വാഷിംഗ്ടണ് – അമേരിക്കയെ ആക്രമിക്കാന് കഴിയുന്ന മിസൈലുകള് വികസിപ്പിക്കാന് ഇറാന് ശ്രമിക്കുകയാണെന്ന് യു.എസ് പ്രസിഡന്റ് ഡൊണാള്ഡ് ട്രംപ് അവകാശപ്പെട്ടു. കഴിഞ്ഞ വര്ഷം അമേരിക്കന് ആക്രമണങ്ങളില് തകര്ന്ന ആണവ പദ്ധതി പുനര്നിര്മ്മിക്കാനും ഇറാന് പ്രവര്ത്തിക്കുന്നതായി ട്രംപ് ആരോപിച്ചു. ഇറാന്റെ ആണവ പദ്ധതിയെ കുറിച്ചും മിസൈലുകള് ഉള്പ്പെടെയുള്ള മറ്റ് വിഷയങ്ങളെ കുറിച്ചും അമേരിക്കയും ഇറാനും ഉന്നതതല ചര്ച്ചകളില് ഏര്പ്പെട്ടിരിക്കുകയാണ്. താന് നയതന്ത്രമാണ് ഇഷ്ടപ്പെടുന്നതെന്നും എന്നാല് ചര്ച്ചകള് പരാജയപ്പെട്ടാല് ബലപ്രയോഗം നടത്താന് തയ്യാറാണെന്നും ട്രംപ് പറഞ്ഞു.
യൂറോപ്പിനെയും വിദേശത്തുള്ള നമ്മുടെ താവളങ്ങളെയും ഭീഷണിപ്പെടുത്താന് കഴിയുന്ന മിസൈലുകള് അവര് ഇതിനകം വികസിപ്പിച്ചിട്ടുണ്ട്. ഉടന് തന്നെ അമേരിക്കയിലേക്ക് എത്തുന്ന മിസൈലുകള് നിര്മ്മിക്കാന് അവര് പ്രവര്ത്തിക്കുന്നു – ട്രംപ് തന്റെ സ്റ്റേറ്റ് ഓഫ് ദി യൂണിയന് പ്രസംഗത്തില് പറഞ്ഞു. 2035 ഓടെ ഇറാന് സൈനികമായി പ്രായോഗികമായ ഭൂഖണ്ഡാന്തര ബാലിസ്റ്റിക് മിസൈല് വികസിപ്പിക്കാന് കഴിയുമെന്ന് യുഎസ് പ്രതിരോധ ഇന്റലിജന്സ് ഏജന്സി 2025 ല് പറഞ്ഞു. യു.എസ് കോണ്ഗ്രസ്ഷണല് റിസര്ച്ച് സര്വീസ് പ്രകാരം, ഇറാന്റെ പക്കല് നിലവില് 1,850 മൈല് (3,000 കിലോമീറ്റര്) വരെ ദൂരപരിധിയുള്ള ഹ്രസ്വ, ഇടത്തരം ബാലിസ്റ്റിക് മിസൈലുകള് ഉണ്ട്. ഇറാന്റെ പടിഞ്ഞാറേ അറ്റത്തു നിന്ന് 6,000 മൈലിലധികം അകലെയാണ് അമേരിക്ക. ട്രംപ് തന്റെ ആദ്യ ഭരണകാലത്ത് കീറിക്കളഞ്ഞ കരാറിന് പകരമായി ഇറാന് ആണവ പദ്ധതിയുമായി ബന്ധപ്പെട്ട് പുതിയ കരാറിലെത്താന് ലക്ഷ്യമിട്ടുള്ള രണ്ട് റൗണ്ട് ചര്ച്ചകള് അമേരിക്കയും ഇറാനും ഇതിനകം പൂര്ത്തിയാക്കി.
ഇറാന് യുറേനിയം സമ്പുഷ്ടീകരണം പൂര്ണമായും അവസാനിപ്പിക്കണമെന്ന് അമേരിക്ക ആവര്ത്തിച്ച് ആവശ്യപ്പെട്ടിട്ടുണ്ട്. ഇറാന്റെ ബാലിസ്റ്റിക് മിസൈല് പദ്ധതിയും മേഖലയിലെ സായുധ ഗ്രൂപ്പുകള്ക്കുള്ള പിന്തുണയും പരിഹരിക്കാനും ശ്രമിച്ചിട്ടുണ്ട്. എന്നാല് ഈ ആവശ്യങ്ങള് ഇറാന് നിരസിക്കുന്നു. ആണവായുധങ്ങള് സ്വന്തമാക്കാന് ശ്രമിക്കുന്നുണ്ടെന്ന വാദങ്ങള് ഇറാന് ആവര്ത്തിച്ച് തള്ളിക്കളഞ്ഞിട്ടുണ്ട്. കഴിഞ്ഞ വര്ഷം മൂന്ന് ഇറാന് ആണവ കേന്ദ്രങ്ങളില് ആക്രമണം നടത്താന് ട്രംപ് ഉത്തരവിട്ടു. തുടര്ന്ന് ഇറാന്റെ ആണവ പദ്ധതി ഇല്ലാതാക്കിയെന്ന് അവകാശപ്പെട്ടു. ഇറാന് വീണ്ടും എല്ലാം ആരംഭിക്കാന് ആഗ്രഹിക്കുന്നതായും ഈ നിമിഷത്തില് വീണ്ടും അവരുടെ ദുഷ്ട ആണവ അഭിലാഷങ്ങള് പിന്തുടരുകയാണെന്നും ചൊവ്വാഴ്ച ട്രംപ് പറഞ്ഞു.
ട്രംപ് മിഡില് ഈസ്റ്റിലേക്ക് വലിയ യു.എസ് സൈനിക സേനയെ അയച്ചിട്ടുണ്ട്. രണ്ട് വിമാനവാഹിനിക്കപ്പലുകളും ഒരു ഡസനിലധികം മറ്റ് കപ്പലുകളും നിരവധി യുദ്ധവിമാനങ്ങളും മറ്റ് സൈനിക ആസ്തികളും മേഖലയിയില് വിന്യസിച്ചിട്ടുണ്ട്. പുതിയ കരാറിലെത്തുന്നതില് ചര്ച്ചകള് പരാജയപ്പെട്ടാല് ഇറാനെ ആക്രമിക്കുമെന്ന് ട്രംപ് ആവര്ത്തിച്ച് ഭീഷണി മുഴക്കിയിട്ടുണ്ട്. ഇറാനും അമേരിക്കയും തമ്മിലുള്ള മൂന്നാം റൗണ്ട് ചര്ച്ചകള് വ്യാഴാഴ്ച ജനീവയില് നടക്കും. നയതന്ത്രത്തിലൂടെ ഈ പ്രശ്നം പരിഹരിക്കാനാണ് താന് മുന്ഗണന നല്കുന്നത്. പക്ഷേ ഒരു കാര്യം ഉറപ്പാണ്. ലോകത്തിലെ ഏറ്റവും വലിയ ഭീകരതയെ സ്പോണ്സര് ചെയ്യുന്ന രാജ്യത്തെ ആണവായുധം കൈവശം വെക്കാന് ഞാന് ഒരിക്കലും അനുവദിക്കില്ല – ട്രംപ് പറഞ്ഞു.