തെലങ്കാന– സങ്കറെഡ്ഡി ജില്ലയില്‍ പ്രവര്‍ത്തിക്കുന്ന സിഗാച്ചി ഫാര്‍മസ്യൂട്ടിക്കല്‍ കമ്പനിയിലുണ്ടായ സ്‌ഫോടനത്തില്‍ 12 മരണം. നിരവധി തൊഴിലാളികള്‍ക്ക് പരുക്കേറ്റു. ഫാക്ടറിക്കുള്ളിലെ റിയാക്ടര്‍ പൊട്ടിത്തെറിച്ചാണ് അപകടമുണ്ടായതെന്നാണ് പ്രാഥമിക നിഗമനം. തിങ്കളാഴ്ച രാവിലെ ഒമ്പതരയോടെയായിരുന്നു സംഭവം. കെട്ടിടം പൂര്‍ണമായും കത്തി നശിച്ചെന്നാണ് വിവരം. പരുക്കേറ്റവരെ സമീപത്തെ ആശുപത്രിയില്‍ പ്രവേശിപ്പിച്ചിട്ടുണ്ട്. തകര്‍ന്ന കെട്ടിടത്തിനടിയില്‍ നിരവധി പേര്‍ കുടുങ്ങിക്കിടക്കുന്നതായി അഗ്നിരക്ഷാസേന ഉദ്യോഗസ്ഥര്‍ അറിയിച്ചു. പതിനൊന്നോളം ഫയര്‍ഫോഴ്‌സ് യൂണിറ്റുകളാണ് സ്ഥലത്ത് രക്ഷാപ്രവര്‍ത്തനം നടത്തുന്നത്.
സ്‌ഫോടന സമയത്ത് കെട്ടിടത്തില്‍ 63 ആളുകള്‍ ജോലിക്കായി എത്തിയിട്ടുണ്ടെന്ന് പി.ടി.ഐ റിപ്പോര്‍ട്ട് ചെയ്തു. അന്യ സംസ്ഥാനങ്ങളില്‍ നിന്നുള്ളവരാണ് ഫാര്‍മസ്യൂട്ടിക്കല്‍ കമ്പനിയിലെ ജീവനക്കാരിലേറെയും. പരുക്കേറ്റ് ചികിത്സയില്‍ കഴിയുന്ന
12 പേരുടെ നില ഗുരുതരമാണെന്ന് തെലങ്കാന തൊഴില്‍ വകുപ്പ് മന്ത്രി വിവേക് വെങ്കിട്ട സ്വാമി വ്യക്തമാക്കി. ബാക്കിയുള്ള 22 ആളുകള്‍ക്ക് 20-25 ശതമാനം പൊള്ളലേറ്റിട്ടുണ്ട്. ഇവര്‍ക്ക് കിട്ടാവുന്ന ഏറ്റവും മികച്ച ചികിത്സ തന്നെ നല്‍കുമെന്ന് തൊഴില്‍ അദ്ദേഹം പറഞ്ഞു. സിഗാച്ചി കമ്പനിയില്‍ നടന്ന അപകടത്തെ സംബന്ധിച്ച് മാധ്യമങ്ങളോട് സംസാരിക്കുകയായിരുന്നു അദ്ദേഹം.