കാഞ്ഞിരപ്പള്ളി: എ കെ ആൻ്റണിയെ പ്രശംസിച്ച് പ്രതിരോധമന്ത്രി രാജ്നാഥ് സിങ്. എ കെ ആൻ്റണിയുടെ സത്യസന്ധതയിൽ സംശയമില്ലെന്നും ആൻ്റണിയേക്കുറിച്ച് നല്ല കാര്യങ്ങളേ പറയാനുള്ളൂവെന്നും രാജ്നാഥ് സിങ് പറഞ്ഞു. രാജ്യത്തിൻ്റെ മുൻ പ്രതിരോധ മന്ത്രിയെന്ന നിലയിൽ ആൻ്റണിയുടെ നേർക്ക് ഒരു ക്വസ്റ്റ്യൻ മാർക്കുമില്ലെന്നും രാജ്നാഥ് സിങ് പറഞ്ഞു.
വോട്ട് നല്‍കിയില്ലെങ്കിലും മകനായ അനിലിനെ അനുഗ്രഹിക്കണം. അനില്‍ ആന്‍റണി ജയിക്കില്ലെന്ന ആന്‍റണിയുടെ പ്രസ്താവന തന്നെ അത്ഭുതപ്പെടുത്തി. കോണ്‍ഗ്രസ് പാര്‍ട്ടിയുടെ സമ്മര്‍ദം കാരണമാകാം ആന്‍റണി അത്തരത്തിൽ പ്രതികരിച്ചതെന്ന് അദ്ദേഹം പറഞ്ഞു.
കാഞ്ഞിരപ്പള്ളിയില്‍ പത്തനംതിട്ടയിലെ എൻഡിഎ സ്ഥാനാർഥി അനില്‍ ആന്‍റണിയുടെ തെരഞ്ഞെടുപ്പ് പ്രചാരണത്തില്‍ സംസാരിക്കുകയായിരുന്നു അദ്ദേഹം.
ആന്‍റണി തനിക്ക് ജ്യേഷ്ഠസഹോദരനെ പോലെയാണ്. താന്‍ ആന്‍റണിയോട് പറയുന്നത് അദ്ദേഹത്തിന്‍റെ മകനാണ് അനില്‍. അതിനാല്‍ അനിലിന് വോട്ട് നല്‍കിയില്ലെങ്കിലും അനുഗ്രഹം നല്‍കണം എന്നാണ്. അനിലിന് ബിജെപിയില്‍ വലിയ ഭാവിയുണ്ടെന്നും രാജ്നാഥ് സിംഗ് കൂട്ടിച്ചേർത്തു.
ചന്ദ്രയാന്‍ ദൗത്യം വിജയിച്ചു. പക്ഷേ കോണ്‍ഗ്രസിന്‍റെ രാഹുല്‍യാന്‍ ദൗത്യം കഴിഞ്ഞ 20 വര്‍ഷമായിട്ടും എങ്ങും എത്തിയിട്ടില്ലെന്നും രാജ്നാഥ് സിംഗ് പരിഹസിച്ചു. കേരളത്തില്‍ എന്‍ഡിഎ രണ്ടക്കം കടക്കുമെന്നും അദ്ദേഹം അവകാശപ്പെട്ടു.