ദമാം– നാലര പതിറ്റാണ്ടിലധികം സൗദി ദമാമിൽ പ്രവാസിയായ തിരുവനന്തപുരം പേരൂര്‍ക്കട സ്വദേശി അരിഫിൻ മനസിലിലെ മുഹമ്മദ് സിറാജ് (70) ഫിലിപ്പൈന്‍സില്‍ നിര്യാതനായി. കമ്പനി ആവശ്യാര്‍ഥം റിക്രൂട്ട് മെന്റിന് വേണ്ടി ഫിലിപ്പൈന്‍സിലെ മനിലയിൽ എത്തിയ മുഹമ്മദ് സിറാജിന് കടുത്ത പനി അനുഭവപ്പെട്ടതോടെ ആശുപത്രിയിൽ പ്രവേശിപ്പിക്കുകയായിരുന്നു. പനി മൂർഛിച്ചതോടെ വെന്റിലേറ്ററിലാവുകയും ഇന്നു പുലര്‍ച്ചെ മരണ സംഭവിക്കുകയുമായിരുന്നു.
46 വര്‍ഷത്തോളമായി ബിന്‍ ഖുറയ്യ കമ്പനിയിലെ വർഷങ്ങളോളം എച്.ആർ മാനേജർ പദവിയിലും ഇപ്പോൾ കമ്പനിയുടെ സീനിയർ കൺസൾട്ടന്റായി ജോലി ചെയ്ത് വരികയായിരുന്നു. വര്‍ഷങ്ങളോളം അബ്‌ഖേക്കിലായിരുന്നു ജോലി ചെയ്തിരുന്നത്. ഇപ്പോള്‍ ദമാം റാക്കയില്‍ ആണ് താമസം. ഫാത്തിമയാണ് ഭാര്യ. അൻവിൻ , അദ്‌നാൻ, നജ്‌ല എന്നിവർ മക്കളാണ്. മുഹമ്മദ് സാലി- സഫിയ ബീവി ദമ്പതികളുടെ മകനാണ്. ഡോ : റിൻസി , ഡോ. ആമിന, അർഷാദ് എന്നിവർ മരുമക്കളാണ്. ഖബറടക്കം നാട്ടില്‍ നടത്തുമെന്ന് ബന്ധുക്കള്‍ അറിയിച്ചു. വിവരമറിഞ്ഞ് ഭാര്യയും മക്കളും ഫിലിപൈൻസിലെത്തിയിട്ടുണ്ട്.
ധാരാളം സുഹ്യദ് വലയമുള്ള മുഹമ്മദ് സിറാജിന്റെ വിയോഗം കമ്പനിയിലെ സഹപ്രവർത്തകരേയും പരിചിതരേയും ദുഃഖത്തിലാഴ്ത്തി.