈലിയിൽ കാര്യമായ പുരോഗതിയില്ലാത്തത് വിമർശകർ ആയുധമാക്കുന്നുണ്ട്. അതിനാൽ തന്നെ ലോകകപ്പിന് മുൻപുള്ള ആഞ്ചലോട്ടിയുടെ തന്ത്രങ്ങളുടെ വലിയൊരു പരീക്ഷണം കൂടിയാകും ബോസ്റ്റണിൽ നടക്കുക.
സൂപ്പർ താരം നെയ്മർ ക്ലബ്ബിനുവേണ്ടി മികച്ച പ്രകടനം കാഴ്ചവെച്ചിട്ടും ടീമിൽ ഉൾപ്പെടുത്താത്ത നെതിരെ ആരാധകർ ഏറെ വിമർശനം ഉയർത്തിയിരുന്നു. എങ്കിലും വിനീഷ്യസ് ജൂനിയർ, റാഫിൻഹ, കുൻഹ എന്നിവരെല്ലാം അടങ്ങുന്ന അറ്റാക്കിങ് വളരെ മികച്ചതാണ്. പരുക്ക് പറ്റി പുറത്തായ ഗോൾകീപ്പർ അലിസൺ ബക്കറിന്റെ അഭാവം തിരിച്ചടിയാകാൻ സാധ്യതയുണ്ട്.
മുറുവശത്തേക്ക് നോക്കുമ്പോൾ സൂപ്പർതാരം കിലിയൻ എംബാപ്പ തന്നെയാണ് വജ്രായുധം. കൂടെ ടോലിസെ, ഒസ്മാൻ ഡെംബെലെ, ര്യാൻ ചേർക്കി, കന്റെ എന്നിവരെല്ലാം ചേരുമ്പോൾ ബ്രസീൽ പ്രതിരോധനിര ഒന്ന് വിയർക്കും.
കണക്കുകൾ പരിശോധിച്ചാൽ 2015-ൽ അവസാനമായി ഏറ്റുമുട്ടിയപ്പോൾ 3-1 ന് ബ്രസീലിനായിരുന്നു വിജയം. എന്നാൽ അന്നത്തെ ബ്രസീലല്ല ഇന്നത്തേത്. നിലവിൽ ഫിഫ റാങ്കിംഗിലും ഫോമിലും ഫ്രാൻസിനാണ് മുൻതൂക്കം. ലോകകപ്പ് കിരീടം സ്വപ്നം കാണുന്ന ഇരു രാജ്യങ്ങൾക്കും തങ്ങളുടെ കരുത്ത് അളക്കാനുള്ള സുവർണ്ണാവസരമാണിത്. ബോസ്റ്റണിലെ പുൽമൈതാനത്ത് ലാറ്റിൻ അമേരിക്കൻ മാജിക്കും യൂറോപ്യൻ പവറും ഏറ്റുമുട്ടുമ്പോൾ കായിക ലോകത്ത് ആവേശം വാനോളമാണ്.