ജിദ്ദ- സൗദി അറേബ്യയും റഷ്യയും തമ്മിലുള്ള നയതന്ത്ര ബന്ധം ശക്തമാക്കുന്നതിന്റെ ഭാഗമായി ഇരു രാജ്യങ്ങളിലെയും പൗരന്മാർക്കുള്ള പരസ്പര വിസ ഇളവ് കരാർ ഇന്ന് മുതൽ നിലവിൽ വന്നു. ഇരു രാജ്യങ്ങൾക്കുമിടയിൽ ടൂറിസം, ബിസിനസ്, സാംസ്കാരിക വിനിമയം എന്നിവ വർദ്ധിപ്പിക്കുക എന്ന ലക്ഷ്യത്തോടെയാണ് ഈ സുപ്രധാന തീരുമാനം. നയതന്ത്ര പാസ്പോർട്ടുകൾക്കും സ്പെഷ്യൽ പാസ്പോർട്ടുകൾക്കും പുറമെ സാധാരണ പാസ്പോർട്ടുകൾ ഉള്ളവർക്കും ഈ ഇളവ് ബാധകമാണ്. സാധാരണ പാസ്പോർട്ട് ഉടമകളെ ഉൾപ്പെടുത്തി സൗദി അറേബ്യ ഇത്തരമൊരു കരാറിൽ ഒപ്പിടുന്ന ആദ്യ രാജ്യമാണ് റഷ്യ എന്നത് ഈ തീരുമാനത്തിന്റെ പ്രാധാന്യം വർദ്ധിപ്പിക്കുന്നു.
പുതിയ കരാർ പ്രകാരം സൗദി പൗരന്മാർക്ക് റഷ്യയിലേക്കും റഷ്യൻ പൗരന്മാർക്ക് സൗദി അറേബ്യയിലേക്കും വിസയില്ലാതെ യാത്ര ചെയ്യാം. ടൂറിസം, ബിസിനസ് ആവശ്യങ്ങൾക്കും സുഹൃത്തുക്കളെയും ബന്ധുക്കളെയും സന്ദർശിക്കാനും ഈ സൗകര്യം പ്രയോജനപ്പെടുത്താം. ഒരു വർഷത്തിനിടയിൽ തുടർച്ചയായോ അല്ലാതെയോ 90 ദിവസം വരെ വിസയില്ലാതെ ഇരു രാജ്യങ്ങളിലും താമസിക്കാൻ പൗരന്മാർക്ക് അനുവാദമുണ്ടാകും. എന്നാൽ ജോലി, പഠനം, താമസം (Residence), ഹജ്ജ് കർമ്മം എന്നിവയ്ക്കായി എത്തുന്നവർക്ക് ഈ ഇളവ് ബാധകമല്ല. ഇവർ നിലവിലുള്ള നിയമപ്രകാരം പ്രത്യേക വിസകൾ തന്നെ എടുക്കേണ്ടതുണ്ട്.
സൗദി അറേബ്യയും റഷ്യയും തമ്മിലുള്ള നയതന്ത്ര ബന്ധത്തിന്റെ നൂറാം വാർഷിക ആഘോഷങ്ങളുടെ ഭാഗമായാണ് ഈ കരാർ നടപ്പിലാക്കുന്നത്. വിനോദസഞ്ചാര മേഖലയിലും സാമ്പത്തിക-സാംസ്കാരിക രംഗങ്ങളിലും കൂടുതൽ സഹകരണം ഉറപ്പാക്കാൻ ഈ നീക്കം സഹായിക്കും. ഇരു രാജ്യങ്ങളിലെയും ജനങ്ങൾ തമ്മിലുള്ള സമ്പർക്കം വർദ്ധിപ്പിക്കാനും വിവിധ മേഖലകളിൽ പുതിയ പങ്കാളിത്തങ്ങൾ വളർത്തിയെടുക്കാനും ഈ വിസ ഇളവ് വലിയ മുതൽക്കൂട്ടാകുമെന്ന് അധികൃതർ പ്രത്യാശ പ്രകടിപ്പിച്ചു.