ദുബൈ – മരണവുമായി ബന്ധപ്പെട്ട എല്ലാ നടപടിക്രമങ്ങളും ഒരൊറ്റ സമ്പര്ക്ക കേന്ദ്രത്തിലൂടെ കൈകാര്യം ചെയ്യുന്ന പുതിയ സംയോജിത പ്ലാറ്റ്ഫോം ദുബൈ ആരംഭിച്ചു. ഏറ്റവും ദുഷ്കരമായ സമയത്ത് ഒന്നിലധികം സര്ക്കാര് വകുപ്പുകളെ സമീപിക്കേണ്ടതില് നിന്ന് ഇത് ഒഴിവാക്കുന്നു. ദുബൈ ഹെല്ത്ത് അതോറിറ്റി തിങ്കളാഴ്ചയാണ് ജബര് സംവിധാനം പ്രഖ്യാപിച്ചത്. പുതിയ ചട്ടക്കൂടിന് കീഴില്, മരണവുമായി ബന്ധപ്പെട്ട ഔപചാരിക നടപടിക്രമങ്ങള് പൂര്ത്തിയാക്കാന് കുടുംബങ്ങള്ക്ക് ഇനി ഒന്നിലധികം സ്ഥാപനങ്ങള് സന്ദര്ശിക്കേണ്ടതില്ല. പകരം, മയ്യിത്ത് സംസ്കാര ക്രമീകരണങ്ങള് മുതല് കുടുംബത്തിന് വേണ്ടി മൃതദേഹങ്ങള് നാട്ടിലേക്ക് കൊണ്ടുപോകുന്നത് വരെയുള്ള എല്ലാ നടപടിക്രമങ്ങളും കൈകാര്യം ചെയ്യാന് ഓരോ കേസിലും ഒരു സമര്പ്പിത സര്ക്കാര് സേവന ഉദ്യോഗസ്ഥനെ നിയോഗിക്കുകയാണ് ചെയ്യുക.
ഏതെങ്കിലും സര്ക്കാര്, സ്വകാര്യ ആശുപത്രിയില് മരണം രജിസ്റ്റര് ചെയ്യുമ്പോള് ബന്ധപ്പെട്ട എല്ലാ വകുപ്പുകളെയും യാന്ത്രികമായി അറിയിക്കുന്ന ഏകീകൃത ഡിജിറ്റല് പ്ലാറ്റ്ഫോം വഴിയാണ് പുതിയ സംവിധാനം പ്രവര്ത്തിക്കുന്നത്. ഇത് വേഗത്തിലുള്ള സേവനം ഉറപ്പാക്കുന്നു. കുടുംബങ്ങള് ആവര്ത്തിച്ച് രേഖകള് ഹാജരാക്കേണ്ടതില്ലാതെ മരണ സര്ട്ടിഫിക്കറ്റുകള് സ്വയമേവ ഇഷ്യു ചെയ്യുകയും വിതരണം നടത്തുകയും ചെയ്യുന്നു. മൃതദേഹങ്ങള് വിദേശത്തേക്ക് കൊണ്ടുപോകാനുള്ള നടപടിക്രമങ്ങള് ഇത് വേഗത്തിലാക്കും. മയ്യിത്ത് സംസ്കരണ സേവനങ്ങള് പൂര്ത്തിയാക്കുന്നതിന് ആവശ്യമായ സമയം ഗണ്യമായി കുറക്കുന്നു.
ജബര് സംവിധാനം ആളുകളെ ദുബൈ സര്ക്കാരിന്റെ മുന്പന്തിയില് നിര്ത്താനുള്ള സര്ക്കാരിന്റെ അഗാധമായ പ്രതിബദ്ധതയെ പ്രതിഫലിപ്പിക്കുന്നതായി ദുബൈ ഹെല്ത്ത് അതോറിറ്റി ഡയറക്ടര് ജനറല് ഡോ. അലവി അല്ശൈഖ് അലി പറഞ്ഞു. ദുഃഖിതരായ കുടുംബങ്ങള്ക്ക് യഥാര്ത്ഥത്തില് ആവശ്യമായ പരിചരണവും ശ്രദ്ധയും പ്രായോഗിക പിന്തുണയും ലഭിക്കുന്നുണ്ടെന്ന് ഇത് ഉറപ്പാക്കുന്നതായും ഡോ. അലവി അല്ശൈഖ് അലി കൂട്ടിചേർത്തു.
