റിയാദ് – റിയാദ് ഇന്ത്യന്‍ മ്യൂസിക് ലവേഴ്‌സ് അസോസിയേഷന്‍ (റിംല) ഇഫ്താര്‍ സംഗമം സംഘടിപ്പിച്ചു. കോഴിക്കോട് സ്വദേശിയായ അബ്ദു റഹീമിന്റെ ജയില്‍ മോചനത്തിനുള്ള തുകയും ഇഫ്താര്‍ സംഗമത്തില്‍ വിതരണം ചെയ്തു. പ്രവാസത്തിലെ പ്രതിസന്ധിഘട്ടത്തില്‍ പോലും സഹജീവികളോടുള്ള കരുണയും കരുതലും കൈവിടാതെ നിറഞ്ഞ മനസ്സോടെ അബ്ദുറഹീമിന്റെ ജയില്‍ മോചനത്തിനുള്ള തുക കണ്ടെത്തുന്ന ഈ ഉദ്യമത്തില്‍ എല്ലാവരും പങ്കാളികളാകണമെന്ന് യോഗത്തില്‍ പങ്കെടുത്തവര്‍ അഭിപ്രായപെട്ടു.
റിംല പ്രസിഡന്റ് ബാബുരാജ് അധ്യക്ഷത വഹിച്ചു. ജനറല്‍ സെക്രട്ടറി അന്‍സാര്‍ ഷാ റമദാന്‍ സന്ദേശം അറിയിച്ചു. അബ്ദുറഹീം സഹായനിധിയിലേക്ക് റിംല സമാഹരിച്ച തുക ഭാരവാഹികള്‍ കോര്‍ഡിനേഷന്‍ കമ്മിറ്റി അംഗങ്ങള്‍ ആയ സുധീര്‍ കുമ്മിള്‍, സലീം വാലില്ലാപുഴ എന്നിവര്‍ക്ക് കൈമാറി. വാസുദേവന്‍ പിളള, സുരേഷ് ശങ്കര്‍, വിജയന്‍ നെയ്യാറ്റിന്‍കര, ഷാനു, ബിനു ശങ്കരന്‍, റോഷന്‍, ജോഷി എന്നിവര്‍ ആശംസകള്‍ അറിയിച്ചു. സെക്രട്ടറി ശ്യാം സുന്ദര്‍ സ്വാഗതവും വൈസ് പ്രസിഡന്റ് നിഷ ബിനീഷ് യോഗത്തിന് നന്ദിയും പറഞ്ഞു.