അരങ്ങിലേക്ക് വീണ്ടും മാസ്ക്; മണ്ണാർക്കാട് താലൂക്കിൽ നിപ ജാ​ഗ്രതയുടെ ഭാ​ഗമായി മാസ്ക് നിർബന്ധമാക്കി

പാലക്കാട്– പാലക്കാട് ജില്ലയിലെ മണ്ണാർക്കാട് താലൂക്കിൽ നിപ വ്യാപനം തടയുന്നതിനായി മാസ്ക് നിർബന്ധമാക്കി കൊണ്ട് ഉത്തരവ് ഇറക്കി. കണ്ടെയ്ൻമെന്റ് സോണുകളിൽ ആൾക്കൂട്ടം ഒഴിവാക്കുന്നതിനായി വർക്ക് ഫ്രം ഹോമിനും അധികാരികൾ ഉത്തരവ് നൽകിയിട്ടുണ്ട്. നിലവിൽ സർക്കാർ ജീവനക്കാർക്ക് ആണ് വർക്ക് ഫ്രം ഹോം സംവിധാനം ഏർപ്പെടുത്തിയിട്ടുള്ളത്. വർക്ക് ഫ്രം ഹോം സാധ്യമല്ലാത്ത ജീവനക്കാർക്ക്, പ്രത്യേക അവധി സംബന്ധിച്ച് പൊതുഭരണ വകുപ്പ് പ്രിൻസിപ്പൽ സെക്രട്ടറിക്ക് കത്ത് നൽകിയതായും ജില്ല കളക്ടർ അറിയിച്ചു.

കണ്ടെയ്ൻമെന്റ് സോണുകളിൽ ഉൾപ്പെട്ട സ്കൂളിലെയും കോളേജിലെയും വിദ്യാർത്ഥികൾക്ക് ഓൺലൈൻ ക്ലാസുകൾ സംഘടിപ്പിക്കും. കൂടാതെ കണ്ടെയ്ൻമെന്റ് സോണിന് പുറത്തുള്ള സ്കൂളിലെയും കോളേജിലേയും പഠിക്കുന്ന കണ്ടെയ്ൻമെന്റ് സോണുകളിലെ വിദ്യാർത്ഥികൾക്കും ഇനി ഓൺലൈൻ ക്ലാസുകൾ ആയിരിക്കും എന്നും അറിയിച്ചു.