റിയാദ്: മേഖലയിൽ സംഘർഷം കടുക്കുന്ന പശ്ചാത്തലത്തിൽ, സൗദി അറേബ്യയിലെ വിമാനത്താവളങ്ങൾക്ക് നേരെ ആക്രമണങ്ങൾക്കും വ്യോമപാതകൾ അടയ്ക്കുന്നതിനും വിമാന സർവീസുകൾ തടസ്സപ്പെടുന്നതിനും സാധ്യതയുണ്ടെന്ന് യു.എസ് എംബസിയുടെ മുന്നറിയിപ്പ്. സൗദിയിലുള്ള അമേരിക്കൻ പൗരന്മാർക്ക് ജാഗ്രതാ നിർദേശം നൽകിക്കൊണ്ടാണ് എംബസി സുരക്ഷാ മുന്നറിയിപ്പ് പുറപ്പെടുവിച്ചിരിക്കുന്നത്.
2026 ഒക്ടോബർ 30-ന് പുറപ്പെടുവിച്ച അറിയിപ്പിൽ, സുരക്ഷാ ഭീഷണികൾ കണക്കിലെടുത്ത് അടിയന്തര സ്വഭാവമില്ലാത്ത സർക്കാർ ജീവനക്കാരോടും അവരുടെ കുടുംബാംഗങ്ങളോടും സൗദി അറേബ്യ വിട്ടുപോകാൻ യു.എസ് സ്റ്റേറ്റ് ഡിപ്പാർട്ട്‌മെന്റ് നിർദേശിച്ചതായി യു.എസ് മിഷൻ വ്യക്തമാക്കി. ഒക്ടോബർ 23 മുതൽ ഈ നിർദേശം പ്രാബല്യത്തിലുണ്ട്. ഇറാൻ പിന്തുണയുള്ള ഹൂത്തി വിമതർ സിവിലിയൻ വിമാനത്താവളങ്ങൾക്കും സുപ്രധാന അടിസ്ഥാന സൗകര്യങ്ങൾക്കും നേരെ നടത്തിയ ആക്രമണങ്ങൾ മൂലം ആളപായവും യാത്രാ തടസ്സങ്ങളും ഉണ്ടായതായി മുന്നറിയിപ്പിൽ ചൂണ്ടിക്കാണിക്കുന്നു. നിലവിലെ സംഘർഷ മേഖലകൾക്ക് പുറത്തേക്കും ഭീഷണി അതിവേഗം വ്യാപിക്കാൻ സാധ്യതയുണ്ടെന്ന് അറിയിപ്പിലുണ്ട്.
വിമാന സർവീസുകളിലെ മാറ്റങ്ങൾ
- റിയാദ്: കിംഗ് ഖാലിദ് അന്താരാഷ്ട്ര വിമാനത്താവളം ഒക്ടോബർ 23-ന് ഭാഗികമായി തുറന്നു. ആഭ്യന്തര സർവീസുകൾക്കും സൗദി ദേശീയ വിമാനക്കമ്പനികൾ നടത്തുന്ന ചില അന്താരാഷ്ട്ര സർവീസുകൾക്കുമാണ് നിലവിൽ ഇവിടെ അനുമതി നൽകിയിരിക്കുന്നത്. റിയാദിൽ നിന്ന് സർവീസ് നടത്തേണ്ട ചില വിമാനങ്ങൾ നിലവിൽ അൽഖസീമിലെ പ്രിൻസ് നായിഫ് അന്താരാഷ്ട്ര വിമാനത്താവളം വഴിയാണ് സർവീസ് നടത്തുന്നത്.
- ജിദ്ദ & ദമാം: ജിദ്ദ കിംഗ് അബ്ദുൽ അസീസ്, ദമാം കിംഗ് ഫഹദ് അന്താരാഷ്ട്ര വിമാനത്താവളങ്ങൾ പ്രവർത്തിക്കുന്നുണ്ടെങ്കിലും, ചില വിമാനങ്ങൾ വൈകുകയോ റദ്ദാക്കുകയോ ചെയ്യുന്നുണ്ട്.
യാത്രതിരിക്കുന്നതിന് മുൻപ് വിമാനങ്ങളുടെ നിലവിലെ വിവരങ്ങൾ അതത് എയർലൈനുകളുമായോ വിമാനത്താവള അധികൃതരുമായോ നേരിട്ട് ബന്ധപ്പെട്ട് ഉറപ്പുവരുത്തണമെന്ന് യു.എസ് എംബസി നിർദേശിച്ചു.
യു.എസ് ജീവനക്കാർക്ക് യാത്രാവിലക്ക്
സൗദി അറേബ്യയിൽ ജോലി ചെയ്യുന്ന യു.എസ് സർക്കാർ ജീവനക്കാർക്ക് രാജ്യത്തെ ഏതെങ്കിലും വിമാനത്താവളം ഉപയോഗിക്കുന്നതിന് ചീഫ് ഓഫ് മിഷനിൽ നിന്ന് പ്രത്യേക അനുമതി ആവശ്യമാണ്. കൂടാതെ, യെമൻ അതിർത്തിയുടെ 20 മൈൽ ചുറ്റളവിൽ യാത്ര ചെയ്യുന്നതിനും വിലക്കുണ്ട്. ജിസാൻ, അസീർ, നജ്റാൻ പ്രവിശ്യകളിലേക്കും ഖതീഫ്, യാംബു, തായിഫ് എന്നിവിടങ്ങളിലേക്കും യാത്ര ചെയ്യുന്നതിന് പ്രത്യേക അനുമതി വേണം.
