കണ്ണൂർ – യുവാവിനെ തട്ടിക്കൊണ്ടുപോയി ക്രൂരമായി അക്രമിച്ച് ബൈക്ക് കവർന്ന കേസിൽ രണ്ടുപേർ അറസ്റ്റിൽ. മാനന്തേരി ഞാലിലെ ഫസീല മൻസിലിൽ മിദ്ലാജിനെ തട്ടിക്കൊണ്ടുപോയി അക്രമിച്ച് കവർച്ച നടത്തിയ കേസിൽ കോളയാട് പുളിയുള്ളതിൽ ഹൗസിൽ പി.മുഹമ്മദ് റാഷിദ് (38), മാനന്തേരി ഞാലിൽ വാഴയിൽ ഹൗസിൽ വി.റാഷിർ (29) എന്നിവരെയാണ് കൂത്തുപറമ്പ് എ.സി.പി കെ.വി.വേണുഗോപാലിന്റെ നിർദേശ പ്രകാരം കണ്ണവം പോലീസ് അറസ്റ്റു ചെയ്തത്.
കഴിഞ്ഞ 25ന് രാത്രി 12.45 ഓടെയായിരുന്നു കേസിനാസ്പദമായ സംഭവം. ഒരു പെൺകുട്ടിയുടെ ഫോട്ടോ സമൂഹമാധ്യമങ്ങളിൽ പ്രചരിപ്പിച്ചതുമായി ബന്ധപ്പെട്ട തർക്കത്തിലാണ് മിദ്ലാജിനെ തട്ടിക്കൊണ്ടുപോയത്.
തലശേരി എരഞ്ഞോളി പാലത്തിൽ നിന്ന് ബലംപ്രയോഗിച്ച് കാറിൽ കയറ്റിക്കൊണ്ടുപോയി പലയിടത്തും കറങ്ങുന്നതിനിടയിൽ തന്നെ ക്രൂര മർദ്ദനത്തിനിരയാക്കുകയായിരുന്നു.
പിന്നീട് ചെറുവാഞ്ചേരിയിലെത്തിച്ച് വീണ്ടും ആക്രമിച്ചു. തുടർന്ന് മിദ്ലാജിൻ്റെ കെ എൽ 38 കെ 5812 ബൈക്കുമായി അക്രമികൾ സ്ഥലംവിടുകയായിരുന്നു. എട്ടംഗ സംഘമായിരുന്നു അക്രമത്തിന് പിറകിൽ. ഇതിൽ അഞ്ചുപേരെ പോലീസ് തിരിച്ചറിഞ്ഞു. ഇവർ നിരവധി കേസുകളിൽ പ്രതികളാണ്. അതിനാൽ സംഭവത്തിന് പിന്നിൽ ക്വട്ടേഷൻ ഇടപാടാണോയെന്ന സംശയവുമുയർന്നിട്ടുണ്ട്. അവശേഷിക്കുന്ന പ്രതികളെ പിടികൂടാൻ ഊർജിത അന്വേഷണം നടത്തുകയാണ്.