തിരുവനന്തപുരം- മാധ്യമം ജീവനക്കാർ ആവശ്യപ്പെടുന്നത് അവർക്ക് ന്യായമായി ലഭിക്കേണ്ട ശമ്പളവും തൊഴിൽ അവകാശങ്ങളുമാണെന്നും സ്ഥിരം ജീവനക്കാരെ സമ്മർദ്ദത്തിലാക്കി രാജിവെപ്പിച്ച് കരാർ ജീവനക്കാരാക്കാനുള്ള നീക്കം അംഗീകരിക്കാനാവില്ലെന്നും പ്രതിപക്ഷ നേതാവ് പിണറായി വിജയൻ. തൊഴിൽ സുരക്ഷ ഇല്ലാതാക്കുന്ന ഇത്തരം സമീപനം ഒരു ആധുനിക സ്ഥാപനത്തിലും ഉണ്ടാകാൻ പാടില്ല. ഈ പ്രശ്നം പരിഹരിക്കാൻ സംസ്ഥാന സർക്കാർ അടിയന്തരമായി ഇടപെടണം.
കേരള പത്രപ്രവർത്തക യൂണിയന്റെയും കേരള ന്യൂസ് പേപ്പർ എംപ്ലോയീസ് ഫെഡറേഷന്റെയും ആഭിമുഖ്യത്തിൽ, വിവിധ ട്രേഡ് യൂണിയനുകളുടെ പിന്തുണയോടെ സെക്രട്ടേറിയറ്റിന് മുന്നിൽ നടത്തിയ രാപ്പകൽ സമരത്തിൽ സംസാരിക്കുകയായിരുന്നു അദ്ദേഹം. നേരത്തേ എൽ.ഡി.എഫ് സർക്കാർ ഈ വിഷയത്തിൽ ഇടപെട്ട് താൽക്കാലിക ഒത്തുതീർപ്പുണ്ടാക്കിയതാണെന്നും ഇപ്പോഴത്തെ പ്രശ്നങ്ങൾ പരിഹരിക്കാനും ജീവനക്കാരുടെ അവകാശങ്ങൾ ഉറപ്പാക്കാനും സർക്കാർ വീണ്ടും ഫലപ്രദമായി ഇടപെടണമെന്നും പിണറായി ആവശ്യപ്പെട്ടു.
നവഉദാരവൽക്കരണ കാലത്ത് കോർപ്പറേറ്റുകൾ സ്വീകരിക്കുന്ന തൊഴിൽനയങ്ങൾ ഒരു മാധ്യമ സ്ഥാപനം നടപ്പാക്കുന്നത് ഗൗരവമായി കാണേണ്ട കാര്യമാണ്. ജീവനക്കാരുടെ അവകാശങ്ങൾ സംരക്ഷിക്കുന്നതിനുപകരം അവരെ കൂടുതൽ അരക്ഷിതാവസ്ഥയിലേക്ക് തള്ളിവിടുന്ന നടപടികൾ അംഗീകരിക്കാനാവില്ല.
ജീവനക്കാരുടെ സമരത്തെ അഭിസംബോധന ചെയ്തതിന്റെ പേരിൽ സി.ഐ.ടി.യു അഖിലേന്ത്യ ജനറൽ സെക്രട്ടറി എളമരം കരീമിനെതിരെ മാനനഷ്ടക്കേസ് നൽകിയ നടപടിയും അംഗീകരിക്കാനാവില്ല. തൊഴിലാളികളുടെ അവകാശങ്ങൾക്കുവേണ്ടി സംസാരിക്കുന്നതിനുള്ള അവകാശം സംരക്ഷിക്കപ്പെടേണ്ടതാണ്.
ജീവനക്കാരുടെ ന്യായമായ ആവശ്യങ്ങൾ അംഗീകരിച്ച് എത്രയും വേഗം സമരം ഒത്തുതീർപ്പാക്കുകയാണ് വേണ്ടതെന്നും പിണറായി പറഞ്ഞു.
