ദുബൈ – കൈറ്റ് ബീച്ചിലെ സ്പോർട്സ് ട്രാക്കുകളിൽ നിയമലംഘനങ്ങൾ നടത്തിയതിനെ തുടർന്ന് ദുബൈ പോലീസ് 90 പേരെ അറസ്റ്റ് ചെയ്യുകയും ഇ-ബൈക്കുകൾ കണ്ടുകെട്ടുകയും ചെയ്തു. ഇത്തരക്കാർ നടത്തുന്ന അഭ്യാസങ്ങൾ റൈഡർമാർക്ക് മാത്രമല്ല, ചുറ്റുമുള്ള ആളുകൾക്കും അപകടകരമാണെന്ന് ദുബൈ പോലീസ് എക്സ് പോസ്റ്റിലൂടെ വിശദീകരിച്ചു.
നിയമവും സുരക്ഷാ നടപടിക്രമങ്ങളും ലംഘിക്കുന്നവർക്കെതിരെ ആവശ്യമായ നടപടികൾ സ്വീകരിക്കുന്നതിൽ ഒരു തരത്തിലുള്ള വിട്ടുവീഴ്ചയും കാണിക്കില്ലെന്നും പോലീസ് പറഞ്ഞു. കാറുകളേക്കാൾ പരിസ്ഥിതി സൗഹൃദമായ ഇ-ബൈക്കുകൾ ആളുകൾക്ക് ചെറിയ ദൂര യാത്രകൾ എളുപ്പമാക്കുന്നുണ്ടെങ്കിലും ജാഗ്രത പാലിക്കണമെന്ന് അധികൃതർ ആവശ്യപ്പെടുന്നു.
കഴിഞ്ഞയാഴ്ച, ദുബൈ റോഡ്സ് ആന്റ് ട്രാൻസ്പോർട്ട് അതോറിറ്റി ഇത്തരം വാഹനങ്ങളുടെ സുരക്ഷിതമായ ഉപയോഗത്തിനുള്ള നിയമങ്ങൾ ഉണർത്തി. ഇ-സ്കൂട്ടർ ട്രാക്കുകളിലെ സൈൻബോർഡുകളിൽ പ്രദർശിപ്പിച്ചിരിക്കുന്ന വേഗത പരിധി പാലിക്കുക, നിർദിഷ്ട പാതകൾക്കും പങ്കിട്ട പാതകൾക്കും പുറത്ത് വാഹനമോടിക്കുന്നത് ഒഴിവാക്കുക, എല്ലായ്പ്പോഴും ഹെൽമെറ്റും പ്രതിഫലിപ്പിക്കുന്നതോ തിളക്കമുള്ളതോ ആയ വസ്ത്രങ്ങളും ഉൾപ്പെടെയുള്ള സുരക്ഷാ ഉപകരണങ്ങൾ ധരിക്കുക, മറ്റ് ഇസ്കൂട്ടറുകൾ, സൈക്കിളുകൾ, കാൽനടയാത്രക്കാർ എന്നിവരിൽ നിന്ന് സുരക്ഷിതമായ അകലം കാത്തുസൂക്ഷിക്കുക, എന്നീ കാര്യങ്ങൾ ഇ-ബൈക്കുകളും ഇ-സ്കൂട്ടറുകളും ഓടിക്കുന്നവർ പാലിക്കണം.