പിന്തുണയും അനുകമ്പയും നല്കുന്ന ഉപഭോക്തൃ അനുഭവം നല്കുക എന്നതാണ് ഞങ്ങളുടെ ലക്ഷ്യം. ഭരണപരമായ നടപടിക്രമങ്ങള് പൂര്ത്തിയാക്കുന്നതില് സേവനം പരിമിതപ്പെടുന്നില്ല. ഇപ്പോള് അത് അനുശോചന കാലയളവിന് മുമ്പും, സമയത്തും, ശേഷവും കുടുംബത്തിന് മാനസികവും സാമൂഹികവുമായ പിന്തുണ നല്കുന്നതിലേക്ക് വ്യാപിക്കുന്നതായി ദുബൈ ഹെല്ത്ത് അതോറിറ്റി ഇന്ഫര്മേഷന് ടെക്നോളജി ഡിപ്പാര്ട്ട്മെന്റ് ഡയറക്ടറും ജബര് സംവിധാനത്തിന്റെ ഔദ്യോഗിക വക്താവുമായ മാജിദ് അല്മുഹൈരി പറഞ്ഞു.
ദുഃഖിതരായ കുടുംബങ്ങള്ക്ക് സമഗ്ര പിന്തുണ നല്കാനായി ജബര് സിസ്റ്റം ഒന്നിലധികം സര്ക്കാര് വകുപ്പുകളെ സംയോജിപ്പിക്കുന്നുണ്ട്. ഇവരുമായി ചേര്ന്ന് പ്രവര്ത്തിക്കുന്ന കമ്മ്യൂണിറ്റി ഡെവലപ്മെന്റ് അതോറിറ്റി ഇപ്പോള് സ്വദേശി കുടുംബങ്ങള്ക്ക് മൂന്ന് ദിവസത്തെ ദുഃഖാചരണ കാലയളവിലേക്ക് പൂര്ണ ഹോസ്പിറ്റാലിറ്റി സേവനങ്ങൾ നല്കുന്നു. ഇസ്ലാമിക് അഫയേഴ്സ് ആന്റ് ചാരിറ്റബിള് ആക്ടിവിറ്റീസ് ഡിപ്പാര്ട്ട്മെന്റുമായി ഏകോപിപ്പിച്ച് ദുബൈ ഹെല്ത്ത് അതോറിറ്റി ഇന്ഫര്മേഷന് ടെക്നോളജി ഡിപ്പാര്ട്ട്മെന്റ് ഡയറക്ടറും ജബര് സംവിധാനത്തിന്റെ ഔദ്യോഗിക വക്താവുമായ മാജിദ് ദുബൈലുടനീളം 70 ലേറെ സ്ഥലങ്ങള് അനുശോചന കൂടാരങ്ങള്ക്കായി നിയുക്തമാക്കിയിട്ടുണ്ട്. പ്രവാസി കുടുംബങ്ങള്ക്കായി, എട്ട് പൊതു-ആനുകൂല്യ സംഘടനകളും ആരാധനാലയങ്ങളും അനുശോചന സഹായം നല്കാനായി സഹകരിക്കുന്നു. ഇതുമായി ബന്ധപ്പെട്ട വിശദാംശങ്ങള് നിയുക്ത സര്ക്കാര് സേവന ഉദ്യോഗസ്ഥന് നേരിട്ട് പങ്കിടും.
മരണപ്പെട്ടവരുടെ കുടുംബത്തിലെ വിദ്യാര്ഥികളെ പിന്തുണക്കാനായി നോളജ് ആന്റ് ഹ്യൂമന് ഡെവലപ്മെന്റ് അതോറിറ്റി ദുബൈ അക്കാദമിക് ഹെല്ത്ത് കോര്പ്പറേഷനുമായി ഏകോപിപ്പിച്ച് 230 സ്കൂള് കൗണ്സിലര്മാർക്ക് പരിശീലനം നൽകി. യോഗ്യതയുള്ള മത കൗണ്സിലര്മാര് വഴി മരണപ്പെട്ടവരുടെ കുടുംബങ്ങള്ക്ക് ഇസ്ലാമിക് അഫയേഴ്സ് ആന്റ് ചാരിറ്റബിള് ആക്ടിവിറ്റീസ് ഡിപ്പാര്ട്ട്മെന്റ് ഓപ്ഷണല് മത പ്രഭാഷണങ്ങളും വാഗ്ദാനം ചെയ്യുന്നു.
