ന്യൂഡൽഹി: ഇറാൻ-ഇസ്രായേൽ സംഘർഷം രൂക്ഷമായതിനെ തുടർന്ന് ഇറാനിൽ കുടുങ്ങിയ 110 ഇന്ത്യൻ വിദ്യാർത്ഥികളെ സുരക്ഷിതമായി ഒഴിപ്പിച്ചതായി കേന്ദ്ര വിദേശകാര്യ മന്ത്രാലയം അറിയിച്ചു. ഇതിൽ 90 പേർ ജമ്മു കശ്മീരിൽ നിന്നുള്ളവരാണ്. ഉർമിയ മെഡിക്കൽ യൂണിവേഴ്സിറ്റിയിൽ പഠിക്കുന്ന വിദ്യാർത്ഥികൾ ഇന്ത്യൻ എംബസിയുടെ സഹായത്തോടെ അർമേനിയയിലേക്ക് കരമാർഗം എത്തി. അവിടെ നിന്ന് ഇൻഡിഗോ വിമാനത്തിൽ ഖത്തറിലെ ദോഹ വഴി ഡൽഹിയിലേക്ക് യാത്ര തിരിച്ചു.
ഇന്ന് രാത്രിയോടെ ഡൽഹിയിൽ വിമാനം എത്തും. കശ്മീർ വിദ്യാർത്ഥികൾക്ക് ഡൽഹിയിൽ നിന്ന് ശ്രീനഗറിലേക്കുള്ള യാത്ര സൗജന്യമായി സർക്കാർ ക്രമീകരിച്ചിട്ടുണ്ട്.
വിദേശകാര്യ മന്ത്രാലയം 24 മണിക്കൂറും പ്രവർത്തിക്കുന്ന കൺട്രോൾ റൂം സ്ഥാപിച്ച് ഇറാനിലുള്ള മറ്റ് ഇന്ത്യൻ പൗരന്മാർക്ക് സഹായം നൽകുന്നുണ്ട്. ഇറാനിൽ ഇനിയും ചില ഇന്ത്യൻ വിദ്യാർത്ഥികൾ ഉണ്ടെന്നും അവരെ ഉടൻ ഒഴിപ്പിക്കണമെന്നും ആവശ്യം ഉയർന്നിട്ടുണ്ട്.