റാമല്ല– യുദ്ധത്തിന്റെ കരിനിഴല് മാഞ്ഞ വെസ്റ്റ് ബാങ്കിലെ ബെത്ലഹേം നഗരം രണ്ടു വര്ഷത്തെ നീണ്ട ഇടവേളയ്ക്ക് ശേഷം പകിട്ടേറിയ ക്രിസ്മസ് ആഘോഷങ്ങള്ക്ക് തുടക്കമായി. യേശുക്രിസ്തുവിന്റെ ജന്മസ്ഥലമെന്ന് വിശ്വസിക്കപ്പെടുന്ന ഇവിടെ, ഗാസ യുദ്ധത്തെത്തുടര്ന്ന് കഴിഞ്ഞ വര്ഷങ്ങളില് ആഘോഷങ്ങള് ഒഴിവാക്കിയിരുന്നു. എന്നാല് ഗാസയില് വെടിനിര്ത്തല് കരാര് നിലവില് വന്നതോടെ അതീവ ഊര്ജസ്വലമായാണ് ഇത്തവണ ബെത്ലഹേം ക്രിസ്മസിനെ വരവേറ്റത്. ബാഗ്പൈപ്പുകളുടെയും ഡ്രമ്മുകളുടെയും അകമ്പടിയോടെ നടന്ന സ്കൗട്ട് പരേഡുകള് നഗരവീഥികളെ ഉത്സവലഹരിയിലാക്കി. പ്രായഭേദമന്യേ നൂറുകണക്കിന് ആളുകളാണ് ക്രിസ്മസ് കരോള് ഗാനങ്ങളുമായി നഗരമധ്യത്തിലെ മാംഗര് സ്ക്വയറിലേക്കും സ്റ്റാര് സ്ട്രീറ്റിലൂടെ നേറ്റിവിറ്റി ചര്ച്ചിലേക്കും ഒഴുകിയെത്തിയത്. മാംഗര് സ്ക്വയറിന് മധ്യത്തില് ചുവപ്പും സ്വര്ണ്ണവും കൊണ്ട് അലങ്കരിച്ച ഭീമാകാരമായ ക്രിസ്മസ് മരം നഗരത്തിന്റെ പുനരുജ്ജീവനത്തിന്റെ പ്രതീകമായി മാറി. യുദ്ധം കാരണം നഷ്ടപ്പെട്ട സന്തോഷം തിരിച്ചുകിട്ടിയെന്നും ഈ ആഘോഷങ്ങള് തങ്ങളുടെ പാരമ്പര്യം കാത്തുസൂക്ഷിക്കാനുള്ള കരുത്തുനല്കുന്നുവെന്നും പ്രാദേശികവാസികള് പ്രതികരിച്ചു.
ജറൂസലമിലെ ലാറ്റിന് പാത്രിയാര്ക്കീസ് കര്ദ്ദിനാള് പിയര്ബാറ്റിസ്റ്റ പിസബല്ല ചര്ച്ച് ഓഫ് നേറ്റിവിറ്റിയില് പാതിരാ കുര്ബാനയ്ക്ക് നേതൃത്വം നല്കി. യുദ്ധം തകര്ത്ത ഗാസ സന്ദര്ശിച്ച് അവിടെ ക്രിസ്മസ് കുര്ബാന നടത്തിയ ശേഷമാണ് അദ്ദേഹം ബെത്ലഹേമിലെത്തിയത്. ഗാസയിലെ ജനങ്ങളുടെ പ്രാര്ത്ഥനകളും ആശംസകളും അദ്ദേഹം വിശ്വാസികളെ അറിയിച്ചു. മുമ്പ് ഗാസയിലെ സാഹചര്യം പരിഗണിച്ച് ആഘോഷങ്ങള് മതപരമായ ചടങ്ങുകളില് മാത്രം പരിമിതപ്പെടുത്തിയിരുന്ന മുനിസിപ്പാലിറ്റി, ഇത്തവണത്തെ വിപുലമായ ആഘോഷങ്ങള് ഗാസയിലെ ജനങ്ങള്ക്ക് പുതിയ ജീവിതം തുടങ്ങാനുള്ള പ്രതീക്ഷ നല്കുമെന്ന് പ്രത്യാശിച്ചു. വിനോദസഞ്ചാരത്തെ ആശ്രയിച്ചു കഴിയുന്ന ബെത്ലഹേമിലെ സമ്പദ്വ്യവസ്ഥയ്ക്കും ഈ ആഘോഷങ്ങളുടെ തിരിച്ചുവരവ് വലിയ ആശ്വാസമാണ് നല്കുന്നത്. യുദ്ധം മൂലം വിനോദസഞ്ചാരികളുടെ വരവ് കുറഞ്ഞതും തൊഴിലില്ലായ്മ വര്ധിച്ചതും നഗരത്തെ ബാധിച്ചിരുന്നുവെങ്കിലും, അടുത്ത മാസങ്ങളിലായി സന്ദര്ശകരുടെ എണ്ണത്തില് വര്ധനവുണ്ടാകുന്നത് ശുഭസൂചനയായി കാണുന്നു.
അതേസമയം, ഒക്ടോബര് 10 മുതല് വെടിനിര്ത്തല് നിലവിലുണ്ടെങ്കിലും ഗാസയിലെ സാധാരണക്കാരുടെ ജീവിതം ഇപ്പോഴും ദുരിതപൂര്ണ്ണമാണ്. വീടുകള് നഷ്ടപ്പെട്ട ലക്ഷക്കണക്കിന് ആളുകള് കൊടും തണുപ്പിനോട് പൊരുതുകയാണ്. അതിനിടെ, വത്തിക്കാനില് ലിയോ പതിനാലാമന് മാര്പ്പാപ്പ തന്റെ ആദ്യ ക്രിസ്മസ് കുര്ബാനയ്ക്ക് നേതൃത്വം നല്കി. ഫ്രാന്സിസ് മാര്പ്പാപ്പയുടെ വിയോഗത്തെത്തുടര്ന്ന് അധികാരമേറ്റ അമേരിക്കക്കാരനായ പുതിയ മാര്പ്പാപ്പ, ലോകമെമ്പാടും 24 മണിക്കൂര് സമാധാനം പാലിക്കണമെന്ന് ആഹ്വാനം ചെയ്തു. കുടിയേറ്റം, സാമൂഹിക നീതി തുടങ്ങിയ വിഷയങ്ങളില് ഫ്രാന്സിസ് മാര്പ്പാപ്പയുടെ നിലപാടുകള് പിന്തുടരുമ്പോഴും തന്റേതായ ശാന്തമായ ശൈലിയിലൂടെ അദ്ദേഹം ശ്രദ്ധേയനാവുകയാണ്. വിശുദ്ധ നാട്ടിലെ ക്രിസ്ത്യന് ന്യൂനപക്ഷങ്ങള്ക്ക് ഈ ക്രിസ്മസ് കാലം അതിജീവനത്തിന്റെയും പ്രത്യാശയുടെയും വലിയൊരു സന്ദേശമാണ് ലോകത്തിന് നല്കുന്നത്.