എറണാകുളം: കൊച്ചിയിൽ നിന്നും ലണ്ടനിലേക്ക് യാത്ര തിരിക്കേണ്ട എയർ ഇന്ത്യ വിമാനത്തിൽ ബോംബ് വെച്ചിട്ടുണ്ടെന്ന് ഭീഷണി മുഴക്കിയെന്ന് ആരോപിച്ച് കൊണ്ടോട്ടി സ്വദേശിയായ യുവാവിനെ പോലീസ് അറസ്റ്റ് ചെയ്തു. മലപ്പുറം ജില്ലയിലെ കൊണ്ടോട്ടി സ്വദേശിയായ ശുഹൈബിനെയാണ് പോലീസ് പിടികൂടിയത്. അതേസമയം, ആരോപണം യുവാവ് നിഷേധിച്ചു. ഈ മാസം ആദ്യം ലണ്ടനിൽനിന്ന് കൊച്ചിയിലേക്കുള്ള യാത്രയ്ക്കിടെ ശുഹൈബിന്റെ മകൾക്ക് ഭക്ഷ്യവിഷബാധ ഉണ്ടായിരുന്നു. ഇത് സംബന്ധിച്ച് നൽകിയ പരാതിയിൽ എയറിന്ത്യ വൈരാഗ്യം തീർക്കുകയാണ് എന്നാണ് യുവാവിന്റെ വാദം.
ഈ മാസം ആദ്യം ലണ്ടനില് നിന്ന് കൊച്ചിയിലേക്കുള്ള യാത്രയ്ക്കിടെ ശുഹൈബിന്റെ മകള്ക്ക് ഭക്ഷ്യവിഷബാധ ഉണ്ടായതായാണ് വിവരം. തുടർന്ന് മടക്കയാത്ര തീയതി മാറ്റി നൽകണമെന്ന് ഇയാൾ എയർ ഇന്ത്യ അധികൃതരോട് ആവശ്യപ്പെട്ടു. എന്നാൽ ഈ ആവശ്യം എയർ ഇന്ത്യ അംഗീകരിച്ചിരുന്നില്ല.
കൊച്ചിയിൽ നിന്ന് ലണ്ടൻ ഗാറ്റ്വിക്കിലേക്ക് പോകേണ്ട എഐ 149 വിമാനത്തിൽ ബോംബ് ഉണ്ടെന്ന് ഇന്ന് പുലർച്ചെയാണ് മുംബൈയിലെ എയർ ഇന്ത്യ കോൾ സെൻ്ററിൽ ഭീഷണി സന്ദേശം ലഭിച്ചത്. ഉടൻ തന്നെ ഈ വിവരം കൊച്ചിയിലെ എയർ ഇന്ത്യ അധികൃതരെയും കൊച്ചിൻ ഇൻ്റർനാഷണൽ എയർപോർട്ട് ലിമിറ്റഡിനെയും അറിയിച്ചു. പ്രോട്ടോക്കോളുകൾ പ്രകാരം ബോംബ് ത്രെട്ട് അസസ്മെൻ്റ് കമ്മിറ്റി (ബിടിഎസ്) ഉടൻ സിയാലിൽ യോഗം ചേര്ന്നു.
എയർപോർട്ട് സെക്യൂരിറ്റി ഗ്രൂപ്പ്, എയർലൈൻ സെക്യൂരിറ്റി ഉദ്യോഗസ്ഥർ, ഇൻലൈൻ ബാഗേജ് സ്ക്രീനിംഗ് ഉദ്യോഗസ്ഥർ എന്നിവർ സുരക്ഷാ പരിശോധനകൾ നടത്തി. മുംബൈ കോൾ സെൻ്ററിൽ ഭീഷണി റിപ്പോർട്ട് ചെയ്തയാളെ തിരിച്ചറിഞ്ഞു.
ഇതേ വിമാനത്തിൽ ലണ്ടനിലേക്ക് പോകാനിരുന്ന കൊണ്ടോട്ടി മലപ്പുറം സ്വദേശി ശുഹൈബ് (29) ആണ് വിളിച്ചതെന്ന് അന്വേഷണത്തിൽ കണ്ടെത്തുകയായിരുന്നു. ഭാര്യയ്ക്കും മകൾക്കുമൊപ്പമെത്തിയ ശുഹൈബിനെ കൊച്ചിൻ എയർപോർട്ടിലെ എഎസ്ജി ചെക്ക്-ഇൻ സമയത്ത് പോലീസ് കസ്റ്റഡിയിലെടുത്തു. തുടർന്ന് കൂടുതൽ ചോദ്യം ചെയ്യലിനും നിയമ നടപടികൾക്കുമായി ഇയാളെ പോലീസിന് കൈമാറി. അതേസമയം ആരോപണം യുവാവ് നിഷേധിച്ചു.