തിരുവനന്തപുരം– കോൺഗ്രസ് എംഎൽഎ രാഹുൽ മാങ്കൂട്ടത്തിലിനെതിരെ യൂത്ത് കോൺഗ്രസിലെ പ്രതിഷേധം ശക്തം. സംസ്ഥാന ജനറൽ സെക്രട്ടറിയും വനിതാ നേതാവുമായ സജ്ന ബി. സാജൻ ഹൈക്കമാൻഡിനും പ്രിയങ്കാ ഗാന്ധിക്കും പരാതി നൽകി.
എഐസിസി അധ്യക്ഷൻ മല്ലികാർജുൻ ഖാർഗെ, ജനറൽ സെക്രട്ടറി കെ.സി. വേണുഗോപാൽ, ലോക്സഭാ പ്രതിപക്ഷ നേതാവ് രാഹുൽ ഗാന്ധി, എംപി പ്രിയങ്കാ ഗാന്ധി എന്നിവർക്കാണ് സജ്ന പരാതി കൈമാറിയത്.
“രാഹുലിനെതിരായ ഗുരുതര ആരോപണങ്ങൾ പാർട്ടി ദേശീയതലത്തിൽ അന്വേഷിക്കണം. ദേശീയ വനിതാ നേതാക്കളെ ഉൾപ്പെടുത്തിയ പ്രത്യേക അന്വേഷണ കമ്മിഷനെ നിയോഗിക്കണം. ഇരകളായ യുവതികളെ നേരിട്ട് കണ്ട് മൊഴിയെടുക്കണം” എന്നതാണ് പരാതിയിലെ പ്രധാന ആവശ്യം. സ്ത്രീപക്ഷ രാഷ്ട്രീയത്തിൽ ഇരട്ടത്താപ്പ് ആരോപിക്കപ്പെടുന്ന സാഹചര്യത്തിൽ ഈ വിഷയം ഗൗരവമായി കൈകാര്യം ചെയ്തില്ലെങ്കിൽ പാർട്ടിയുടെ വിശ്വാസ്യതയെ ബാധിക്കുമെന്നും സജ്ന ചൂണ്ടിക്കാട്ടി.
കഴിഞ്ഞ ദിവസം തന്നെ സജ്ന ഫേസ്ബുക്ക് കുറിപ്പിലൂടെ രാഹുലിനെ പാർട്ടി പ്രാഥമിക അംഗത്വത്തിൽനിന്ന് പുറത്താക്കണമെന്ന് ആവശ്യപ്പെട്ടിരുന്നു. നേരത്തേയും എഐസിസിക്ക് സമാന പരാതികൾ ലഭിച്ചിരുന്നതായാണ് വിവരം.
മുൻ കെപിസിസി പ്രസിഡന്റ് കെ. സുധാകരൻ രാഹുലിനെ പരസ്യമായി പിന്തുണച്ചപ്പോൾ, രമേശ് ചെന്നിത്തലയും കെ. മുരളീധരനും അത് ശക്തമായി എതിർത്തു. രാഹുൽ സസ്പെൻഷനിലാണെന്നും പാർട്ടി നേതാക്കൾക്കൊപ്പം വേദി പങ്കിടാനാകില്ലെന്നുമാണ് കെ. മുരളീധരൻ പറഞ്ഞത്.
“എന്റെ നേതാക്കളായ സണ്ണി ജോസഫ്, രമേശ് ചെന്നിത്തല, കെ. സുധാകരൻ, കെ.സി. വേണുഗോപാൽ, വി.ഡി. സതീശൻ തുടങ്ങിയവർ പറഞ്ഞത് അനുസരിക്കുന്നുണ്ട്. സസ്പെൻഷൻ കാലത്ത് പാർട്ടി പരിപാടികളിൽ പങ്കെടുക്കുന്നില്ല. എന്നാൽ, എന്നെ നിയമസഭയിലേക്ക് വിജയിപ്പിക്കാൻ അദ്ധ്വാനിച്ച പ്രവർത്തകർക്കുവേണ്ടി തദ്ദേശ തെരഞ്ഞെടുപ്പ് പ്രചാരണത്തിൽ വീടുകയറി വോട്ടഭ്യർത്ഥിക്കുന്നത് തുടരും. പദവി ഉണ്ടെങ്കിലും ഇല്ലെങ്കിലും ഈ ശീലം ഉപേക്ഷിക്കില്ല.”രാഹുൽ മാങ്കൂട്ടത്തിൽ മാധ്യമങ്ങളോട് പറഞ്ഞു.
രാഹുലിനെതിരെ ഉയർന്ന ഗർഭഛിദ്രം ഉൾപ്പെടെയുള്ള ലൈംഗിക ആരോപണങ്ങളിൽ ക്രൈംബ്രാഞ്ച് ഇതുവരെ കേസെടുത്തിട്ടില്ല. ഇരയെന്ന് ആരോപിക്കപ്പെടുന്ന യുവതി രേഖാമൂലം പരാതി നൽകിയാൽ മാത്രമേ നിയമനടപടി സാധ്യമാകും. നേരത്തെ സ്വമേധയാ എടുത്ത “സ്ത്രീകളെ പിന്തുടർന്ന് ശല്യം ചെയ്യൽ” എന്ന കേസിൽ യുവതിയുടെ മൊഴിയെടുത്തിരുന്നെങ്കിലും രാഹുലിനെതിരെ ഔദ്യോഗിക പരാതി ഉയർന്നിട്ടില്ല. പുതിയ ശബ്ദരേഖകൾ പുറത്തുവന്ന സാഹചര്യത്തിൽ യുവതി മുന്നോട്ടുവരുമോയെന്നാണ് അന്വേഷണസംഘം ഉറ്റുനോക്കുന്നത്.
രാഹുൽ മാങ്കൂട്ടത്തിൽ വിവാദം കോൺഗ്രസിനകത്തും പുറത്തും രൂക്ഷമായി തുടരുകയാണ്. പാർട്ടി ഹൈക്കമാൻഡ് ഇക്കാര്യത്തിൽ എത്രയും പെട്ടെന്ന് തീരുമാനമെടുക്കുമോ എന്നതാണ് ഇനി ശ്രദ്ധാകേന്ദ്രം.