ദുബായ് : ഒരു സിനിമയുടെയും വിജയം തലയിൽ കയറാതിരുന്നാൽ സമ്മർദമില്ലാതെ പുതിയസിനിമകളിൽ അഭിനയിക്കാമെന്ന് നടൻ മമ്മൂട്ടി. ഓരോ സിനിമയും തന്റെ ആദ്യ സിനിമയാണെന്നരീതിയിലാണ് അഭിനയിക്കുന്നതെന്നും അദ്ദേഹം പറഞ്ഞു.
മിഥുൻ മാനുവൽ തോമസിന്റെ തിരക്കഥയിൽ വൈശാഖ് സംവിധാനം ചെയ്ത ‘ടർബോ’ എന്ന ചലച്ചിത്രത്തിന്റെ പ്രചാരണവുമായി ബന്ധപ്പെട്ട് ദുബായിൽ നടത്തിയ പത്രസമ്മേളനത്തിൽ സംസാരിക്കുകയായിരുന്നു മമ്മൂട്ടി.
ടർബോ എന്ന ചിത്രം എല്ലാതരം പ്രേക്ഷകർക്കും ആസ്വദിക്കാവുന്ന ഒന്നാണെന്ന് വിശ്വസിക്കുന്നതായും അദ്ദേഹം പറഞ്ഞു. ഇതുവരെയുള്ളതിൽവെച്ച് തന്റെ ഏറ്റവും വലിയ ചലച്ചിത്രമാണ് ടർബോയെന്ന് തിരക്കഥാകൃത്ത് മിഥുൻ മാനുവൽ തോമസ് പറഞ്ഞു. പ്രേക്ഷകരുടെ പ്രതികരണത്തെക്കുറിച്ച് ഭയവും ആകാംക്ഷയുമുണ്ടെന്നും അദ്ദേഹം പറഞ്ഞു.
നടൻ രാജ് ബി. ഷെട്ടി, നടി അഞ്ജന ജയപ്രകാശ്, ചിത്രം ഗൾഫിൽ വിതരണം ചെയ്യുന്ന ട്രൂത്ത് ഗ്ലോബൽ ഫിലിംസിന്റെ അബ്ദുൽ സമദ്, വൈശാഖ് എന്നിവരും പത്രസമ്മേളനത്തിൽ .പങ്കെടുത്തു. 23-നാണ് കേരളത്തിലും ഗൾഫിലും ചിത്രം റിലീസ് ചെയ്യുന്നത്.