പാലക്കാട്: പ്രധാനാധ്യാപികയെയും അധ്യാപകരെയും അസഭ്യം പറഞ്ഞ് സ്‌കൂളിലെ ക്രിസ്മസ് ആഘോഷം തടയാൻ ശ്രമിച്ച വിശ്വഹിന്ദു പരിഷത്ത് നേതാക്കളെ അറസ്റ്റ് ചെയ്തു. പാലക്കാട് നല്ലേപ്പിള്ളി ഗവ. യുപി സ്‌കൂളിലാണ് സംഭവം.
നല്ലേപ്പള്ളി സ്വദേശികളായ വിശ്വഹിന്ദു പരിഷത്ത് ജില്ലാ സെക്രട്ടറി വടക്കുംതറ കെ അനിൽകുമാർ, ബജരംഗദൾ ജില്ലാ സംയോജക് മാനാംകുറ്റി കറുത്തേടത്ത്കളം സുശാസനൻ, വി.എച്ച.പി പഞ്ചായത്ത് കമ്മിറ്റി പ്രസിഡന്റ് തെക്കുമുറി വേലായുധൻ എന്നിവരെയാണ് അറസ്റ്റ് ചെയ്തത്.
ജാമ്യമില്ലാ വകുപ്പ് പ്രകാരം ഇവർക്കെതിരെ കേസെടുത്തതായി പോലീസ് പറഞ്ഞു. കൃത്യനിർവഹണം തടസ്സപ്പെടുത്തൽ, മതസ്പർധ വളർത്തുന്ന രീതിയിൽ അസഭ്യം പറഞ്ഞു, അതിക്രമിച്ചു കയറൽ, ഭീഷണിപ്പെടുത്തൽ ഉൾപ്പെടെ ചുമത്തിയാണ് കേസ്.
ക്രിസ്മസ് ആഘോഷത്തിന് വേഷം അണിഞ്ഞ് കരോൾ നടത്തുമ്പോഴാണ് വി.എച്ച്.പി പ്രവർത്തകർ എത്തിയത്. പ്രധാനധ്യാപികയെയും സഹ അധ്യാപകരെയും അസഭ്യം പറഞ്ഞ ഇവർ ശ്രീകൃഷ്ണ ജയന്തിയാണ് ആഘോഷിക്കേണ്ടതെന്നും ഭീഷണിപ്പെടുത്തിയെന്നാണ് കേസ്.
എന്നാൽ, കുട്ടികളുമായി ക്രിസ്മസ് റാലി നടത്തുന്നതിനെയാണ് ചോദ്യം ചെയ്തതെന്നും ഭീഷണിപ്പെടുത്തിയിട്ടില്ലെന്നും പ്രതികൾ പറഞ്ഞു. ചില അധ്യാപക സംഘടനകൾ രംഗം മുതലെടുപ്പിന് ഉപയോഗിക്കുകയാണെന്നും ഇവർ ആരോപിച്ചു.