ന്യൂദൽഹി: നീറ്റ് (NEET) പരീക്ഷാ ക്രമക്കേടുകൾക്കെതിരെ വിദ്യാർത്ഥികളും കോക്റോച്ച് ജനതാ പാർട്ടിയും ചേർന്ന് ജന്തർ മന്ദറിൽ നടത്തുന്ന പ്രതിഷേധ സമരത്തിനിടെ ഹൃദയസ്പർശിയായ രംഗങ്ങൾ. ജാതി-മത ഭേദമന്യേ സമരക്കാർക്ക് സേവനം ചെയ്യുന്ന മുഹമ്മദ് ജുനൈദ് എന്ന യുവാവിനെ നേരിൽ കാണാൻ ഉത്തർപ്രദേശിലെ സഹാരൺപൂരിൽ നിന്ന് സുനിത എന്ന അമ്മയെത്തി.
ഗാസിയാബാദ് സ്വദേശിയായ മുഹമ്മദ് ജുനൈദ് കഴിഞ്ഞ കുറച്ചു ദിവസങ്ങളായി പ്രതിഷേധ സ്ഥലത്ത് സജീവമാണ്. സമരത്തിൽ പങ്കെടുക്കുന്ന വിദ്യാർത്ഥികൾക്ക് സ്വന്തം കൈയിൽ നിന്നും നാട്ടുകാരുടെ സഹായത്തോടെയും സൗജന്യമായി ഭക്ഷണവും വെള്ളവും പഴവർഗ്ഗങ്ങളും വിതരണം ചെയ്ത് ജുനൈദ് മാതൃകയായിരുന്നു. ജുനൈദിന്റെ ഈ നിസ്വാർത്ഥ സേവനം സമൂഹമാധ്യമങ്ങളിൽ വലിയ തോതിൽ ശ്രദ്ധിക്കപ്പെട്ടിരുന്നു.
“നീയൊരു പ്രതീകമാണ്”; പൊട്ടിക്കരഞ്ഞ് സുനിത
ഈ വാർത്തകൾ കണ്ടറിഞ്ഞാണ് സഹാരൺപൂരിൽ നിന്നുള്ള സുനിത അറോറ എന്ന സ്ത്രീ ഏതാണ്ട് 180 കിലോമീറ്ററോളം യാത്ര ചെയ്ത് ഡൽഹി ജന്തർ മന്ദറിലെത്തിയത്. ജുനൈദിനെ കണ്ടമാത്രയിൽ അവർ കെട്ടിപ്പിടിച്ച് പൊട്ടിക്കരയുകയായിരുന്നു.
“മകനേ, നിന്നെ കാണാൻ സഹാരൺപൂരിൽ നിന്ന് നിന്റെ അമ്മ വന്നതാണ്. നീ ഹിന്ദു-മുസ്ലിം ഐക്യത്തിന്റെ പ്രതീകമാണ്,” എന്ന് സുനിത പറഞ്ഞപ്പോൾ ജുനൈദിനും കണ്ണീരടക്കാനായില്ല.
ക്യാമറകൾക്ക് മുന്നിൽ അരങ്ങേറിയ ഈ വൈകാരിക നിമിഷത്തിന്റെ വീഡിയോകൾ ഇപ്പോൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്. പരസ്പര സ്നേഹത്തിന്റെയും വർഗ്ഗീയ സൗഹാർദ്ദത്തിന്റെയും ഉത്തമ ഉദാഹരണമായി ഈ സംഭവം മാറിയിരിക്കുകയാണ്.