തിരുവനന്തപുരം: വരാനിരിക്കുന്ന നിയമസഭ തെരഞ്ഞെടുപ്പിൽ കോട്ടയം ജില്ലയിൽ യുഡിഎഫിനും ആലപ്പുഴയിൽ എൽഡിഎഫിനും മുൻതൂക്കമെന്ന് ‘ദ മലയാളം ന്യൂസ് – സിനർജി സ്ട്രാറ്റ്’ ഫീൽഡ് സർവേ. പ്രമുഖ ബിസിനസ് ആൻഡ് ഫിനാൻസ് കൺസൾട്ടിംഗ് സ്ഥാപനമായ സിനർജി സ്ട്രാറ്റുമായി സഹകരിച്ച് നടത്തിയ സർവേയുടെ അഞ്ചാം ഘട്ട ഫലങ്ങളാണ് ഇപ്പോൾ പുറത്തുവന്നിരിക്കുന്നത്.
- കോട്ടയം ജില്ല: യുഡിഎഫിന് വ്യക്തമായ മേൽക്കൈ
ജില്ലയിലെ ആകെയുള്ള 9 മണ്ഡലങ്ങളിൽ 6 ഇടത്ത് യുഡിഎഫും 3 ഇടത്ത് എൽഡിഎഫും വിജയിക്കുമെന്നാണ് സർവേ പ്രവചിക്കുന്നത്.
യുഡിഎഫ് വിജയിക്കാൻ സാധ്യതയുള്ള മണ്ഡലങ്ങൾ:
കോട്ടയം: ജില്ലയിലെ ഏറ്റവും ഉയർന്ന ഭൂരിപക്ഷം ഇവിടെയാണ് പ്രവചിക്കപ്പെടുന്നത് (21,000 വോട്ട്).
പുതുപ്പള്ളി: ഉമ്മൻചാണ്ടിയുടെ തട്ടകത്തിൽ 17,000 വോട്ടിന്റെ ഭൂരിപക്ഷത്തിൽ യുഡിഎഫ് ആധിപത്യം തുടരുമെന്നാണ് സർവേ ഫലം.
പാലാ: 17,000 വോട്ടിന് യുഡിഎഫ് പാലാ നിലനിർത്തുമെന്ന് സർവേ പറയുന്നു.
കടുത്തുരുത്തി: യുഡിഎഫ് കോട്ടയിൽ 7,000 വോട്ടിന്റെ ഭൂരിപക്ഷമാണ് പ്രവചിക്കുന്നത്.
ചങ്ങനാശേരി: ഇത്തവണയും വോട്ടുകൾ മാറിമറിയാൻ സാധ്യതയുള്ള ഇവിടെ 1,200 വോട്ടിന്റെ നേരിയ ഭൂരിപക്ഷത്തിൽ യുഡിഎഫ് ജയിക്കാം.
ഏറ്റുമാനൂർ: ശക്തമായ മത്സരത്തിനൊടുവിൽ 900 വോട്ടിന് യുഡിഎഫ് കടന്നുകൂടും.
എൽഡിഎഫ് വിജയിക്കാൻ സാധ്യതയുള്ള മണ്ഡലങ്ങൾ:
പൂഞ്ഞാർ: ത്രികോണ മത്സരം നടക്കുന്ന ഇവിടെ 11,000 വോട്ടിന് എൽഡിഎഫ് ജയിക്കുമെന്നാണ് പ്രവചനം.
കാഞ്ഞിരപ്പള്ളി: എൻഡിഎ സാന്നിധ്യം ശക്തമായ ഇവിടെ 9,000 വോട്ടിന് എൽഡിഎഫ് വിജയിക്കുമെന്നും സർവേ പ്രവചിക്കുന്നു.
വൈക്കം (SC): മണ്ഡലം നിലനിർത്താനുള്ള ശ്രമത്തിൽ 3,500 വോട്ടിന് എൽഡിഎഫ് ജയം പ്രവചിക്കപ്പെടുന്നു.
