കോഴിക്കോട്: കിഡ്സ് സ്വിമ്മത്തോൺ മത്സരത്തിലെ വിജയികൾക്ക് സമ്മാനം നൽകാനെത്തിയ ഐഎഎസ് ഉദ്യോഗസ്ഥൻ ശ്രീറാം വെങ്കിട്ടരാമനെതിരെ രക്ഷിതാവിന്റെ പരസ്യ പ്രതിഷേധം. മാധ്യമപ്രവർത്തകൻ കെ.എം. ബഷീർ കൊല്ലപ്പെട്ട വാഹനാപകടക്കേസിലെ പ്രതിയായ ശ്രീറാം വെങ്കിട്ടരാമനിൽ നിന്ന് തന്റെ മകൾ സമ്മാനം വാങ്ങില്ലെന്ന് ഒരു കുട്ടിയുടെ രക്ഷിതാവ് വ്യക്തമാക്കുകയായിരുന്നു.
കാലിക്കറ്റ് പെഡലേഴ്സിന്റെ നേതൃത്വത്തിൽ ചെറൂട്ടി നഗർ സ്വിമ്മിങ് പൂളിലായിരുന്നു മത്സരം സംഘടിപ്പിച്ചത്. കാലിക്കറ്റ് ട്രൈത്തലോണിൽ പങ്കെടുക്കാനെത്തിയ ശ്രീറാമിനെ സംഘാടകർ ചടങ്ങിലേക്ക് ക്ഷണിക്കുകയായിരുന്നു.
എന്നാൽ “കൊലയാളിയിൽ നിന്ന് സമ്മാനം വാങ്ങില്ല” എന്ന് രക്ഷിതാവ് ഉറച്ച നിലപാടെടുത്തതോടെ ശ്രീറാം വെങ്കിട്ടരാമൻ സമ്മാനദാനത്തിൽ നിന്ന് പിന്മാറി. തുടർന്ന് ചടങ്ങിലുണ്ടായിരുന്ന അസിസ്റ്റന്റ് കളക്ടറാണ് കുട്ടികൾക്ക് സമ്മാനങ്ങൾ വിതരണം ചെയ്തത്.