ജെറ്റ് എയർവേഴ്‌സ് സ്ഥാപകൻ നരേഷ് ഗോയലിന്റെ ഭാര്യ അനിത അന്തരിച്ചു

മുംബൈ – ജെറ്റ് എയർവേഴ്‌സ് സ്ഥാപകൻ നരേഷ് ഗോയലിന്റെ ഭാര്യ അനിത ഗോയൽ മരിച്ചു. അർബുദ രോഗബാധയെ തുടർന്ന് ചികിത്സയിലിരിക്കെ മുംബൈയിലെ ആശുപത്രിയിൽ വച്ചായിരുന്നു അന്ത്യം. നരേഷ് ഗോയലും അർബുദരോഗത്തിന് ചികിത്സയിലാണ്.
കള്ളപ്പണം വെളുപ്പിക്കൽ കേസിൽ ജുഡീഷ്യൽ കസ്റ്റഡിയിലായിരുന്ന നരേഷിന് ഭാര്യയുടെ ആരോഗ്യസ്ഥിതിയടക്കം പരിഗണിച്ച് കോടതി ഇടക്കാലജാമ്യം അനുവദിച്ചിരുന്നു. ആർതർ റോഡ് ജയിലിലായിരുന്ന ഗോയലിന് ബോംബെ ഹൈക്കോടതിയാണ് രണ്ടുമാസത്തേക്ക് ഇടക്കാല ജാമ്യം അനുവദിച്ചത്.
കള്ളപ്പണ ഇടപാടുമായി ബന്ധപ്പെട്ട് കഴിഞ്ഞ സെപ്തംബറിലാണ് നരേഷ് ഗോയലിനെ ഇ.ഡി അറസ്റ്റുചെയ്തത്. ജെറ്റ് എയർവേഴ്‌സിന്റെ എക്‌സിക്യൂട്ടീവ് വൈസ് പ്രസിഡന്റായിരുന്ന അനിതയെയും ഇ.ഡി കേസിൽ പ്രതിയാക്കിയിരുന്നു. സംസ്‌കാരം ഇന്ന് മുംബൈയിൽ നടക്കും. നമ്രത, നിവാൻ ഗോയൽ മക്കളാണ്.