ഗംഗാവതി: ഓൺലൈൻ ഗെയിം അടിമത്തത്തെച്ചൊല്ലിയുള്ള തർക്കത്തിനൊടുവിൽ 18-കാരൻ സ്വന്തം കുടുംബാംഗങ്ങളെ കത്തികൊണ്ട് കുത്തിവീഴ്ത്തി. ആക്രമണത്തിൽ അച്ഛനും സഹോദരിയും ദാരുണമായി കൊല്ലപ്പെട്ടു. ഗുരുതരമായി പരിക്കേറ്റ അമ്മ ആശുപത്രിയിൽ തീവ്രപരിചരണ വിഭാഗത്തിൽ ജീവനുവേണ്ടി പോരാടുകയാണ്. ആക്രമണത്തിന് ശേഷം സ്വയം കഴുത്തറുത്ത് ആത്മഹത്യയ്ക്ക് ശ്രമിച്ച പ്രതിയായ കൗമാരക്കാരനും ഗുരുതരാവസ്ഥയിൽ ആശുപത്രിയിലാണ്. കർണാടകയിലെ കൊപ്പൽ ജില്ലയിലുള്ള ഗംഗാവതിയിൽ കഴിഞ്ഞ ദിവസമാണ് നാടിനെ നടുക്കിയ ഈ കൂട്ടക്കൊല നടന്നത്. വെങ്കണ്ണ നായിഡു (48), മകൾ പ്രഗതി (20) എന്നിവരാണ് മകന്റെ ക്രൂരതയ്ക്ക് ഇരയായി കൊല്ലപ്പെട്ടത്. വെങ്കണ്ണ നായിഡുവിന്റെ ഭാര്യ സൗജന്യയ്ക്കാണ് ഗുരുതരമായി പരിക്കേറ്റത്. ഇവരുടെ മകൻ സായി നായിഡു (18) ആണ് ഈ ദാരുണമായ കൊലപാതകം നടത്തിയത്.
പോലീസ് നൽകുന്ന വിവരമനുസരിച്ച്, വെങ്കണ്ണ നായിഡുവും ഭാര്യയും മക്കളും ഒരു മുറിയിലും, വെങ്കണ്ണയുടെ പ്രായമായ മാതാപിതാക്കൾ മറ്റൊരു മുറിയിലുമാണ് ഉറങ്ങിയിരുന്നത്. രാത്രിയോടെ മുറിയിൽ നിന്ന് പെട്ടെന്ന് നിലവിളിയും ബഹളവും കേട്ടാണ് വെങ്കണ്ണയുടെ പിതാവ് ഉണർന്നത്. എന്നാൽ ഈ മുറി അകത്തുനിന്ന് പൂട്ടിയ നിലയിലായിരുന്നു. തുടർന്ന് ഇദ്ദേഹം അയൽക്കാരെ വിവരമറിയിക്കുകയും അവർ ഓടിയെത്തി വാതിൽ തകർത്ത് അകത്തുകയറിയപ്പോൾ രക്തത്തിൽ കുളിച്ചുകിടക്കുന്ന കുടുംബത്തെയാണ് കണ്ടത്. മുറിയിലെ ലൈറ്റുകൾ അണച്ച ശേഷമാണ് സായി നായിഡു ഉറങ്ങിക്കിടക്കുകയായിരുന്ന കുടുംബാംഗങ്ങളെ ഓരോരുത്തരെയായി കത്തികൊണ്ട് ക്രൂരമായി ആക്രമിച്ചതെന്ന് പോലീസ് പറഞ്ഞു.
ഗുരുതരമായി കുത്തേറ്റ സഹോദരി പ്രഗതി സംഭവസ്ഥലത്തുതന്നെ രക്തം വാർന്ന് മരിച്ചു. അച്ഛൻ വെങ്കണ്ണ നായിഡു ബല്ലാരി ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് ആശുപത്രിയിൽ ചികിത്സയിലിരിക്കെയാണ് മരണത്തിന് കീഴടങ്ങിയത്. കഴുത്തിനും തലയ്ക്കും മാരകമായി പരിക്കേറ്റ അമ്മ സൗജന്യ ഇപ്പോഴും ഇതേ ആശുപത്രിയിൽ അതീവ ഗുരുതരാവസ്ഥയിൽ തുടരുകയാണ്. കുടുംബാംഗങ്ങളെ ആക്രമിച്ച ശേഷം സായി നായിഡു സ്വന്തം കഴുത്തറുത്ത് ആത്മഹത്യയ്ക്ക് ശ്രമിക്കുകയായിരുന്നു. ഇയാളും ബിംസ് ആശുപത്രിയിൽ പോലീസ് കാവലിൽ ചികിത്സയിലാണ്.
പ്രതിയായ സായി നായിഡു കടുത്ത ഓൺലൈൻ ഗെയിം അടിമയായിരുന്നുവെന്നാണ് പ്രാഥമിക വിവരം. ഗെയിം കളിക്കുന്നതിനെച്ചൊല്ലി വീട്ടിൽ നിരന്തരം വഴക്കുണ്ടായിരുന്നോ എന്നും, ഇതാണോ കൊലപാതകത്തിലേക്ക് നയിച്ച കൃത്യമായ കാരണമെന്നും ഗംഗാവതി പോലീസ് വിശദമായി അന്വേഷിച്ചുവരികയാണ്. ആശുപത്രിയിൽ കഴിയുന്ന പ്രതിയെ ചോദ്യം ചെയ്യാനുള്ള നടപടികൾ പോലീസ് ആരംഭിച്ചിട്ടുണ്ട്.