ബീജിംഗ്- അമേരിക്കയുമായും ഇസ്രായേലുമായും നിലനിൽക്കുന്ന തർക്കങ്ങളിൽ ന്യായവും സമഗ്രവുമായ ഒരു കരാർ മാത്രമേ ഇറാൻ അംഗീകരിക്കുകയുള്ളൂ എന്ന് ഇറാൻ വിദേശകാര്യ മന്ത്രി അബ്ബാസ് അറാഖ്ജി വ്യക്തമാക്കി. ചൈനീസ് വിദേശകാര്യ മന്ത്രി വാങ് യിയുമായി ബീജിംഗിൽ നടത്തിയ കൂടിക്കാഴ്ചയിലാണ് അദ്ദേഹം ഇറാന്റെ നിലപാട് അറിയിച്ചത്. ഇറാൻ നയതന്ത്ര പ്രതിനിധി സംഘത്തോടൊപ്പം ഇന്ന് രാവിലെയാണ് അദ്ദേഹം ചൈനയിലെത്തിയത്. 2026 ഫെബ്രുവരി 28-ന് യുദ്ധം പൊട്ടിപ്പുറപ്പെട്ടതിന് ശേഷം അറാഖ്ജി നടത്തുന്ന ആദ്യ ചൈനീസ് സന്ദർശനമാണിത്. ചൈന ഇറാന്റെ ഉറ്റ സുഹൃത്താണെന്നും നിലവിലെ പ്രതിസന്ധികൾക്കിടയിലും ഇരുരാജ്യങ്ങളും തമ്മിലുള്ള സഹകരണം കൂടുതൽ ശക്തമാകുമെന്നും അദ്ദേഹം പറഞ്ഞു.
മേഖലയിലെ സംഘർഷം ലഘൂകരിക്കാൻ ചൈന സന്നദ്ധമാണെന്നും സാഹചര്യങ്ങൾ അതീവ ഗുരുതരമായതിനാൽ അമേരിക്കയും ഇറാനും തമ്മിൽ നേരിട്ടുള്ള ചർച്ചകൾ അനിവാര്യമാണെന്നും ചൈനീസ് വിദേശകാര്യ മന്ത്രി വാങ് യി പറഞ്ഞു. നിലവിൽ അമേരിക്കൻ ഉപരോധങ്ങളെ അവഗണിച്ച് ഇറാനിൽ നിന്ന് ഏറ്റവും കൂടുതൽ എണ്ണ ഇറക്കുമതി ചെയ്യുന്ന രാജ്യങ്ങളിലൊന്നാണ് ചൈന. ഉപരോധത്തിലൂടെ ഇറാനെ സാമ്പത്തികമായി തളർത്താൻ അമേരിക്ക ശ്രമിക്കുമ്പോഴും ചൈന നൽകുന്ന പിന്തുണ ഇറാന് വലിയ ആശ്വാസമാണ്. മെയ് 14, 15 തീയതികളിൽ യുഎസ് പ്രസിഡന്റ് ഡൊണാൾഡ് ട്രംപ് ചൈന സന്ദർശിക്കാനിരിക്കെ, ഇറാന്റെ ഭാഗത്തുനിന്നുള്ള ഈ നയതന്ത്ര നീക്കം ഏറെ പ്രാധാന്യമർഹിക്കുന്നു.
അതേസമയം, ഇറാൻ വിദേശകാര്യ മന്ത്രിക്ക് മേൽ സമ്മർദ്ദം ചെലുത്താൻ യുഎസ് സ്റ്റേറ്റ് സെക്രട്ടറി മാർക്കോ റൂബിയോ ചൈനയോട് ആവശ്യപ്പെട്ടു. ഹോർമുസ് കടലിടുക്കിലെ ഇറാന്റെ നടപടികൾ അവരെ അന്താരാഷ്ട്ര തലത്തിൽ ഒറ്റപ്പെടുത്തുകയാണെന്ന കാര്യം ചൈന അറാഖ്ജിയെ ബോധ്യപ്പെടുത്തണമെന്ന് അദ്ദേഹം പറഞ്ഞു. യുഎസ്-ഇറാൻ തർക്കത്തിൽ പൊതുവെ നിഷ്പക്ഷ നിലപാടാണ് ചൈന സ്വീകരിക്കുന്നതെങ്കിലും, ഇറാന്റെ പരമാധികാരത്തിന് മേലുള്ള കടന്നുകയറ്റങ്ങളെ അവർ എതിർത്തിട്ടുണ്ട്. ഹോർമുസ് കടലിടുക്കിലെ നിയന്ത്രണങ്ങൾ നീക്കാനും വെടിനിർത്തൽ കർശനമായി പാലിക്കാനും ചൈന ഇരുരാജ്യങ്ങളോടും ആവർത്തിച്ച് ആവശ്യപ്പെട്ടു.