അഹമ്മദാബാദ്: ജി.എസ്.ടി തട്ടിപ്പ് കേസിൽ ദ ഹിന്ദു പത്രത്തിന്റെ സീനിയർ അസിസ്റ്റന്റ് എഡിറ്റർ മഹേഷ് ലംഗ അറസ്റ്റിൽ. ഡയറക്ടറേറ്റ് ജനറൽ ഓഫ് ജി.എസ്.ടി ഇന്റലിജൻസ് നൽകിയ പരാതിയുടെ അടിസ്ഥാനത്തിൽ ഡിറ്റക്ഷൻ ഓഫ് ക്രൈംബ്രാഞ്ച് ആണ് മുതിർന്ന മാധ്യമപ്രവർത്തകനെ അറസ്റ്റ് ചെയ്തത്.
മഹേഷിൽ നിന്ന് 20 ലക്ഷം രൂപയും കണക്കിൽ പെടാത്ത പണവും സ്വർണ്ണവും നിരവധി ഭൂമി രേഖകളും കണ്ടെടുത്തതായും അധികൃതർ അറിയിച്ചു. ജി.എസ്.ടി തട്ടിപ്പ് സർക്കാർ ഖജനാവിന് നഷ്ടമുണ്ടാക്കിയെന്നും പ്രതികൾ വ്യാജ ബില്ലുകളിലൂടെ വ്യാജ ഐ.ടി.സി നേടുകയും കൈമാറുകയും ചെയ്തുവെന്നും അന്വേഷണ സംഘം കുറ്റപ്പെടുത്തി. കഴിഞ്ഞ വർഷം ഫെബ്രുവരി ഒന്നിനും മെയ് ഒന്നിനും ഇടയിലാണ് തട്ടിപ്പ് നടന്നതെന്നാണ് എഫ്.ഐ.ആറിലുള്ളത്.
സംഭവത്തിൽ നേരത്തെ 13 സ്ഥാപനങ്ങൾക്കും അവയുടെ ഉടമകൾക്കുമെതിരെ കേസെടുത്തിരുന്നു. വ്യാജരേഖകൾ ചമച്ച് 220-ലധികം ബിനാമി സ്ഥാപനങ്ങൾ തട്ടിപ്പിനായി ഉപയോഗിച്ചതായി എഫ്.ഐ.ആറിലുണ്ട്. എന്നാൽ, ഇതിൽ മേഹ്ഷ് ലംഗയുടെ പേര് ഇല്ലെങ്കിലും അദ്ദേഹത്തിന്റെ ഭാര്യ പങ്കാളിയായ അഹമ്മദാബാദ് ആസ്ഥാനമായുള്ള ഡി.എ എന്റർപ്രൈസ് എന്ന സ്ഥാപനത്തിന്റെ ഉടമകളിൽ ഒരാളായിരുന്ന ബന്ധു മനോജ്കുമാർ ലംഗയുടെ പേരുണ്ട്. ബി.ജെ.പി എം.എൽ.എ ഭഗവാൻ ബരാദിന്റെ മകൻ അജയ്, മരുമക്കളായ വിജയകുമാർ കലാഭായ് ബരാദ്, രമേഷ് കലാഭായ് ബരാദ് എന്നിവരും കേസിൽ പ്രതികളാണ്. വിശദമായ ചോദ്യംചെയ്യലിനു ശേഷമാണ് മഹേഷ് ലങ്കയെ അറസ്റ്റ് ചെയ്തതെന്ന് ക്രൈം ഡി.സി.പി അജിത്ത് രജിയാൻ വ്യക്തമാക്കി.