റിയാദ് – റിയാദ് മെട്രോ പദ്ധതിയില്‍ ഇന്ന് സര്‍വീസ് ആരംഭിച്ച റെഡ് ലൈനില്‍ ജോലി സ്ഥലത്തേക്ക് യാത്ര ചെയ്ത് വിദ്യാഭ്യാസ മന്ത്രി യൂസുഫ് അല്‍ബുനയ്യാന്‍. റെഡ് ലൈനില്‍ കിംഗ് സൗദ് യൂനിവേഴ്‌സിറ്റി സ്റ്റേഷനില്‍ നിന്ന് വിദ്യാഭ്യാസ മന്ത്രാലയ ആസ്ഥാനത്തിനു സമീപത്തെ സ്റ്റേഷനിലേക്കാണ് മന്ത്രി യാത്ര ചെയ്തത്. ജനറല്‍ ഓര്‍ഗനൈസേഷന്‍ ഫോര്‍ സോഷ്യല്‍ ഇന്‍ഷുറന്‍സ് (ഗോസി) ഗവര്‍ണര്‍ അബ്ദുല്‍ അസീസ് അല്‍ബൂഖ് ഗ്രീന്‍ ലൈനിലും യാത്ര ചെയ്തു. ഇന്ന് സര്‍വീസ് ആരംഭിച്ച ഗ്രീന്‍ ലൈനില്‍ വിദ്യാഭ്യാസ മന്ത്രാലയ ആസ്ഥാനത്തിനു സമീപത്തെ സ്റ്റേഷനില്‍ നിന്ന് ഗോസി ആസ്ഥാനത്തിനു സമീപത്തെ സ്റ്റേഷനിലേക്കാണ് അബ്ദുല്‍ അസീസ് അല്‍ബൂഖ് യാത്ര ചെയ്തത്.
റിയാദ് മെട്രോയിലെ അബ്ദുല്ല റോഡ് (റെഡ് ലൈന്‍), കിംഗ് അബ്ദുല്‍ അസീസ് റോഡ് (ഗ്രീന്‍ ലൈന്‍) എന്നീ രണ്ടു റൂട്ടുകളില്‍ ഇന്ന് രാവിലെ മുതലാണ് സര്‍വീസുകള്‍ ആരംഭിച്ചത്. കിംഗ് സൗദ് യൂനിവേഴ്‌സിറ്റി മുതല്‍ കിംഗ് ഫഹദ് സ്‌പോര്‍ട്‌സ് സിറ്റി വരെ കിംഗ് അബ്ദുല്ല റോഡിലൂടെ 25.3 കിലോമീറ്റര്‍ നീളത്തിലാണ് റെഡ് ലൈന്‍ നീണ്ടുകിടക്കുന്നത്. ഇശ്ബീലിയ, അല്‍ഖലീജ്, അല്‍ഹംറാ, ഖാലിദ് ബിന്‍ അല്‍വലീദ് റോഡ്, റിയാദ് എക്‌സിബിഷന്‍ സെന്റര്‍, അല്‍നുസ്ഹ, കിംഗ് അബ്ദുല്‍ അസീസ് റോഡ്, അല്‍വുറൂദ്, എസ്.ടി.സി, അല്‍തഖസ്സുസി, കിംഗ് അബ്ദുല്‍ അസീസ് സിറ്റി ഫോര്‍ സയന്‍സ് ആന്റ് ടെക്‌നോളജി, കിംഗ് സല്‍മാന്‍ ഒയാസിസ് എന്നീ പ്രദേശങ്ങളെ റെഡ് ലൈനില്‍ ബന്ധിപ്പിക്കുന്നു.
കിംഗ് അബ്ദുല്‍ അസീസ് റോഡിലൂടെയുള്ള ഗ്രീന്‍ ലൈന്‍ നാഷണല്‍ മ്യൂസിയത്തില്‍ നിന്ന് കിംഗ് അബ്ദുല്ല ഇന്റര്‍സെക്ഷനില്‍ വിദ്യാഭ്യാസ മന്ത്രാലയ ആസ്ഥാനം വരെ 12.9 കിലോമീറ്റര്‍ നീളത്തില്‍ നീണ്ടുകിടക്കുന്നു. കിംഗ് സല്‍മാന്‍ പാര്‍ക്ക്, സുലൈമാനിയ, അല്‍ദബാബ്, അബുദാബി സ്‌ക്വയര്‍, ഓഫീസേഴ്‌സ് ക്ലബ്ബ്, ജനറല്‍ ഓര്‍ഗനൈസേഷന്‍ ഫോര്‍ സേഷ്യല്‍ ഇന്‍ഷുറന്‍സ്, അല്‍വിസാറാത്ത്, പ്രതിരോധ മന്ത്രാലയം, കിംഗ് അബ്ദുല്‍ അസീസ് ആശുപത്രി, പുതിയ ധനമന്ത്രാലയ ആസ്ഥാനം എന്നീ പ്രദേശങ്ങളെ ഗ്രീന്‍ ലൈനില്‍ ബന്ധിപ്പിക്കുന്നു.
റിയാദ് മെട്രോയില്‍ മൂന്നു റൂട്ടുകളില്‍ ഈ മാസം ഒന്നിന് സര്‍വീസ് ആരംഭിച്ചിരുന്നു. ഒന്നാം ട്രാക്ക് ആയ ഉലയ്യ-ബത്ഹ (ബ്ലൂ ലൈന്‍), നാലാം ട്രാക്ക് ആയ കിംഗ് ഖാലിദ് എയര്‍പോര്‍ട്ട് (യെല്ലോ ലൈന്‍), ആറാം ട്രാക്ക് ആയ അബ്ദുറഹ്മാന്‍ ബിന്‍ ഔഫ് ജംഗ്ഷന്‍-ശൈഖ് ഹസന്‍ ബിന്‍ ഹുസൈന്‍ (വയലറ്റ് ലൈന്‍) എന്നീ റൂട്ടുകളിലാണ് ഡിസംബര്‍ ഒന്നു മുതല്‍ സര്‍വീസ് ആരംഭിച്ചത്. മദീന റോഡ് ജംഗ്ഷന്‍ (ഓറഞ്ച് ലൈന്‍) റൂട്ടില്‍ ജനുവരി അഞ്ചിന് സര്‍വീസിന് തുടക്കമാകും.