ഷാർജ– ഫറജ് ഫണ്ടുമായി സഹകരിച്ച് 13 തടവുകാരുടെ കുടിശ്ശികകൾ തീർത്തു മോചിപ്പിച്ച് ഷാർജാ പോലീസ്. 21-ാമത് ഫാമിലി ഫോറത്തിലാണ് തടവുകാർക്ക് പുതിയൊരു തുടക്കത്തിലേക്ക് വഴിയൊരുക്കിയത്. ശിക്ഷണ, പുനരധിവാസ സ്ഥാപന വകുപ്പ് നടത്തിയ പരിപാടിയിൽ രാജ്യത്തുള്ള 47 തടവുകാരുടെ കുടുംബങ്ങൾ പങ്കെടുത്തു.
കുടുംബബന്ധങ്ങൾ ശക്തിപ്പെടുത്തുന്നതിനും തടവുകാരെ സമൂഹത്തിലേക്കുള്ള ക്രിയാത്മകമായ പുനഃസംയോജനത്തെ പിന്തുണയ്ക്കുന്നതിനും ലക്ഷ്യമിട്ടുള്ള ഫോറത്തിൽ, കമ്മ്യൂണിറ്റി പ്രൊട്ടക്ഷൻ ആൻഡ് പ്രിവൻഷൻ വകുപ്പ് ഡയറക്ടർ ജനറൽ ബ്രിഗേഡിയർ ഡോ. അഹമ്മദ് സയീദ് അൽ നൗർ, ശിക്ഷണ, പുനരധിവാസ സ്ഥാപന വകുപ്പ് ഡയറക്ടർ ബ്രിഗേഡിയർ അബ്ദുല്ല റാഷിദ് അലേ, നിരവധി ഉദ്യോഗസ്ഥർ എന്നിവർ പങ്കെടുത്തു.
കുടുംബ ബന്ധങ്ങളും സാമൂഹിക സന്തുലിതാവസ്ഥയും പരിപോഷിപ്പിക്കുന്നതിനുള്ള ഷാർജ പോലീസിന്റെ പ്രതിബദ്ധതയാണ് ഫോറം പ്രതിഫലിപ്പിക്കുന്നതെന്ന് ബ്രിഗേഡിയർ ഡോ. അൽ നൗർ പറഞ്ഞു. ‘പുനരധിവാസം നിയമപരമായ നടപടികൾ മാത്രമല്ല. തടവുകാരുടെ ജീവിതത്തിലെ മാനസിക, സാമൂഹിക, മാനുഷിക വശങ്ങളിലും ഇത് ശ്രദ്ധ കേന്ദ്രീകരിക്കുന്നു,’ അദ്ദേഹം കൂട്ടിച്ചേർത്തു.
തടവുകാർക്ക് പുതിയൊരു തുടക്കം നൽകുന്നതിൽ ഒരു നല്ല ചുവടുവയ്പ്പാണ് ഈ സംരംഭമെന്ന് ബ്രിഗേഡിയർ അബ്ദുല്ല റാഷിദ് അലൈ വിശേഷിപ്പിച്ചു. കുടുംബങ്ങളെ വീണ്ടും ബന്ധിപ്പിക്കുന്നതിനും തടവുകാരുടെ ശോഭനമായ ഭാവിയെ പിന്തുണയ്ക്കുന്നതിനും ഫോറത്തിന്റെ പ്രാധാന്യം അദ്ദേഹം എടുത്തുപറഞ്ഞു. പുനരധിവാസ പരിപാടികളുടെ മാനുഷിക വശത്തിന് മുൻഗണന നൽകുന്നതിനുള്ള ഷാർജ പോലീസിന്റെ നിരന്തരമായ ശ്രമങ്ങളെ പ്രതിഫലിപ്പിക്കുന്ന തരത്തിൽ, തടവുകാർക്ക് അവരുടെ കുടുംബങ്ങളെ കാണാനും അവരുമായി ഇടപഴകാനും ശാന്തവും ആശ്വാസകരവുമായ ഒരു ഇടം ഫോറം നൽകി.