റിയാദ്– രാഷ്ട്ര നിർമാണത്തിന് നൽകിയ ദീർഘകാല സംഭാവനകൾ മുൻനിർത്തി ഇന്ത്യൻ സായുധസേനയിലെ വീരയോദ്ധാക്കൾക്ക് ആദരാഞ്ജലി അർപ്പിച്ച് റിയാദ് ഇന്ത്യൻ എംബസിയിൽ സായുധ സേന വെറ്ററൻസ് ദിനാചരണം നടത്തി. ഇതോടനുബന്ധിച്ച് എംബസി അങ്കണത്തിൽ ഭീകരതയുടെ മാനുഷിക വിലയെന്ന പേരിൽ ചിത്ര പ്രദർശനവും സംഘടിപ്പിച്ചു.
സൈനികരും അവരുടെ കുടുംബങ്ങളും ഇന്ത്യൻ സമൂഹ പ്രതിനിധികളും സ്കൂൾ വിദ്യാർഥികളും പങ്കെടുത്ത ചടങ്ങിൽ ഇന്ത്യൻ അംബാസഡർ ഡോ. സുഹൈൽ അജാസ് ഖാൻ അധ്യക്ഷത വഹിച്ചു. യുഎൻ സമാധാന സേനയിലടക്കം ഇന്ത്യൻ സേനയുടെ സംഭാവനകൾ പ്രത്യേകം സ്മരിക്കേണ്ടതാണ്. അവർ നമ്മുടെ രാജ്യത്തിന്റെ സുരക്ഷക്ക് വേണ്ടി കഠിനാധ്വാനം ചെയ്യുന്നു. സ്വന്തം ജീവൻ പോലും രാജ്യത്തിന് നൽകാൻ തയ്യാറായിരിക്കുന്നു. സൈനിക സമൂഹത്തിന്റെ പ്രസക്തിയും ശക്തിയും അതാണ്. അംബാസഡർ പറഞ്ഞു.
സൗദി അറേബ്യയിൽ ജീവിക്കുന്ന ഏതാനും പേർ അവരുടെ സൈനിക ജീവിതത്തിലെ അനുഭവങ്ങൾ സദസ്സുമായി പങ്കുവെച്ചു. ഇന്ത്യൻ സായുധസേനയുടെ ധൈര്യവും ജീവത്യാഗവും ഓർമിപ്പിച്ച് ഇന്ത്യൻ സ്കൂളിലെ വിദ്യാർഥികൾ വിവിധ കലാപരിപാടികൾ സംഘടിപ്പിച്ചു. സേനാംഗങ്ങളെ അംബാസഡർ പുതിയ സമ്മാൻ മാഗസിനും മെമന്റോയും നൽകി ആദരിച്ചു. എംബസി അങ്കണത്തിൽ ഭീകരതയുടെ മാനുഷിക വിലയെന്ന പേരിൽ ഒരുക്കിയ ചിത്രപ്രദർശനം അംബാസഡർ ഉദ്ഘാടനം ചെയ്തു. ഭീകരവാദത്തെ ചെറുക്കുന്നതിനുള്ള ഇന്ത്യൻ ശ്രമങ്ങളെ അടിവരയിടുന്നതായിരുന്നു പ്രദർശനം.