ജിദ്ദ – നഗരവാസികള്‍ക്കും സന്ദര്‍ശകര്‍ക്കും ഇനി വിനോദങ്ങളുടെ ആനന്ദ ലഹരിക്കാലം. ഈ വര്‍ഷത്തെ ജിദ്ദ സീസണിന്റെ ഭാഗമായ ഏതാനും പ്രധാന വിനോദ മേഖലകള്‍ ജിദ്ദ സീസണ്‍ മാനേജ്‌മെന്റ് തുറന്നു. സിറ്റി വാക്ക്, വാര്‍ണര്‍ ബ്രദേഴ്‌സ് ഡിസ്‌കവറി: സെലിബ്രേറ്റ് എവരി സ്‌റ്റോറി, ഇമാജിന്‍ മോനെറ്റ് എന്നീ മേഖലകളാണ് തുറന്നത്. ഇവിടങ്ങളിലേക്കുള്ള പ്രവേശന ടിക്കറ്റുകള്‍ സൗദി ഇവന്റ്‌സ് വെബ്‌സൈറ്റും സൗദിഇവന്റ്‌സ് ആപ്പും വഴി ബുക്ക് ചെയ്യാന്‍ സന്ദര്‍ശകര്‍ക്ക് സാധിക്കും.
ആറു സംവേദനാത്മക അനുഭവങ്ങള്‍, 30 ആക്ഷന്‍ ഗെയിമുകള്‍, 30 ലേറെ നൈപുണ്യ, ആര്‍ക്കേഡ് ഗെയിമുകള്‍, മൂന്നു അറബ് നാടകങ്ങളുടെ പ്രദര്‍ശനം എന്നിവ സിറ്റി വാക്ക് ഏരിയയില്‍ അടങ്ങിയിരിക്കുന്നു. കയ്‌റോ നൈറ്റ്‌സ്, ചൈന ടൗണ്‍ ഏരിയകള്‍, ബബ്ലി ലാന്‍ഡ്, ഹൊറര്‍ വില്ലേജ്, വണ്ടര്‍ വാള്‍, മെട്രോപോളിറ്റന്‍ ടൗണ്‍, ഫണ്‍ ലാന്‍ഡ്, കുട്ടികള്‍ക്കും ഫാമിലികള്‍ക്കുമുള്ള സംവേദനമാത്മക സാഹസിക ഏരിയയായ ജോയ്‌പ്ലെക്‌സ്, നദികള്‍ക്കിടയില്‍ വിശ്രമിക്കാനുള്ള കേന്ദ്രമായ പാര്‍ക്ക് തുടങ്ങിയ മേഖലകളും 80 ലേറെ റെസ്റ്റോറന്റുകളും കോഫി ഷോപ്പുകളും 60 ഷോപ്പിംഗ് സ്റ്റോറുകളും സിറ്റി വാക്ക് ഏരിയയിലുണ്ട്.
2,80,000 ചതുരശ്രമീറ്റര്‍ വിസ്തൃതിയുള്ള സ്ഥലത്ത് സജ്ജീകരിച്ച സിറ്റി വാക്ക് ഏരിയ ഓഗസ്റ്റ് 17 വരെ തുടരും. എട്ടു നൂതന ഉപമേഖലകള്‍ ഇതില്‍ ഉള്‍പ്പെടുന്നു. ഈജിപ്ത് നൈറ്റ്‌സ്, ചൈന ടൗണ്‍ ഏരിയകള്‍ ആദ്യമായാണ് സിറ്റി വാക്കില്‍ ഉള്‍പ്പെടുത്തുന്നത്.
വാര്‍ണര്‍ ബ്രദേഴ്‌സ് ഡിസ്‌കവറി: സെലിബ്രേറ്റ് എവരി സ്‌റ്റോറി സോണ്‍ ആദ്യമായാണ് സൗദിയില്‍ സംഘടിപ്പിക്കുന്നത്. ഏറ്റവും പ്രശസ്തമായ അന്താരാഷ്ട്ര കഥകളും കഥാപാത്രങ്ങളും ഒരുമിച്ച് കൊണ്ടുവരുന്ന ഗെയിമുകളുടെയും വിനോദ പരിപാടികളുടെയും ഒരു മിശ്രിതത്തിലൂടെ ഇത് സന്ദര്‍ശകരെ സ്വാഗതം ചെയ്യുന്നു. ആധുനിക സാങ്കേതികവിദ്യകളും നൂതനമായ രൂപകല്‍പനയും ഉപയോഗിച്ച് അന്താരാഷ്ട്ര കലാകാരന്മാര്‍ ക്ലോഡ് മോനെറ്റിന്റെ 200 പെയിന്റിംഗുകളുടെ ഏറ്റവും വലിയ ഇന്ററാക്ടീവ് എക്‌സിബിഷന്‍ ഇമാജിന്‍ മോനെറ്റ് ഏരിയയിലുണ്ട്.
യാച്ച് ക്ലബ്ബിന്റെ പ്രവേശന കവാടത്തില്‍ വൈകുന്നേരം അഞ്ചു മുതല്‍ പുലര്‍ച്ചെ പന്ത്രണ്ടു വരെ ഇവിടെ സന്ദര്‍ശകരെ സ്വീകരിക്കും. പ്രിന്‍സ് മാജിദ് പാര്‍ക്ക് ഏരിയ, അന്തര്‍ദേശീയ സംഗീത കച്ചേരികള്‍, സ്വകാര്യ മേഖലയുമായി സഹകരിച്ചുള്ള മറ്റു നിരവധി പരിപാടികള്‍ എന്നിവയും ജിദ്ദ സീസണില്‍ അടങ്ങിയിരിക്കുന്നു. വരും ദിവസങ്ങളില്‍ ഇന്‍ഡോര്‍ മൃഗശാലയും ജിദ്ദ ഹിസ്‌റ്റോറിക് ഏരിയയും പോലെ എല്ലാ പ്രായക്കാര്‍ക്കും ഗ്രൂപ്പുകള്‍ക്കും അനുയോജ്യമായ അദ്വിതീയ അനുഭവങ്ങളും രസകരമായ ഗെയിമുകളും പരിപാടികളും വാഗ്ദാനം ചെയ്യുന്ന പുതിയ വിനോദ മേഖലകളും ഓപ്പണ്‍ ഏരിയകളും തുറക്കുന്നതിന് ജിദ്ദ സീസണ്‍ സാക്ഷ്യം വഹിക്കും.