ദുബായ്- ഗൾഫ് മേഖലയിലെ സംഘർഷത്തിന്റെ പശ്ചാതലത്തിൽ താൽക്കാലികമായി അടച്ചിട്ടിരുന്ന വ്യോമപാത ദുബായ് തുറന്നു. ദുബായ് വിമാനത്താവളത്തിൽനിന്ന് ഇന്ത്യയിലേക്ക് അടക്കം സർവീസ് പുനരാരംഭിച്ചു. അബുദാബി വിമാനത്താവളത്തിലും സർവീസ് തുടങ്ങി. മറ്റു വിമാനതാവളങ്ങളിൽനിന്നും വൈകാതെ സർവീസ് ആരംഭിക്കുമെന്നാണ് അനൗദ്യോഗിക വിവരം. ഏഷ്യയിലേക്കുള്ള വ്യോമപാതയാണ് തുടക്കത്തിൽ തുറന്നത്. അബുദാബി- മുംബൈ ഇൻഡിഗോ സർവീസ് തുടങ്ങി. ഉടൻ മറ്റ് വിമാനങ്ങളും സർവീസ് തുടങ്ങും.
മേഖലയിലെ പുതിയ സംഭവവികാസങ്ങളുടെ പശ്ചാത്തലത്തില്‍ മുന്‍കരുതല്‍ നടപടിയായി രാജ്യത്തിന്റെ വ്യോമാതിര്‍ത്തിയില്‍ വ്യോമഗതാഗതം താല്‍ക്കാലികമായി നിര്‍ത്തിവെച്ചതായി ബഹ്റൈന്, യു.എ.ഇ, ഖത്തർ, കുവൈത്ത് എന്നീ രാജ്യങ്ങൾ നേരത്തെ അറിയിച്ചിരുന്നു. ഖത്തറിലെ അല്‍ഉദൈദ് യു.എസ് വ്യോമതാവളത്തില്‍ ഇറാന്‍ മിസൈല്‍ ആക്രമണം നടത്തിയതിനു പിന്നാലെയാണ് ബഹ്റൈന് തങ്ങളുടെ വ്യോമാതിര്‍ത്തി അടച്ചത്. അന്താരാഷ്ട്ര പങ്കാളികളുമായി ഏകോപിച്ച് ബന്ധപ്പെട്ട വകുപ്പുകള്‍ 24 മണിക്കൂറും സംഭവവികാസങ്ങള്‍ നിരീക്ഷിച്ചുകൊണ്ടിരിക്കുകയാണ്. സുരക്ഷ ഉറപ്പാക്കാന്‍ ഔദ്യോഗിക വകുപ്പുകള്‍ നല്‍കുന്ന നിര്‍ദേശങ്ങള്‍ എല്ലാവരും പാലിക്കണമെന്നും സിവില്‍ ഏവിയേഷന്‍ അഫയേഴ്സ് വകുപ്പ് പറഞ്ഞു.