കര അതിർത്തികളും ബദൽ മാർഗങ്ങളും
സൗദിയെയും ബഹ്റൈനെയും ബന്ധിപ്പിക്കുന്ന കിംഗ് ഫഹദ് കോസ്‌വേ ഉൾപ്പെടെയുള്ള സൗദിയുടെ എല്ലാ കര അതിർത്തികളും നിലവിൽ തുറന്നുപ്രവർത്തിക്കുന്നുണ്ട്. റിയാദ്, ജിദ്ദ, ദഹ്റാൻ എന്നിവിടങ്ങളിലെയും പരിസര പ്രദേശങ്ങളിലെയും ഹൈവേകളും റോഡുകളും പ്രവർത്തനക്ഷമമാണ്. വിമാനയാത്രയ്ക്ക് പകരമായി സ്വകാര്യ വാഹനങ്ങൾ, ട്രെയിനുകൾ, ബസുകൾ എന്നിവ ഉപയോഗപ്പെടുത്താവുന്നതാണ്. സൗദി അറേബ്യ റെയിൽവേയ്സ്, സാപ്റ്റ്കോ (SAPTCO), എസ്.എ.ടി ബസ് സർവീസുകൾ എന്നിവ ഇതിനായി ആശ്രയിക്കാം.
അയൽരാജ്യങ്ങളായ ബഹ്റൈൻ, ജോർദാൻ, ഒമാൻ, ഖത്തർ, യു.എ.ഇ എന്നിവിടങ്ങളിലെ പ്രമുഖ വിമാനത്താവളങ്ങൾ (ബഹ്റൈൻ, അമ്മാനിലെ ക്വീൻ ആലിയ, മസ്‌കത്ത്, ദോഹ, അബുദാബി, ദുബായ്, ഷാർജ) നിലവിൽ പ്രവർത്തനക്ഷമമാണെന്ന് റിപ്പോർട്ടുണ്ട്.
കർശന നിർദേശങ്ങളും മുന്നറിയിപ്പും
മിസൈലുകളും ഡ്രോണുകളും തടഞ്ഞുതകർക്കുന്ന ദൃശ്യങ്ങളോ അവയുടെ ആഘാത പ്രദേശങ്ങളുടെ ചിത്രങ്ങളോ പകർത്തുന്നതും പ്രചരിപ്പിക്കുന്നതും സൗദി ആഭ്യന്തര മന്ത്രാലയം കർശനമായി നിരോധിച്ചിട്ടുണ്ടെന്ന് മിഷൻ ഓർമ്മിപ്പിച്ചു. സർക്കാർ കെട്ടിടങ്ങൾ, വിമാനത്താവളങ്ങൾ, ആക്രമണങ്ങൾ നടന്ന സ്ഥലങ്ങൾ എന്നിവയുടെ ഫോട്ടോ എടുത്തതിനെ തുടർന്ന് ചില അമേരിക്കൻ പൗരന്മാരെ സൗദി സുരക്ഷാ വിഭാഗം കസ്റ്റഡിയിലെടുത്തിട്ടുള്ള സാഹചര്യമുണ്ടായിട്ടുണ്ട്. അതിനാൽ രാജ്യത്തെ നിയമങ്ങൾ എല്ലാവരും കർശനമായി പാലിക്കണം.
നിർദേശങ്ങൾ ഒറ്റനോട്ടത്തിൽ:
- പ്രാദേശിക മാധ്യമങ്ങൾ നിരീക്ഷിക്കുകയും സൗദി അധികൃതരുടെ നിർദേശങ്ങൾ പാലിക്കുകയും ചെയ്യുക.
- സൗദി സിവില്‍ ഡിഫൻസിന്റെ മൊബൈൽ ബ്രോഡ്കാസ്റ്റ് സിസ്റ്റം വഴിയുള്ള സുരക്ഷാ അലേർട്ടുകൾ ശ്രദ്ധിക്കുക.
- പ്രതിഷേധങ്ങൾ, വൻ ജനക്കൂട്ടം, കനത്ത പോലീസ് സാന്നിധ്യമുള്ള സ്ഥലങ്ങൾ എന്നിവ ഒഴിവാക്കുക.
- മൊബൈൽ ഫോണുകൾ എപ്പോഴും ചാർജ് ചെയ്തുവെക്കുകയും അടിയന്തര നമ്പറുകൾ കൈവശം സൂക്ഷിക്കുകയും ചെയ്യുക.
- വ്യോമാക്രമണ സാഹചര്യമുണ്ടായാൽ ജനാലകൾ, ഗ്ലാസ് വാതിലുകൾ, അവശിഷ്ടങ്ങൾ എന്നിവയിൽ നിന്ന് അകന്നുനിൽക്കുക.
- യു.എസ് ബന്ധമുള്ള സ്ഥാപനങ്ങൾക്ക് സമീപം ജാഗ്രത പാലിക്കുക.
റിയാദിലെ യു.എസ് എംബസി, ജിദ്ദ, ദഹ്റാൻ എന്നിവിടങ്ങളിലെ കോൺസുലേറ്റുകൾ എന്നിവ വഴി അമേരിക്കൻ പൗരന്മാർക്ക് അടിയന്തര കോൺസുലാർ സേവനങ്ങൾ തുടർന്നും ലഭ്യമാകുമെന്നും അറിയിപ്പിൽ പറയുന്നു.