ബ്രിട്ടീഷ് റാപ്പർ സെൻട്രൽ സി ഇസ്ലാം മതം സ്വീകരിച്ചു. 27 വയസ്സുള്ള താരം ഒരു ലൈവ് സ്ട്രീമിനിടെയാണ് താൻ ‘ശഹാദ’ ചൊല്ലി മുസ്ലിമായതായും പേര് മാറ്റിയതായും ഔദ്യോഗികമായി വെളിപ്പെടുത്തിയത്. ഓക്ലി നീൽ സീസർ-സു (Oakley Neil Caesar-Su) എന്ന തന്റെ യഥാർത്ഥ പേര് മാറ്റി ‘അഖീൽ’ (Aqeel) എന്ന പേര് അദ്ദേഹം സ്വീകരിച്ചു. ലൈവ് സ്ട്രീമിൽ സുഹൃത്തുക്കൾ അദ്ദേഹത്തെ അഭിനന്ദിച്ചുവെങ്കിലും, ഈ മതപരിവർത്തനത്തെക്കുറിച്ച് കൂടുതൽ വിശദീകരണങ്ങൾ നൽകാൻ അദ്ദേഹം തയ്യാറായില്ല, മറിച്ച് ഇതൊരു വ്യക്തിപരമായ തീരുമാനമായാണ് അദ്ദേഹം അവതരിപ്പിച്ചത്.
മുൻപ് തന്റെ വിശ്വാസങ്ങളെക്കുറിച്ച് പരസ്യമായി സംസാരിച്ചിരുന്നില്ലെങ്കിലും, സോഷ്യൽ മീഡിയയിൽ അറബിക് ക്യാപ്ഷനുകൾ ഉപയോഗിച്ചിരുന്നത് ആരാധകർക്കിടയിൽ നേരത്തെ തന്നെ ഇത്തരം ഊഹാപോഹങ്ങൾക്ക് വഴിവെച്ചിരുന്നു. ലണ്ടനിൽ ജനിച്ച് 2014-ൽ സംഗീതരംഗത്തേക്ക് എത്തിയ സെൻട്രൽ സി, യുകെ ഡ്രിൽ (UK Drill), റാപ് വിഭാഗങ്ങളിൽ ആഗോളതലത്തിൽ ശ്രദ്ധേയനാണ്. 2024-ൽ ഏറ്റവും കൂടുതൽ സ്ട്രീം ചെയ്യപ്പെട്ട യുകെ റാപ്പർ എന്ന ഖ്യാതിയുള്ള താരം, ബില്ല്ബോർഡ് ചാർട്ടുകളിൽ അടക്കം വൻ നേട്ടങ്ങൾ സ്വന്തമാക്കിയിട്ടുണ്ട്. വളരെ ലളിതമായ രീതിയിൽ തന്റെ മാറ്റം ലോകത്തെ അറിയിച്ച സെൻട്രൽ സിയെ മുസ്ലിം സമൂഹത്തിലെ പലരും പ്രശംസകളോടെയാണ് സ്വീകരിച്ചിരിക്കുന്നത്.