മുംബൈ: മഹാരാഷ്ട്രയിൽ മദ്രസ അധ്യാപകരുടെ ശമ്പളം മൂന്നിരട്ടിയാക്കി വർധിപ്പിച്ച് ഏകനാഥ് ഷിൻഡെയുടെ നേതൃത്വത്തിലുള്ള ബി.ജെ.പി സർക്കാർ. നിയമസഭാ തെരഞ്ഞെടുപ്പിന് മുന്നോടിയായി ന്യൂനപക്ഷങ്ങളെ ആകർഷിക്കാനുള്ള പദ്ധതികളുടെ ഭാഗമാണ് സർക്കാർ തീരുമാനം.
മദ്രസ അധ്യാപകരുടെ ശമ്പളവും മൗലാന ആസാദ് ഫിനാൻഷ്യൽ കോർപറേഷന്റെ പ്രവർത്തന മൂലധനവും വർധിപ്പിക്കാൻ മുഖ്യമന്ത്രി ഏകനാഥ് ഷിൻഡെയുടെ അധ്യക്ഷതയിൽ ചേർന്ന മന്ത്രിസഭാ യോഗം തീരുമാനിക്കുകയായിരുന്നു.
പ്രതിമാസ ശമ്പളം 6,000 രൂപയിൽ നിന്ന് 16,000 രൂപയായാണ് വർധിപ്പിച്ചത്. ബി.എഡ് ബിരുദമുള്ള സെക്കൻഡറി സ്‌കൂൾ അധ്യാപകരുടെ പ്രതിമാസ ശമ്പളം 8,000 രൂപയിൽ നിന്ന് 18,000 രൂപയായും വർധിപ്പിച്ചു. കേരളത്തിൽ മദ്രസ അധ്യാപകർക്ക് സർക്കാർ ചെലവിൽ ശമ്പളം നൽകുന്നുവെന്ന് ഒരു ഭാഗത്ത് വ്യാജ പ്രചാരണം അഴിച്ചുവിടുന്ന ബി.ജെ.പി തന്നെയാണ് തങ്ങൾ ഭരിക്കുന്ന മറ്റൊരു സംസ്ഥാനത്ത് മദ്രസാധ്യാപകർക്ക് ശമ്പളം ഒറ്റയടിക്ക് മൂന്നിരട്ടിയായി കൂട്ടി ന്യൂനപക്ഷങ്ങളുടെ കൈയടിക്കായി ശ്രമിക്കുന്നത്.
സയൻസ്, ഗണിതം, സോഷ്യോളജി എന്നീ വിഷയങ്ങളും ഇംഗ്ലീഷ്, മറാത്തി, ഹിന്ദി, ഉറുദു എന്നീ ഭാഷകളുമാണ് മതവിഷയങ്ങളോടൊപ്പം മഹാരാഷ്ട്രയിൽ മദ്രസകളിൽ പഠിപ്പിക്കുന്നത്.
മൗലാന ആസാദ് ഫിനാൻഷ്യൽ കോർപറേഷന്റെ പ്രവർത്തന മൂലധനം 600 കോടിയിൽ നിന്ന് 1,000 കോടി രൂപയായി ഉയർത്താനുള്ള സംസ്ഥാന ന്യൂനപക്ഷ വകുപ്പിന്റെ നിർദേശത്തിനും പച്ചക്കൊടി വീശിയിട്ടുണ്ട്. ഈ തുക ന്യൂനപക്ഷ സമുദായത്തിൽപ്പെട്ടവർക്ക് വിവിധ ആവശ്യങ്ങൾക്കായി വായ്പ നൽകാനാണ് ഉപയോഗിക്കുക.
ഇതുകൂടാതെ, വിവിധ സമുദായങ്ങൾക്കായി ക്ഷേമ സഹകരണ ബോർഡുകൾ രൂപീകരിക്കാനുള്ള നിർദേശവും മന്ത്രിസഭ അംഗീകരിച്ചു. ആദിവാസി ക്ഷേമ ബോർഡുകൾക്കുള്ള നിക്ഷേപ മൂലധനവും വർധിപ്പിച്ചു. വിവിധ സാമൂഹിക പ്രവർത്തനങ്ങൾ നടത്തുന്നതിന് ഓരോ സഹകരണ ബോർഡിനും 50 കോടി രൂപ നിക്ഷേപ മൂലധനമായി നൽകാനാണ് തീരുമാനം.
ഒ.ബി.സി സംവരണ ആനുകൂല്യങ്ങൾ ലഭിക്കുന്നതിന് ആവശ്യമായ ‘നോൺ ക്രീമിലെയർ’ വരുമാന പരിധി വർധിപ്പിക്കണമെന്ന് കേന്ദ്ര സർക്കാരിനോട് അഭ്യർത്ഥിക്കാനും മന്ത്രിസഭ തീരുമാനിച്ചു. പ്രതിവർഷം എട്ടുലക്ഷം രൂപ വരുമാന പരിധി എന്നത് 15 ലക്ഷം രൂപയായി ഉയർത്തണമെന്നാണ് ആവശ്യം.
മഹാരാഷ്ട്ര സംസ്ഥാന പട്ടികജാതി കമ്മിഷന് ഭരണഘടനാ പദവി നൽകുന്നതിനുള്ള കരട് ഓർഡിനൻസും മന്ത്രിസഭാ യോഗത്തിൽ അംഗീകരിച്ചതായി മുഖ്യമന്ത്രിയുടെ ഓഫീസ് വ്യക്തമാക്കി.