ന്യൂഡല്ഹി– സുപ്രീംകോടതിക്കെതിരെ വിമര്ശനം ആവര്ത്തിച്ച് ഉപരാഷ്ട്രപതി ജഗ്ദീപ് ധന്കര്. ഭരണഘടനപ്രകാരം ഏറ്റവും ഉയര്ന്ന സ്ഥാനം പാര്ലമെന്റിനാണ്. ഭരണഘടന എന്തായിരിക്കുമെന്ന് തീരുമാനിക്കേണ്ടത് തിരഞ്ഞെടുക്കപ്പെട്ട പ്രതിനിധികളാണ്. അതിന് മുകളില് ഒന്നിനും അധികാരമില്ല ഉപരാഷ്ട്രപതി പറഞ്ഞു.
ഭരണഘടയുടെ ആമുഖത്തെ സംബന്ധിച്ചും വ്യത്യസ്തമായ വിധികളാണ് കോടതി പുറപ്പെടുവിച്ചതെന്നും അദ്ദേഹം വിമര്ശിച്ചു. ഗൊരക്നാഥി കേസില് ആമുഖം ഇന്ത്യന് ഭരണഘടനയുടെ ഭാഗമല്ലെന്ന് പറഞ്ഞ സുപ്രീംകോടതി കേശവാനന്ദ് ഭാരതി കേസില് ആമുഖം ഭരണഘടനയുടെ ഭാഗമാണെന്ന് പറയുന്നു. 1975ലെ അടിയന്തരാവസ്ഥ പ്രഖ്യാപിച്ചപ്പോള് അതില് സുപ്രീംകോടതി ഇടപ്പെട്ടില്ല. മൗലികാവകാശങ്ങള് ലംഘിക്കപ്പെട്ട ഒമ്പത് ഹൈക്കോടതി വിധികളെ തള്ളി അനുകൂലമായ നിടപാടാണ് അടിയന്തരാവസ്ഥ കാലത്ത് സുപ്രീംകോടതി സ്വീകരിച്ചതെന്നും അദ്ദേഹം പറഞ്ഞു.
ബില്ലുകളില് തീരുമാനമെടുക്കാന് രാഷ്ട്രപതിക്ക് സമയപരിധി നിശ്ചയിച്ച സുപ്രീംകോടതി വിധിയെ വിമര്ശിച്ച് ഉപരാഷ്ട്രപതി നേരത്തെയും രംഗത്തെത്തിയിരുന്നു. ജഡ്ജിമാര് നിയമനിര്മാണം നടത്തി നടപ്പിലാക്കുന്ന സൂപ്പര്പാര്ലമെന്ററിയായി പ്രവര്ത്തിക്കുന്നു എന്നായിരുന്നു ജഗ്ദീപ് ധന്കറിന്റെ വിമര്ശനം. അദ്ദേഹത്തിന്റെ വിമര്ശനത്തിനെതിരെ വലിയ പ്രതിഷേധമാണ് ഉയര്ന്ന് വന്നത്. ധന്കറിനെതിരെ നിയമനടപടി സ്വീകരിക്കണമെന്ന ആവിശ്യവും ഉയര്ന്നിരുന്നു.