അന്തിമ വിശകലനം – കോട്ടയം:
കോട്ടയത്ത് യുഡിഎഫ് തരംഗം പ്രകടമാണെങ്കിലും ബിജെപിയുടെ വോട്ട് വിഹിതം നിർണ്ണായകമാകും. പൂഞ്ഞാറിൽ എൻഡിഎ 29% വോട്ട് വരെ നേടുമെന്ന സൂചന യുഡിഎഫിന് വലിയ തിരിച്ചടിയാണ്. ബിജെപി പിടിക്കുന്ന വോട്ടുകൾ പല മണ്ഡലങ്ങളിലും യുഡിഎഫിന്റെ ഭൂരിപക്ഷം കുറയ്ക്കാനോ എൽഡിഎഫിന് ഗുണകരമാകാനോ സാധ്യതയുണ്ട്. എന്നിരുന്നാലും ക്രൈസ്തവ വോട്ടുകളുടെ ഏകീകരണവും ഭരണവിരുദ്ധ വികാരവും ജില്ലയിൽ യുഡിഎഫിന് അനുകൂല ഘടകങ്ങളാണ്.
ആലപ്പുഴ ജില്ല: കോട്ട കാത്ത് ഇടതുമുന്നണി, തൊട്ടുപിറകിൽ യു.ഡി.എഫ്
ആലപ്പുഴയിൽ ഇടതുമുന്നണി തങ്ങളുടെ ആധിപത്യം തുടരുമെന്നാണ് സർവേ വ്യക്തമാക്കുന്നത്. ജില്ലയിലെ 9 മണ്ഡലങ്ങളിൽ 5 ഇടത്ത് എൽഡിഎഫും 4 ഇടത്ത് യുഡിഎഫും വിജയിക്കാനാണ് സാധ്യത.
എൽഡിഎഫ് വിജയിക്കാൻ സാധ്യതയുള്ള മണ്ഡലങ്ങൾ:
മാവേലിക്കര (SC): ജില്ലയിലെ ഏറ്റവും വലിയ ഭൂരിപക്ഷം ഇവിടെയാണ്. 28,000 വോട്ടിന് എൽഡിഎഫ് വിജയിക്കുമെന്നാണ് പ്രവചനം.
ചെങ്ങന്നൂർ: ശക്തമായ എൻഡിഎ സാന്നിധ്യമുണ്ടായിട്ടും 19,000 വോട്ടിന്റെ മികച്ച ഭൂരിപക്ഷത്തിൽ എൽഡിഎഫ് ജയിക്കുമെന്നും പ്രവചനമുണ്ട്.
ചേർത്തല: ഇടത് കോട്ടയിൽ 3,200 വോട്ടിന്റെ ഭൂരിപക്ഷമാണ് പ്രവചിക്കുന്നത്.
അരൂർ: കടുത്ത പോരാട്ടത്തിനൊടുവിൽ 2,000 വോട്ടിന് എൽഡിഎഫ് വിജയിക്കുമെന്നും സർവേ ഫലം വ്യക്തമാക്കുന്നു.
ആലപ്പുഴ: 1,500 വോട്ടിന്റെ ഭൂരിപക്ഷത്തിൽ എൽ.ഡി.എഫ് വിജയിക്കുമെന്നാണ് സർവേയിൽ വ്യക്തമാക്കുന്നത്.
യുഡിഎഫ് വിജയിക്കാൻ സാധ്യതയുള്ള മണ്ഡലങ്ങൾ:
ഹരിപ്പാട്: ജില്ലയിൽ യുഡിഎഫിന് ഏറ്റവും വലിയ ഭൂരിപക്ഷം ലഭിക്കുന്ന മണ്ഡലം. 20,000 വോട്ടിന് യുഡിഎഫ് ജയിച്ചേക്കും. അമ്പലപ്പുഴ: 5,000 വോട്ടിന്റെ ഭൂരിപക്ഷത്തിൽ യുഡിഎഫ് അട്ടിമറി വിജയം നേടിയേക്കാം. കുട്ടനാട്: 2,500 വോട്ടിന് യുഡിഎഫ് മുന്നിലെത്തുമെന്ന് പ്രവചനം.
കായംകുളം: 1,500 വോട്ടിന്റെ നേരിയ ഭൂരിപക്ഷത്തിൽ യുഡിഎഫിന് വിജയം പ്രവചിക്കുന്നു.
അന്തിമ വിശകലനം – ആലപ്പുഴ:
ആലപ്പുഴ ജില്ലയിൽ എൽഡിഎഫ് തങ്ങളുടെ ശക്തമായ സ്വാധീനം നിലനിർത്തുന്നുണ്ടെങ്കിലും പല മണ്ഡലങ്ങളിലും യുഡിഎഫ് അപ്രതീക്ഷിത കുതിപ്പ് നടത്തുന്നുണ്ട്.
ദ മലയാളം ന്യൂസ് ആദ്യത്തെ നാലു സർവേ ഫലങ്ങൾ
വായിക്കാൻ ഇവിടെ ക്ലിക്ക് ചെയ്യുക.