ബഗ്ദാദ് – ബഗ്ദാദ് അന്താരാഷ്ട്ര വിമാനത്താവളത്തിന് സമീപമുള്ള അമേരിക്കന് സേനയെ പാര്പ്പിക്കുന്ന യു.എസ് വിക്ടോറിയ ബേസില് സ്ഫോടനങ്ങള് ഉണ്ടായതായും ബേസിന്റെ പ്രതിരോധ സംവിധാനം സജീവമാക്കിയതായും പ്രാദേശിക മാധ്യമങ്ങള് റിപ്പോര്ട്ട് ചെയ്തു. ഐക്യരാഷ്ട്രസഭയുടെ കെട്ടിടത്തിന് സമീപവും സുലൈമാനിയയിലെ യു.എസ് ഇന്റലിജന്സ് ആസ്ഥാനം ഉള്പ്പെടുന്ന പ്രദേശങ്ങളിലും ഡ്രോണുകള് തകര്ന്നുവീണതായും റിപ്പോര്ട്ടുണ്ട്.
ഇറാഖിലെ യു.എസ് എംബസിക്കു നേരെ പ്രൊജക്ടൈലുകള് ഉപയോഗിച്ച് ഭീകരാക്രമണം നടത്തിയവരെ അറസ്റ്റ് ചെയ്ത് പ്രോസിക്യൂട്ട് ചെയ്യാന് ഇറാഖ് സായുധ സേനാ കമാന്ഡര്-ഇന്-ചീഫ് പ്രധാനമന്ത്രി മുഹമ്മദ് ഷിയ അല്സൂദാനി ഉത്തരവിട്ടു. തെഹ്റാനില് റിഫൈനറി ലക്ഷ്യമിട്ടുണ്ടായ ആക്രമണത്തിന് തിരിച്ചടിയായി ഹൈഫയിലെ റിഫൈനറി ആക്രമിച്ചതായി ഇറാന് റെവല്യൂഷണറി ഗാര്ഡ് അറിയിച്ചു. ഹൈഫ പ്രദേശത്ത് സൈറണുകള് മുഴങ്ങി. പക്ഷേ നാശനഷ്ടങ്ങളൊന്നും ഇസ്രായില് റിപ്പോര്ട്ട് ചെയ്തിട്ടില്ല. റിഫൈനറികളും എണ്ണ സംഭരണികളും അടക്കം ഇറാനില് എണ്ണ വ്യവസായ കേന്ദ്രങ്ങള് ലക്ഷ്യമിട്ട് ഇസ്രായില് ഇന്നലെ വ്യാപകമായ ആക്രമണം നടത്തിയിരുന്നു. കുവൈത്ത് അന്താരാഷ്ട്ര വിമാനത്താവളത്തിലെ ഇന്ധന ടാങ്കുകള് ലക്ഷ്യമിട്ട് ഡ്രോണ് ആക്രമണം നടന്നതായി കുവൈത്ത് പ്രതിരോധ മന്ത്രാലയം ഇന്ന് പുലര്ച്ചെ അറിയിച്ചു.
സൗദിയിലും കുവൈത്തിലും ഖത്തറിലും യു.എ.ഇയിലും എണ്ണ, ഗ്യാസ് വ്യവസായ കേന്ദ്രങ്ങള് ലക്ഷ്യമിട്ട് ആക്രമണങ്ങള് നടത്താന് ഇറാന് ആവര്ത്തിച്ച് ശ്രമിച്ചിട്ടുണ്ട്. ഇറാന് ആക്രമണങ്ങളില് കാര്യമായ കേടുപാടുകള് സംഭവിച്ചതിനെ തുടര്ന്ന് ദ്രവീകൃത പ്രകൃതി വാതക ഉല്പ്പാദനം ഖത്തര് നിര്ത്തിവെച്ചിട്ടുണ്ട്. കുവൈത്തിലും എണ്ണയുല്പാദനം തടസ്സപ്പെട്ടിട്ടുണ്ട്. ഇടപാടുകാരുമായി നേരത്തെയുണ്ടാക്കിയ കരാറുകള് പ്രകാരം ഗ്യാസും എണ്ണയും വിതരണം ചെയ്യാന് കഴിയില്ലെന്ന് ഖത്തറും കുവൈത്തും അറിയിച്ചിട്ടുണ്ട്. ഹുര്മുസ് കടലിടുക്ക് വഴിയുള്ള എണ്ണ കയറ്റുമതിക്ക് തടസ്സം നേരിടുന്നതിനാല് സൗദി അറേബ്യ രാജ്യത്തിന്റെ കിഴക്കന് തീരത്തുള്ള ഗള്ഫ് ഉള്ക്കടല് വഴിയുള്ള എണ്ണ കയറ്റുമതി നിര്ത്തി, കയറ്റുമതി പടിഞ്ഞാറന് തീരത്തുള്ള ചെങ്കടലിലെ യാമ്പു തുറമുഖത്തേക്ക് താല്ക്കാലികമായി മാറ്റിയിട്ടുണ്ട്.