കുടുംബങ്ങളിലെ മാനസികവും സാമ്പത്തികവുമായ സമ്മര്ദങ്ങള് കുറക്കുന്ന തരത്തില് ദൈനംദിന സേവനങ്ങളില് ഡിജിറ്റല് പരിഹാരങ്ങള് സംയോജിപ്പിച്ച് ജീവിത നിലവാരം മെച്ചപ്പെടുത്താനുള്ള ദുബൈ സര്ക്കാരിന്റെ പ്രതിബദ്ധതയാണ് ഈ നടപടി പ്രതിഫലിപ്പിക്കുന്നതെന്ന് ദുബൈ ഹെല്ത്ത് അതോറിറ്റിയിലെ പബ്ലിക് ഹെല്ത്ത് പ്രൊട്ടക്ഷന് ഡിപ്പാര്ട്ട്മെന്റ് കണ്സള്ട്ടന്റായ ജുമാ അല്ബലൂശി പറഞ്ഞു.
ഏകീകൃത പേയ്മെന്റ് പോയിന്റ് സിസ്റ്റവും ഈ പ്ലാറ്റ്ഫോമിൽ ഉള്പ്പെടുന്നു.
ദുബൈ കോടതികള്ക്ക് നേരിട്ട് ഹാജരാകേണ്ടതില്ലാതെ എസ്റ്റേറ്റ് ഫയലുകള് മുന്കൂട്ടി തുറക്കുന്നു. മരണ സര്ട്ടിഫിക്കറ്റ് നല്കുമ്പോള് എസ്റ്റേറ്റ് തയ്യാറാക്കല് ഫയല് സ്വയമേവ രജിസ്റ്റര് ചെയ്യപ്പെടും. അവകാശികള്ക്ക് അനന്തരാവകാശ രേഖകള് സുഗമമായി മുന്നോട്ട് കൊണ്ടുപോകാന് പ്രാപ്തമാക്കുന്നതിന് ബന്ധപ്പെട്ട അധികാരികള് ആസ്തികളുടെ കണക്കെടുപ്പും നടത്തുന്നു.
മയ്യിത്തുകള് കുളിപ്പിച്ച് കഫന് ചെയ്യുന്നതിനുള്ള യോഗ്യതാ പ്രോഗ്രാമിലൂടെ 130 ലേറെ വളണ്ടിയര്മാര്ക്ക് ഇസ്ലാമിക് അഫയേഴ്സ് ആന്റ് ചാരിറ്റബിള് ആക്ടിവിറ്റീസ് ഡിപ്പാര്ട്ട്മെന്റ് പരിശീലനം നല്കിയിട്ടുണ്ട്. ദുബൈ മുനിസിപ്പാലിറ്റിയുമായി ഏകോപിപ്പിച്ച് സ്റ്റാന്ഡേര്ഡ് ചെയ്ത ഷ്രൗഡ് കിറ്റുകള്, സമഗ്രമായ ഖബര്സ്ഥാന് മാനേജ്മെന്റ് ഗൈഡുകള്, ഒന്നിലധികം ഖബര്സ്ഥാനുകളിലെ നവീകരിച്ച സൗകര്യങ്ങള് എന്നിവ ഈ സംരംഭത്തില് ഉള്പ്പെടുന്നു.
ദുബൈയുടെ ഡിജിറ്റല് പരിണാവുമായി പുതിയ നീക്കം ഒത്തുപോകുന്നതായി മാജിദ് അല്മുഹൈരി പറഞ്ഞു. നൂതന സാങ്കേതികവിദ്യകള്, സ്മാര്ട്ട് സൊല്യൂഷനുകള്, ലോകോത്തര നിലവാരങ്ങള് എന്നിവ ഉപയോഗിച്ച് സേവനങ്ങള് സംയോജിപ്പിക്കുകയും ഏകോപിപ്പിക്കുകയും ലളിതമാക്കുകയും ചെയ്തിട്ടുണ്ട്. ഒന്നിലധികം വകുപ്പുകള് സന്ദര്ശിക്കേണ്ട ആവശ്യമില്ലാതെ തന്നെ എല്ലാ നടപടിക്രമങ്ങളും സുഗമമായും വേഗത്തിലും പൂര്ത്തിയാക്കാന് ഇത് കുടുംബങ്ങളെ പ്രാപ്തമാക്കുന്നുവെന്ന് മാജിദ് അല്മുഹൈരി വ്യക്തമാക്കി.