റിയാദ് – റിയാദ് സീസണ്‍ 2025 ആരംഭിച്ചശേഷം സന്ദര്‍ശകരുടെ എണ്ണം 50 ലക്ഷം കവിഞ്ഞതായി ജനറല്‍ എന്റര്‍ടൈന്‍മെന്റ് അതോറിറ്റി ഡയറക്ടര്‍ ബോര്‍ഡ് ചെയര്‍മാന്‍ തുര്‍ക്കി ആലുശൈഖ് അറിയിച്ചു. നിലവിലെ ശരത്കാല അവധിക്കാലത്ത് രാജ്യത്തിന്റെ വിവിധ പ്രവിശ്യകളില്‍ നിന്നുള്ള സന്ദര്‍ശകരുടെയും വിനോദസഞ്ചാരികളുടെയും സന്ദര്‍ശകരുടെ എണ്ണത്തില്‍ ഗണ്യമായ വര്‍ധനയുണ്ടായി.
യെമന്‍ കള്‍ച്ചറല്‍ ഡേയ്‌സ് അടക്കമുള്ള വിവിധ പരിപാടികള്‍ റിയാദ് സീസണിൽ സ്വീകാര്യത നേടി. നാടോടി കലകള്‍, പരമ്പരാഗത നൃത്തങ്ങള്‍, പരമ്പരാഗത വസ്ത്രങ്ങള്‍, പ്രശസ്തമായ യെമന്‍ വിഭവങ്ങള്‍, കരകൗശല പ്രദര്‍ശനങ്ങള്‍ എന്നിവയുള്‍പ്പെടെ ആധികാരിക യെമന്‍ പൈതൃകം അടുത്തറിയാന്‍ നിരവധി പേരാണ് എത്തിയത്.
എ.എന്‍.ബി അരീനയില്‍ നടന്ന ദി റിംഗ് 4: നൈറ്റ് ഓഫ് ദി ചാമ്പ്യന്‍സ് ഇവന്റ് അടക്കം കഴിഞ്ഞ ആഴ്ച തലസ്ഥാനത്ത് നടന്ന ബോക്‌സിംഗ് വീക്ക് ഇവന്റുകളിലും വന്‍ ജനപങ്കാളിത്തം ഉണ്ടായി. ബോക്‌സിംഗ് രംഗത്തെ ഏറ്റവും മികച്ച താരങ്ങളാണ് പങ്കെടുത്തത്. റിയാദ് സീസണ്‍ സ്‌നൂക്കര്‍ ചാമ്പ്യന്‍ഷിപ്പ് 2025 ലും വന്‍ ജനപങ്കാളിത്തം ഉണ്ടായി. സ്‌നൂക്കര്‍ ചാമ്പ്യന്‍ഷിപ്പില്‍ ചൈനയുടെ ചൗ ഷിന്‍ടോങ് ഓസ്ട്രേലിയയുടെ റോബര്‍ട്ട്സണെ പരാജയപ്പെടുത്തി കിരീടം നേടി.
റിയാദ് സീസണിന്റെ ഭാഗമായി റിയാദ് മൃഗശാലയും ഉദ്ഘാടനം ചെയ്തതും സന്ദര്‍ശകര്‍ കൂടാൻ കാരണമായി. അന്താരാഷ്ട്ര പ്രശസ്ത ഉള്ളടക്ക സ്രഷ്ടാവായ, മിസ്റ്റര്‍ ബീസ്റ്റ് എന്നറിയപ്പെടുന്ന ജിമ്മി ഡൊണാള്‍ഡ്സണ്‍ അവതരിപ്പിക്കുന്ന ബീസ്റ്റ്ലാന്‍ഡ് സീസണിലെ ഏറ്റവും പ്രധാനപ്പെട്ട പുതിയ സോണിലൊന്നില്‍ തുറന്നു. 1,88,000 ചതുരശ്ര മീറ്ററിലധികം വിസ്തൃതിയുള്ള ഈ സോണില്‍, 15 ലധികം പ്രധാന റൈഡുകളും, 14 വൈക്കിംഗ് കോസ്റ്റര്‍, ഫാന്റം എക്‌സ്.എക്‌സ്.എല്‍, ടോപ്പ് സ്പിന്‍, 50 മീറ്റര്‍ ഉയരമുള്ള ബംഗീ ജമ്പിംഗ് തുടങ്ങിയ പ്രധാന ആകര്‍ഷണങ്ങളും ഉണ്ട്. ഒന്നിലധികം സംസ്‌കാരങ്ങളില്‍ നിന്നുള്ള വൈവിധ്യമാര്‍ന്ന വിനോദ അനുഭവങ്ങള്‍ വാഗ്ദാനം ചെയ്യുന്ന ബുളിവാര്‍ഡ് വേള്‍ഡും എല്ലാ പ്രായക്കാര്‍ക്കും അനുയോജ്യമായ തിയേറ്ററുകള്‍, സംഗീതകച്ചേരികള്‍, റൈഡുകള്‍ എന്നിവയിലൂടെ ജനപ്രീതി നിലനിര്‍ത്തിയ ബുളിവാര്‍ഡ് സിറ്റിയും വലിയ ജനക്കൂട്ടങ്ങളെയാണ് ആകര്‍ഷിക്കുന്നത്.
ഇത്രയും കുറഞ്ഞ കാലയളവില്‍ സന്ദര്‍ശകരുടെ എണ്ണം 50 ലക്ഷം കവിഞ്ഞത്, സംസ്‌കാരം, കായികം, കല, വിനോദം എന്നിവ സമന്വയിപ്പിക്കുന്ന വൈവിധ്യമാര്‍ന്ന അനുഭവങ്ങളുടെ ഫലമായി രാജ്യത്തിനകത്തും പുറത്തും നിന്നുള്ള സന്ദര്‍ശകരെ ആകര്‍ഷിക്കുന്ന ആഗോള ലക്ഷ്യസ്ഥാനമെന്ന നിലയില്‍ റിയാദ് സീസണിന്റെ പദവി പ്രതിഫലിപ്പിക്കുന്നു.