രാജ്കോട്ട്- ഹൈവേകളിലെ തെരുവ് കന്നുകാലികൾ ഉണ്ടാക്കുന്ന അപകടങ്ങളെ വീണ്ടും വെളിച്ചത്തുകൊണ്ടുവരുന്ന നടുക്കുന്ന ദൃശ്യങ്ങളാണ് ഗുജറാത്തിൽ നിന്ന് പുറത്തുവരുന്നത്. ഭാരത്മാല ഹൈവേയിൽ തരാദിന് സമീപം രാജ്കോട്ടിൽ നിന്ന് രാജസ്ഥാനിലേക്ക് പോവുകയായിരുന്ന റേഞ്ച് റോവർ ഡിസ്കവറി (Range Rover Discovery) വാഹനം ഭീകരമായ അപകടത്തിൽപ്പെട്ടു. ആഡംബര എസ്യുവി തിരിച്ചറിയാൻ കഴിയാത്തവിധം തകർന്നടിഞ്ഞ അപകടത്തിൽ അതിലുണ്ടായിരുന്ന മൂന്നുപേരിൽ രണ്ടുപേർ സംഭവസ്ഥലത്തുതന്നെ മരിച്ചു. ഗുരുതരമായി പരിക്കേറ്റ മൂന്നാമത്തെയാളെ ചികിത്സയ്ക്കായി അഹമ്മദാബാദിലേക്ക് മാറ്റി. തെരുവ് കന്നുകാലി ഹൈവേയിലേക്ക് കുറുകെ ചാടിയതാണ് അപകടത്തിന് കാരണമായതെന്നാണ് വിവരം.
തരാദ്-ദീസ ഹൈവേയിൽ മാൽപൂരിന് സമീപമാണ് ഈ ദാരുണസംഭവം നടന്നത്. പാതയിലേക്ക് പെട്ടെന്ന് ഒരു കാള കയറിവന്നപ്പോൾ ഡ്രൈവർക്ക് വാഹനം വെട്ടിക്കാൻ സമയം ലഭിച്ചില്ല. കാളയെ ഇടിച്ച റേഞ്ച് റോവർ എസ്യുവി റോഡിലെ ഡിവൈഡറിലേക്ക് ശക്തിയായി ഇടിച്ചുകയറുകയായിരുന്നു. വാഹനത്തിന്റെ അവശിഷ്ടങ്ങൾ റോഡിലുടനീളം ചിതറിത്തെറിക്കുന്ന രീതിയിലുള്ള ശക്തമായ ഇടിയിലായിരുന്നു കാർ പൂർണ്ണമായും തകർന്നത്. അപകടസ്ഥലത്തുനിന്നുള്ള ചിത്രങ്ങളിൽ ആഡംബര വാഹനം തീർത്തും തിരിച്ചറിയാൻ കഴിയാത്തവിധം തകർന്നുതരിപ്പണമായ നിലയിലാണ് കാണപ്പെടുന്നത്. രാജ്കോട്ട് രജിസ്ട്രേഷനിലുള്ളതാണ് ഈ വാഹനം. സംഭവത്തെക്കുറിച്ച് അധികൃതർ അന്വേഷണം നടത്തിവരികയാണ്.
ഹൈവേയിൽ വാഹനത്തിന്റെ അവശിഷ്ടങ്ങൾ ചിതറിക്കിടക്കുന്നത് കണ്ട് പ്രദേശവാസികളാണ് ആദ്യം സംഭവസ്ഥലത്തെത്തുകയും 108 എമർജൻസി ആംബുലൻസ് സർവീസിനെ വിവരമറിയിക്കുകയും ചെയ്തത്. ഇടിയുടെ ആഘാതം വളരെ വലുതായതിനാൽ രണ്ടുപേർ സംഭവസ്ഥലത്തുതന്നെ മരിച്ചു. ജീവനോടെ രക്ഷപ്പെട്ട ഒരേയൊരു യാത്രക്കാരനെ ഉടൻതന്നെ അടുത്തുള്ള പ്രാഥമിക ആരോഗ്യ കേന്ദ്രത്തിലേക്കും തുടർന്ന് വിദഗ്ദ്ധ ചികിത്സയ്ക്കായി അഹമ്മദാബാദിലേക്കും മാറ്റി.
കാളയെ ഇടിച്ചതിനെ തുടർന്ന് നിയന്ത്രണം വിട്ട റേഞ്ച് റോവർ ഡിസ്കവറി വലിയ ശക്തിയിലാണ് ഹൈവേ ഡിവൈഡറിലേക്ക് ഇടിച്ചുകയറിയത്. വാഹനം പൂർണ്ണമായും തകർന്നുതരിപ്പണമായി അവശിഷ്ടങ്ങൾ ദൂരേക്ക് തെറിച്ചുവീണു. ഏതാനും നിമിഷങ്ങൾക്കുള്ളിൽ സംഭവിച്ച ഈ ദാരുണമായ അപകടം, ഹൈവേകളിലെ തെരുവ് കന്നുകാലികളുടെ ഭീഷണിയെക്കുറിച്ചുള്ള വലിയ ആശങ്ക ഉയർത്തുന്നുണ്ട്.