കോഴിക്കോട്: തിരുവണ്ണൂരിൽ വീട്ടമ്മയെ വീട്ടിൽ മരിച്ച നിലയിൽ കണ്ടെത്തിയ സംഭവം കൊലപാതകമെന്ന് പോലീസ്. തിരുവണ്ണൂർ കെ.പി അസ്മബീയെ വീടിനുള്ളിൽ മരിച്ച നിലയിൽ കണ്ടെത്തിയ സംഭവത്തിൽ മകളുടെ ഭർത്താവ് മഹമൂദിനെ പാലക്കാട് വച്ച് അറസ്റ്റ് ചെയ്തതായി പോലീസ് പറഞ്ഞു.
മകൾക്കും മരുമകനുമൊപ്പം കഴിഞ്ഞ നാലുവർഷമായി അസ്മാബി പയ്യടിമീത്തലാണ് താമസിക്കുന്നത്. ഇന്നലെ ജോലിക്ക് പോയ മകൾ തിരിച്ചെത്തിയപ്പോൾ അമ്മയെ മരിച്ച നിലയിൽ കണ്ടെത്തുകയായിരുന്നു. തുടർന്നുള്ള അന്വേഷണത്തിലാണ് പോലീസ് കൊലപാതകമാണെന്ന് സ്ഥിരീകരിച്ചത്.
അസ്മാബിയെ മരുമകനായ മഹമൂദ് മുഖത്തു തലയണ അമർത്തി കൊലപ്പെടുത്തുകയായിരുന്നുവെന്ന് പോലീസ് പറഞ്ഞു. കൊലപാതകത്തിന് ശേഷം പ്രതി അസ്മാബിയുടെ സ്വർണം കവർന്ന് രക്ഷപ്പെടുകയായിരുന്നുവെന്നും ഈ സ്വർണം കണ്ടെടുത്തതായും പോലീസ് അറിയിച്ചു. കൊലപാതകത്തിനുശേഷം ട്രെയിനിൽ രക്ഷപ്പെടുന്നതിനിടെയാണ് ഇയാളെ പാലക്കാട് നിന്ന് പോലീസ് പിടികൂടിയത്.